Read tetala 1 Ekondo 11 Bible Online

1 Ekondo 11 - tetala bible

1 Ekondo 11

¹Ku Isariyele tshe wakayi le Davidi la Heberona, wakayuwutela vati: Shu teli weka aye la emunyi aye.

²Nshi kina lamʼaki Saulu khumʼekanga, we kakalombolaka Isariyele. Ku Latuyalaka, Unyashungu aye, akakutela ati: We kayuyala ulami wa wudja ami Isariyele, we kayuyala uwandji awo.

³Okone dihangamendi tshe diʼIsariyele wakayi le khumʼekanga Davidi la Heberona. Ku ndi akadji la wo sheki la ntundu ka Latuyalaka la Heberona. Vo wakukiti iso dia ndi ndjala khumʼekanga ka Isariyele uku diui diakati Latuyalaka lʼunyo wa Samuele.

⁴Ku Davidi lʼasi Isariyele wakatshu la Jerusalema (yetawo vati: Jebuse). Lʼetena kako asi Jebuse,[15] akanga a kete, waki leko.

⁵Asi Jebuse wakatela Davidi vati: We hoto lane. Keli Davidi akose lungeli la la Siona. Vo mbeli usumba wa Davidi.

⁶Davidi akati ati: Untu tshe layolembia asi Jebuse ntundu, ayuyala uwandji la olombodi wʼalimbi. Joaba, onʼa Zeruya, akatshu ntundu, ku ndi akayala uwandji.

⁷Davidi akadjase lʼatei a lungeli, diako mbakawole dihuli diako vati: Usumba wa Davidi.

⁸Davidi akahikia mvudu lʼutshimba tshe wʼusumba uma la Milo ndu lʼetshimba. Ku Joaba akalongosola ahuli akina wʼusumba.

⁹Davidi akatatekoyaka ndjala la wulu, ne dia Latuyalaka, kanga lulimbilimbi, aki la ndi.

¹⁰Wane weli ewandji wʼakanga a wulu waki la Davidi, ndu wakukimanyiaka lu diulelu diandi kame la Isariyele tshe, dia mbushikike khumʼekanga, uku diui dia Latuyalaka lu dikambu dia Isariyele.

¹¹Wane weli efula kʼapami a wulu waki la Davidi: Jashobeame, onʼa Hakimoni. Ndi aki uwandji wa elombodi wa ta. Ndi akatepia dikonga diandi dia ndo lʼantu kama shatu, akadiaki vo tshe etena otoi.

¹²Eleazera, onʼa Dodo, usi Ahoa kakahonyi la ndi. Ndi aki otoi omotshi lʼatei wʼapami a wulu asatu.

¹³Ndi aki kame la Davidi la Pasi-Damima, lene akasangana asi Filistiyadia ndo ta lu ekambo kʼepunga, ku antu wakalawo asi Filistiya.

¹⁴Vo wakemala lʼatei ekambo, wakakilami, wakadiaki asi Filistiya. Latuyalaka akahandja la panda ka wuki.

¹⁵Ewandji esatu uma lʼatei wʼewandji akumi asatu wakatshu le Davidi lu wuku wʼAdulama. Lʼetena keso, ku asi Filistiya wakahangi lʼukidi wʼasi Refayima.

¹⁶Davidi aki lu lungeli la ta, la ului wʼalimbi wʼasi Filistiya wakahangi la Betelehema.

¹⁷Davidi akakumbula ashi, ata ati: Utumukundja ashi wa no uma lʼeteko ka la suku dia Betelehema li!

¹⁸Antu ako asatu waketi kʼatei wʼului wʼalimbi wʼasi Filistiya, wakatuduwula ashi uma lʼeteko ka la suku dia Betelehema. Vo wakawaela le Davidi, keli ndi kumbetawo mbano. Ndi akatshulula la ntundu ka Latuyalaka.

