Read tetala 2 Khumi ya Dikanga 7 Bible Online

2 Khumi ya Dikanga 7 - tetala bible

2 Khumi ya Dikanga 7

¹Elisha akakaluya diui ati: Nyulungi, diui dia Latuyalaka. Latuyalaka kata ati: Lui lʼetena kene wayusundja yediko ya shima ka pudipudi lʼushinga wa shekele otoi, la tediko tuhendi tʼepunga lu ushinga wa shekele otoi lʼeotwelo kʼusumba wa Samariya.

²Olohe wakekamaka khumʼekanga akakaluya umvutshi a Unyashungu diui ati: Naka Latuyalaka ayudihula adidishi lʼulungu, dikambu dia wuhu oso mbeyaka ntshama uka? Ku Elisha akûkaluya diui ati: Ulungi, ashu aye wayena dikambu so, keli we hole diango.

³Lʼetena kako apami anei, akanga a sudi, waki lʼeotwelo kʼusumba, wakambwana vati: Ngandi, tutshikalaki lane edja ndu tambuvo?

⁴Naka tambukana dia mboto lʼusumba, ndjala ka kasha keko lʼusumba, ku tayutuvo leko; keli naka tayutshikala lane, tayuvo pupu. Nyeso tutshu, tutuyatambiya lu anya wʼalimbi wʼasi Suriya. Naka vo wayutukimo, shu tayutshikala la lumu; ku naka vo wayutudiaka, shu tayuvo.

⁵Vo wakunela la hyutshihutshi, wakatshu utsha la pangu kʼasi Suriya. Lamʼakawakumi lʼeotwelo ka pangu kʼasi Suriya, watani ku nduku untu.

⁶Khumesu akukia alimbi wʼasi Suriya lundju la pusupusu ya ta, la falasa, ndu la ului a wuki wʼalimbi. Ku vo wakatanela vati: Nyuki, khumʼekanga ka Isariyele akatokongedi khumi ya dikanga yʼasi Hiti, ndu yʼasi Edjibitu dia ndjutolosha.

⁷Diako mbakawunela, mbakawalawo la hyutshihutshi, mbakawatatshiki mvudu yawo yʼapema, falasa yawo, punda yawo, ndu pangu uku akito. Vo wakalawo etundu etu, dia nshimbela nyumu yawo.

⁸Lamʼakakumi akanga a sudi lʼeotwelo ka pangu, vo wakoto lu luudu la dipema lomotshi, wakali, wakano, wakose fesa, paunyi la ahondo wakatushe. Ku vo wakakalula; wakatoto lu luudu la dipema lukina, wakose diango, wakatushe.

⁹Ku vo wakatanela vati: Wuhu watshasu one kema ololo! Lushi lʼelo, leko lushi la lukumu lʼololo, keli shu ntshikalaka ki. Naka tayutshikala ki, ndu tayukunga edja ndu pindju, elanyelu kayuya le su. Nyeso tutshu, tututeli khumbu ka khumʼekanga.

¹⁰Vo wakatshu, wakateta elami wa la suku diʼusumba; wakawatela vati: Shu takakumi lu pangu kʼasi Suriya, tutani ku nduku untu, kuyanga diui diʼuntu leko. Keli takatanyi falasa la punda yukelekami lu mvudu yʼapema uku akiwo.

¹¹Ku alami wa suku diʼusumba wakahangohango, wakatutela khumbu ka khumʼekanga lukumu lako.

¹²Khumʼekanga aketo lʼutshu, akatela ekambi andi ati: Dimi layunyenya uku alanga asi Suriya ntutshela. Vo mbeyaka vati: Shu la ndjala. Diako mbakawatukutumba uma lu pangu dia ntushama lʼusui, wata vati: Lamʼayuwutumba uma lʼusumba, katuwandi lunda, katoto lʼusumba.

¹³Ukambi andi omotshi akûkaluya diui lʼosengosengo ati: Antu amotshi wose falasa tshanu yambutshikala lʼusumba (yo yeli uku ului tshe wʼasi Isariyele wambutshikala, yo yeli uku ului wa Isariyele tshe wakavu), tatumi, watendi dikambu.

¹⁴Vo wakose pusupusu hyendi kame la falasa, ku khumʼekanga akatumi akendji lu wanya wʼalimbi wʼasi Suriya. Ndi akawatela ati: Nyutshu, nyutendi.

¹⁵Vo wakatshu lu wanya awo pulu ndu la Jorodana. Wendi ku mbuka tshe kakayadi ahondo atu kalakala la diango diakatakadjaka asi Suriya lamʼakawatalawoka. Ku akendji wakakalula, wakayutela khumʼekanga.

¹⁶Wudja wakatumbi, wakatumba diango lu pangu kʼasi Suriya. Ku wakasundja yediko ya shima ka pudipudi lʼushinga wa shekele otoi, la tediko tuhendi tʼepunga lʼushinga wa shekele otoi, uku aki diui dia Latuyalaka.

¹⁷Khumʼekanga akasha olombodi wʼalimbi wakandekama okende wa nama eotwelo kʼusumba; antu wakawukamakamela lʼekulu lʼeotwelo kʼusumba. Ku ndi akavu uku diui diakati umvutshi a Unyashungu, lakateketaka lamʼakayi khumʼekanga le ndi.

¹⁸Okone dikambu diakayala uku diui diakatela umvutshi a Unyashungu khumʼekanga ati: Lui lʼetena kene, wayusundja tediko tuhendi tʼepunga lʼushinga wa shekele otoi; la yediko ya shima ka pudipudi lʼushinga wa shekele otoi lʼeotwelo kʼusumba wa Samariya.

¹⁹Olombodi ako kakakaluya umvutshi a Unya shungu diui ati: Naka Latuyalaka ayudihula adidishi wa lʼulungu, dikambu so mbeyaka ntshama uka? Ndi eli one lakakaluya umvutshi a Unyashungu diui ati: Mete, ashu aye wayena dikambu so, keli we hole diango.

²⁰Dikambu diako diakayala osoku, antu wakawukamakamela lʼeotwelo, ku ndi akavu.