Read tetala 2 Khumi ya Dikanga 8 Bible Online

2 Khumi ya Dikanga 8 - tetala bible

2 Khumi ya Dikanga 8

¹Elisha akatela umuntu lakandulwela onʼandi a pami[7] ati: Uneli, utshu we la wa lu luudu laye, utudjase lene ukukiye mbidjase, ne dia Latuyalaka ayutuma ndjala ka kasha. To kayuyala deku esambeli lu kete.

²Umuntu akunela, akatshi uku diui dia umvutshi a Unyashungu. Ndi akatshu, ndi la wa lu luudu landi; akatudjase deku esambeli lu kete yʼasi Filistiya.

³Lʼekumelu ka deku esambeli, umuntu akakalula uma lu kete yʼasi Filistiya. Ndi akatshu dia ntosengasenga khumʼekanga lu dikambu dia luudu la ekambo kandi.

⁴Khumʼekanga akasawula la Ngehazi, ukambi wʼumvutshi a Unyashungu; akosengasenga ati: Umvuteli akambu a waki wakatshaka Elisha.

⁵Kamʼakandasanyiaka khumʼekanga uku akandulula untu lakavu, ku umuntu kanga ona pami lakandulula, ambuya dia ndjosengasenga khumʼekanga lu dikambu dia luudu landi la ekambo kandi. Ku Ngehazi akati ati: Khumemi khumʼekanga li, umuntu ako one, ndu onʼandi lakulula Elisha one.

⁶Lamʼakambula khumʼekanga umuntu dikambu diako, ndi akulimbitshiyadio. Ku khumʼekanga akawusha olohe omotshi wakandatela ati: Wakaluya kene tshe kaki le ndi ndu elua tshe waki lʼekambo kandi umaka lushi lakandunela uma lu kete nye edja ndu kakiane.

⁷Elisha akatshu la Dameseke. Lʼetena kako Bene-Hadada, khumʼekanga ka Suriya aki la kandji. Wakawutela vati: Umvutshi a Unyashungu ambuya.

⁸Khumʼekanga akatela Hazaele ati: Ose ushasha omotshi, utshu, utuhumani la umvutshi a Unyashungu. Utuwumbuli diui uma le Latuyalaka dia mbeya kana layokono uma lu kandji kene.

⁹Okone Hazaele akatshu dia ntuhumana la la ndi, ndi akatole ushasha a wehu tshe wa diango diʼololo dia la Damaseke, diaki wutshu wakakuki kamelo akumi anei memba. Ndi akatemala la le ndi; akawutela ati: Onʼaye Bene-Hadada, khumʼekanga ka Suriya, kuntumi le ye dia ndjukumbula ati: Dimi layokono uma lu kandji kene?

¹⁰Elisha akûkaluya diui ati: Tshoka, utuwuteli wati: We ayokono! Keli Latuyalaka akamenya ati: Ndi ayuvo.

¹¹Umvutshi a Unyashungu akushishima, akawendi tee, edja ndu ndi akuki sonyi, akaleli.

¹²Hazaele akawumbula ati: Dikambu kuna dialelaye, we khumemi? Ndi akûkaluya diui ati: Ne dia dimi mbeyaka kolo kayuyutshela asi Isariyele; we ayutshumba esumba awo weli la kumbu ya wulu, ayudiaka elongo awo wʼapami la yombo, ayatshatsha anʼawo wa tshitshe, ndu ayata wadiewo weli la waemi.

¹³Hazaele akûkaluya diui ati: Kakona kemi, dimi ukambi aye, leli uku fo, dia ntsha dikambu dia wuki so? Elisha akûkaluya diui ati: Latuyalaka akamenya ati: We ayuyala khumʼekanga ka Suriya.[8]

¹⁴Ndi akamo uma la le Elisha, akakalula le khumendi. Ku khumendi akatuwumbula ati: kakakutedi Elisha na? Ndi akakaluya diui ati: Ndi akamvutedi ati: We ayokono.

¹⁵La wedi a pindju, Hazaele akose ulangitshi, akawumbia lu ashi, akukumbi khumʼekanga lʼelundji, ku ndi akavu. Hazaele akulela lu dihuli diandi.

¹⁶Lʼeleku ka tanu ka diulelu dia Jorama, onʼa Ahaba, khumʼekanga ka Isariyele, Jehorama onʼa Jehoshafata, khumʼekanga ka Juda, akatatela mbulela.

¹⁷Ndi aki la deku akumi asatu la pendi lamʼakandayala khumʼekanga. Ndi akulela deku enanei la Jerusalema.

¹⁸Ndi akakendakendaka lu mbuka ka khumi ya dikanga ya Isariyele uku akatshaka khumbu ka Ahaba, ne dia ndi akatshuki onʼa Ahaba. Ndi akatshaka kene kaki kolo lu ashu wa Latuyalaka.

¹⁹Keli Latuyalaka kunanya Juda, ne dia ukambi andi Davidi, uku daka diakandulaki dia mboshaka tala lʼatei wa anʼandi pundju.[9]

²⁰Lu nshi ya Jorama, asi Edome wakahindwela Juda,[10] wakayandjela khumʼekanga.

²¹Jorama akete la Zaira, ndi la pusupusu yandi tshe. Ndi akateto lʼutshu, akatolo la asi Edome wakudingi ndu la elombodi awo wa pusupusu. Keli wudja andi wakalawo uya la wakawo.

²²Okone asi Edome wakahindwela asi Juda edja ndu elo. Ndu Libina akahindwela pupu lʼetena kako.

²³Undi, etsha ekina wa Jorama la akambu tshe wakandatshaka hawufundami lu Buku diʼEkondo wa Khumi ya dikanga ya Juda?

²⁴Jorama akayeli wa shi, wakukhunde la le wa shi lʼusumba wa Davidi. Onʼandi Ahaziya akulela lu dihuli diandi.

²⁵Lʼeleku ka dikumi la ahendi ka diulelu dia Jorama, onʼa Ahaba, khumʼekanga ka Isariyele, kakatatela Ahaziya, onʼa Jehorama khumʼekanga ka Juda, mbulela.

²⁶Ahaziya aki deku akumi ahendi la pendi lamʼakandayala khumʼekanga. Ndi akulela eleku otoi la Jerusalema. Lukumbu la nyangu laki Ataliya, ukana wa Omiri, khumʼekanga ka Isariyele.

²⁷Ndi akakendakendaka lu mbuka kakakendakendaka khumbu ka Ahaba, akatshaka kene kaki kolo lu ashu wa Latuyalaka, uku akatshaka khumbu ka Ahaba, ne dia ndi aki ukilu wa khumbu ka Ahaba.

²⁸Ndi akatshu, ndi la Jorama, onʼa Ahaba, dia ntolosha Hazaele, khumʼekanga ka Suriya la Ramota-Ngiliyade. Ku asi Suriya wakahumuya Jorama.

²⁹Khumʼekanga Jorama akakalula la Jezerele dia ndjokono puta yakuhumuya asi Suriya la Rama lamʼakandalokaka la Hazaele, khumʼekanga ka Suriya. Ahaziya, onʼa Jehorama, khumʼekanga ka Juda akatshu la Jezerele dia ntenda Jorama, onʼa Ahaba, ne dia ndi aki la kandji.