Read tetala 1 Ekondo 10 Bible Online

1 Ekondo 10 - tetala bible

1 Ekondo 10

¹Asi Filistiya wakalo lʼasi Isariyele ta. Asi Isariyele wakalawo asi Filistiya, wakako, wakadiakema lʼUkungu a Ngiliboa.

²Asi Filistiya wakayelana la Saulu la anʼandi wʼapami, ku vo wakatudiaka Jonatana, Abinadaba la Malaki-Shua ana apami wa Saulu.

³Ta diakaheki Saulu. Ambuki wʼeta wakatuwunda, wakuhumuya wulu.

⁴Ku Saulu akatela one lakatawembelaka dihumo dia ta ati: Osomole yombo yaye, umpiki, ne dia wane wahatahemaka ohekeli aku watukuyumpika. Keli one lakatawembelaka dihumo dia ta kunanga, ne dia ndi akandama la woma. Ku Saulu akose yombo yandi, akayahumanya ladiku diayo.

⁵Lamʼakenyi one lakatembelaka Saulu dihumo dia ta ati: Ndi ambuvo, ndu ndi akayahumanya ladiku dia yombo yandi, ku ndi akavu.

⁶Osoku mbakavu Saulu, ndi la anʼandi asatu wʼapami. Ndu wa lu luudu landi tshe wakavu etena kako.

⁷Lamʼakenyi asi Isariyele waki lʼukidi vati: Asikasu wambulawo, ndu Saulu la anʼandi wambuvo, ndu vo wakalawo, wakatshiki esumba awo. Ku asi Filistiya wakatshu, wakatudjase lʼesumba ako.

⁸La wediʼa pindju, asi Filistiya wakatshu dia ntosa diango diaki edu, wakatutana Saulu la anʼandi asatu wʼapami wakavwi lʼUkungu a Ngiliboa.

⁹Vo wakose diango diandi, wakatole ote andi la dihumo diandi dia ta: wakatumi lukumu lako lʼololo le ditemolatemola diawo ndu le antu wa lu beke tshe dia kete yʼasi Filistiya.

¹⁰Vo wakatukitsha dihumo dia ta diaki Saulu lu luudu la ditemolatemola diawo, ndu wakatukeleka ote andi lu luudu la Dangona.

¹¹Lamʼakuki Jabeshe-Ngiliyade lukumu uku akatshela asi Filistiya Saulu,

¹²apami wa dihunga tshe wakunela dia ntosa udu wa Saulu la edu wa anʼandi wʼapami, wakatuya la wo la Jabeshe. Wakakhunde edu awo la tshina diʼulungu la Jabeshe; wakakili mbu ya nde nshi esambeli.

¹³Okone Saulu akavu uma lʼuhedia wakandahediaka Latuyalaka, ako lakindi kunkitanyia diui diandi,[13] ndu ne dia ndi akatshu le one latoteketshaka djimu dia ndi mboteketshiyadio.[14]

¹⁴Ndi kumumbula Latuyalaka, diako mbakandudiaki, ndu mbakandakimo diulelu le Davidi, ona Jese.