¹⁹Ndi akati ati: Unyashungu ami li, kanyi ya ntsha dikambu ne yeko etali uma le mi. Ukundi ukukimi no dikila diʼapami ane waketawo nsundja nyumu yawo? Ne dia uma lʼesundjelu ka nyumu yawo, mbakawatuwaela. Okone ndi kono ashi ako. Dikambu so mbakatshi akanga a wulu ane asatu.

²⁰Abishai, onangu Joaba, aki uwandji wa elombodi akumi asatu. Ndi akatepia dikonga diandi dia ndo lʼantu kama shatu, akadiaki. Diako mbakandayala la lukumu lʼatei asatu aku wa ntundu.

²¹Lʼatei wʼakumi asatu ako, ndi akaleki nemo, akayala uwandji awo. Keli ndi kunkundja nemo diedimi lʼasatu ako wa ntundu.

²²Benaya, onʼa Jehoyada, onʼa kanga wulu omotshi usi Kabize, akatshaka akambu wa mamba. Ndi akatudiaka ana ahendi wa tambwe la Moaba. Ndi akoto ndu lu difuku lu nshi ya lungi lʼekama la tshitshi akadiaki tambwe.

²³Ndi akadiaki usi Edjibitu laki utali wa kubita tshanu. Usi Edjibitu ako aki la dikonga lu lunya uku ukanda wa nto asami. Benaya akatshu utsha le ndi lʼukalimba, akatohotola dikonga uma lu lunya, akudiaki la dio.

²⁴Oso eli akambu wakatshi Benaya, onʼa Jehoyada. Ndu ndi akakundja lukumu kame lʼantu aku asatu a wulu.

²⁵Ndi akaleki antu akumi asatu nemo, keli ndi kombedima lʼantu aku asatu wa ntundu. Davidi akukitsha olombodi wa elami andi.

²⁶Apami a wulu lʼatei ului wʼalimbi ane: Asahele, onangu Joaba, Elehanana, onʼa Dodo, usi Betelehema,

²⁷Shamota, usi Haroda, Heleze, usi Pelona.

²⁸Ira, onʼa Ikeshe, usi Tekoa, Abiyezere, usi Anatota,

²⁹Sibekai, usi Husha, Ilai, usi Ahoa,

³⁰Maharai, usi Netofa, Helede, onʼa Bana, usi Netofa.

³¹Itai, onʼa Ribai, usi Ngibeya kʼasi Bendjamina, Benaya, usi Piratona.

³²Hurai, uma lʼekedi wa la Ngasha, Abiyele, usi Araba,

³³Azimaveta, usi Baharuma, Eliyaba, usi Shalobana,

³⁴Hashema, usi Ngizona, Jonatana, onʼa Shange, usi Harara.

³⁵Ahiyame, onʼa Sakara, usi Harara, Elifala, onʼa Ura,

³⁶Hefere, usi Mekera, Ahidja, usi Pelona,

³⁷Hezero, usi Karamele, Narai, onʼa Ezibai,

³⁸Joele, onangu Natana, Mibihare, onʼa Hangiri,

³⁹Zeleke, usi Amona, Naharai, usi Berote, lakatembelaka Joaba, onʼa Zeruya, dihumo dia ta.

⁴⁰Ira, usi Itiri, Ngareba, usi Itiri,

⁴¹Uriya, usi Hiti, Zabada, onʼa Alai,

⁴²Adina, onʼa Shiza, usi Rubena, olombodi wʼasi Rubena. Ndi lʼantu akumi asatu kame la ndi.

⁴³Hanana, onʼa Maka, Joshafata, usi Mitini,

⁴⁴Uziya, usi Ashiterote, Shama la Jeyele, ana wa Hotama, usi Aroera.

⁴⁵Jediyele, onʼa Shimiri, Joha onangu, usi Tizi,

⁴⁶Eliyele, usi Mahava, Jeribai la Joshaviya, ana wa Elename. Itima, usi Moaba,

⁴⁷Eliyele, Obede la Jasiyele, usi Mezoba.