Read tetala 2 Khumi ya Dikanga 9 Bible Online

2 Khumi ya Dikanga 9 - tetala bible

2 Khumi ya Dikanga 9

¹Umvutshi Elisha aketi otoi omotshi wʼana apami wʼamvutshi, akawutela ati: Olote uya lu lukindi, ose sai kene kʼiso, utshu la Rumota-Ngiliyade.

²Lamʼayuyutukuma leko, kutuyangi Jehu, onʼa Jehoshafata, onʼa Nimishi. Kutshu, kutuwunyit uma lʼatei wʼanangu, koto la ndi lu luudu lomotshi la lʼetei.

³Kose sai kʼiso, kuwuteleto lʼote, kuwuteli wati: Latuyalaka kata ati: Lambukukita iso dia we ndjala khumʼekanga ka Isariyele! Lʼokongo diku kudihuli lukuki, kulawo; tutshimbatshimbaki.

⁴Ku olongo a pami ako laki umvutshi, akatshu la Ramota-Ngiliyade.

⁵Lamʼakandakumi, atani ku elombodi wʼalimbi ene wudjashi. Ndi akati ati: Dimi la diui dia nkutela we olombodi. Jehu akawumbula ati: Le untu akona lʼatei asu? Ndi akulamya diui ati: Le ye, we olombodi.

⁶Jehu akunela, akoto la ndi lu luudu. Ku umvutshi akawutela iso lʼote; akawutela ati: Latuyalaka, Unyashungu wa Isariyele, kata ati: Lambukutela iso dia we ndjala khumʼekanga ka wudja wa Latuyalaka, Isariyele.[11]

⁷Kushili luudu la khumeye Ahaba ushiki, dia dimi nsomboya Jezebele dikila dia ekambi ami amvutshi la dikila dia ekambi tshe wa Latuyalaka.

⁸Ne dia utundu a khumbu tshe ka Ahaba kayulanyema, dimi layushila usika pami tshe ka lu khumbu ka Ahaba ushiki: one leli fumbi kana one luyadjasedi lu Isariyele.

⁹Dimi layete khumbu ka Ahaba uku khumbu ka Jereboama, onʼa Nebate, ndu uku khumbu ka Basha, onʼa Ahidja.

¹⁰Fo yayole Jezebele lʼusumba wa Jezerele,[12] nduku untu layukhunde. Ku ndi akadihula lukuki, akalawo.

¹¹Lamʼakatumbi Jehu uya le ekambi wa khumendi, omotshi akawumbula ati: Ngandi, we ki? Okoko wana wakayi kanga dadi uku le ye? Ndi akakaluya diui ati: Nyu mbeyaka pami keku ndu wuhu wukukindi mvuta.

¹²Vo wakuka luya diui vati: Kashi! Ututeli! Ku ndi akawatela ati: Okone la okone mbakandamvutedi ati: Latuyalaka kata ati: Dimi lambukukita iso dia we ndjala khumʼekanga ka Isariyele.

¹³Vo tshe untu lʼuntu akose dihondo diandi esadi, wakawalela dia ndi mbidjase ladiku diawo lʼote wa kibandelu, wakadi amama vati: Jehu keli khumʼekanga!

¹⁴Ku Jehu, onʼa Jehoshafata, onʼa Nimishi, akatshwela Jorama sheki. (Laso Jorama aki lu nama Ramota-Ngiliyade, ndi la Isariyele tshe, dikambu dia Hazaele khumʼekanga ka Suriya.

¹⁵Keli khumʼekanga Jorama akakalula la Jezerele dia ndjokono puta yakuhumuya asi Suriya lamʼakandalokaka la Hazaele khumʼekanga ka Suriya.) Jehu akawatela ati: Naka okone mbalanganyu, untu tatumbaki uma lʼusumba, dia ntuta lukumu lone la Jezerele.

¹⁶Jehu akahema lu pusupusu, akatshu la Jezerele, ne dia leko kaketami Jorama. Lʼetena kako Ahaziya, khumʼekanga ka Juda, akayi dia ndjenda Jorama.

¹⁷Ulami laki lʼetangelu ka la Jezerele, akenyi alimbi wa Jehu, akati ati: Lambena ului wʼalimbi. Jorama akawutela ati: Ose umbahemi omotshi wa falasa, utumi dia ndi ntuhumana la wo, dia ntuwambula kana lu ki kayawayi.

¹⁸Umbahemi wa falasa akatshu dia ntuhumana la Jehu; akati ati: Khumʼekanga kakumbula ati: Lu ki kayayayi? Ku Jehu akûkaluya diui ati: Kakona kʼasaye la ki? Utshimbi lʼokongo ami. Ku ulami akati ati: Dikendji diakakumi le wo, keli ndi hakalula.

