Read tetala 1 Ekondo 18 Bible Online

1 Ekondo 18 - tetala bible

1 Ekondo 18

¹Lʼokongo diku, Davidi akalo lʼasi Filistiya, akawele. Ndi akose Ngata la ngelu ya lʼokongo awo uma lʼanya awo.

²Ndi akalembia asi Moaba, ku vo wakayala lʼokongo andi, wakulambulaka ulambu.

³Davidi akawele Hadarezere, khumʼekanga ka Zoba, utsha la Hamata, lamʼakandatatshokaka la ntuhika luhingu landi lʼeuhwelu lu ndjali ka Eyufarate.

⁴Davidi akohotola pusupusu ya ta kinunu, ambahemi wa falasa nunu esambeli, la alimbi watokendakendaka lʼekulu nunu akumi ahendi. