Read tetala 1 Ekondo 13 Bible Online

1 Ekondo 13 - tetala bible

1 Ekondo 13

¹Davidi akambwana ndi la elombodi wa nunu nunu la elombodi wa kama kama yʼalimbi, ewandji tshe.

²Ku Davidi akatela ului tshe wa Isariyele ati: Naka dikambu ne ololo le nyu, ndu diambuya uma le Latuyalaka, Unyashungu asu, tutumi akendji lu beke tshe utsha le anengesu wambutshikala lu kete tshe ya Isariyele, ndu utsha le elombedi la asi Lewi lu esumba, lenʼeli etshimba awo dia vo nsangana la su.

³Katela oshete wa sheki wa Unyashungu asu lʼatei asu ntu, ne dia shu kuntsha la wo ulimu lu nshi ya Saulu.

⁴Ului tshe wʼantu waketawo ntsha dikambu so, ne dia dio diaki ololo lu ashu awo.

⁵Okone Davidi akasanganya asi Isariyele tshe kame uma la Shihore, okedi wa lʼEdjibitu, pulu ndu lʼeotwelo ka la Hamata, dia ntela oshete wa Unyashungu uma la Kiriyate-Jaerima.[16]

⁶Ku Davidi akunela, ndi la Isariyele tshe, wakatshu la Bala, ketawo vati: Kiriyate-Jearima keli lu leke la Juda, dia ntosa oshete wa Unyashungu, watuwetaka lukumbu la Latuyalaka ludjashi lʼasa akeruba.[17]

⁷Vo wakatundja oshete wa Unyashungu uma lu luudu lʼAbinadaba, wakawahe ladiku dia pusupusu kʼuyuyu. Uza la Ahiyo wakasukuya pusupusu kako.

⁸Davidi lʼasi Isariyele tshe wakatanokaka wenye la ntundu ka Unyashungu la wulu awo tshe, watimbi esambu, watahumi sese, akembi, ngomo, ekokoloko la amama.

⁹Lamʼakawakumi lu dihuli diʼesuswelu dia Kidona, Uza akasimbula lunya, akakimela oshete wʼekila, ne dia ngombe yakayangi mbokosha.

¹⁰Kele ka Latuyalaka kakayala wulu le Uza. Ndi akokomola, ne dia ndi akasimbula lunya landi dia nkimela oshete wʼekila, ku ndi akavu kaku la ntundu ka Unyashungu.

¹¹Davidi akanyangi wulu, ne dia Latuyalaka akudiaki osoku. Okone, vo mbetaka dihuli diako edja ndu elo vati: Pereze-Uza (kitshimudi ati: Ekunguswelu le Uza).

¹²Davidi akuki Unyashungu woma lushi luku, ata ati: Ukundi ayumeya nkumia oshete wa Unyashungu lakami?

¹³Okone Davidi kunanga nsekola oshete wa shek utsha lakandi lʼusumba wa Davidi. Ndi aketola la wo utsha lu luudu la Obede-Edome, usi Ngata.

¹⁴Oshete wa Unyashungu wakatshikala lu khumbu ka Obede-Edome, lu luudu landi ngondo shatu. Ku Latuyalaka akatshokola luudu landi,[18] la kene tshe kaki la ndi.