¹⁹Ku ndi akatumi umbahemi wa hendi wa falasa. Lamʼakandatukuma le wo, ndi akati ati: Khumʼekanga kakumbula ati: Lu ki kayayayi? Jehu akûkaluya diui ati: Kakona kʼasaye la ki? Utshimbi lʼokongo ami.

²⁰Ku ulami akati ati: Ndu ndi akakumi le wo, keli ndi hakalula. Ekendjekendjelo ka pusupusu, nfanaka la ka Jehu, onʼa Nimishi, ne dia luwangu la wulu mbayandayi.

²¹Jorama akati ati: Nyukeleki pusupusu lu falasa, ku wakakeleka pusupusu kandi. Jorama, khumʼekanga ka Isariyele, la Ahaziya, khumʼekanga ka Juda, wakatumbi untu lʼuntu la pusupusu kandi dia ntuhumana la Jehu, wakatuhumana la ndi lʼekambo ka Nabota, usi Jezerele.

²²Lamʼakenyi Jorama Jehu, ndi akawumbula ati: Jehu, lu ki kayayayi? Ndi akûkaluya diui ati: Ki kakona keko lamʼeki munanyi ya nyo Jezebele, la aloka andi efula okone?

²³Jorama akakadimo, akalawo, akatela Ah iziya ati: Ahaziya li! fyungi nye!

²⁴Jehu akose uta andi, akukutula wulu, akatsheta Jorama lʼasa aheka. Dikuwa diakakumi pulu ndu lu diui, ku ndi akako lu pusupusu kandi.

²⁵Jehu akatela Bidikare, olohe andi, ati: Owembe, uwukadja lu ekambo ka Nabota, usi Jezerele; ne dia we mbuhoka diui diakati Latuyalaka lu dikambu diandi, lamʼakatatayelaka, dimi la ye, Ahaba shi lu falasa.

²⁶Latuyalaka akati ati: Mete, lakenyi dikila dia Nabota lui ndu dikila dia anʼandi wʼapami. Dimi layukosomboya lu dihuli ne[13] mbakandati. Okone uwembe, uwukadja lʼekambo kako, uku akati Latuyalaka.

²⁷Lamʼakenyi Ahaziya, khumʼekanga ka Juda, dikambu so, ndi akalawo lu mbuka kʼuma lu luudu lʼekambo. Jehu akayelana la ndi, akati ati: Nyudiaki ndu ndi lu pusupusu! Vo wakuhumuya lamʼakandatambelaka lu dikuna dia Ngura, lasuki la Ibileama. Ku ndi akalawo utsha la Mingido, akatuvo leko.

²⁸Ekambi andi wakawembe lu pusupusu utsha la Jerusalema, wakatukhunde lu wuku wa diumbu la le washi lʼusumba wa Davidi.

²⁹Lʼeleku ka dikumi lʼotoi ka diulelu dia Jorama, onʼa Ahaba, Ahaziya akayala khumʼekanga ka Juda.

³⁰Lamʼakakumi Jehu la Jezerele, Jezebele akuki lukumu. Ndi akakiti yula lu ashu, akalongosola divu, akendaka lu didishi.

³¹Lamʼakoto Jehu lʼusumba, ndi akawumbula ati: We Zimiri, undjaki wʼuwandji aye, lu ki kayayayi?

³²Ndi akedia elundji utsha lu didishi, akahangohango ati: Akona eli lu leke lami, ku elenga ehendi kana esatu wakatundja ete.

³³Ndi akawatela ati: Nyuwukadja la kete, ku vo wakawukadja. Ku dikila diandi dimotshi diakahandjo lu eheli, ndu lu falasa. Ku vo wakohotshahotsha lʼekulu.

³⁴Ku ndi akoto lu luudu, akali, akano. Ndi akad ati: Nyutshu, nyutendi umuntu uku lakadjama mananu. Nyutukhunde, ne dia onʼa khumʼekanga kendi.

³⁵Vo wakatshu dia ntukhunde, keli wakatutana paka lombo landi, akaka la tambi tu.

³⁶Okone vo wakakalula, wakayutela Jehu, ku ndi akati ati: Dikambu diako mbakati Latuyalaka lʼunyo wʼumvutshi andi Elidja, usi Tishibe, ati: Fo yayole emunyi wa Jezebele lʼusumba wa Jezerele;[14]

³⁷la udu wa Jezebele wayuyala uku tumi lu ekambo lʼusumba wa Jezerele, wuhu waheyi antu mvuta vati: Jezebele one.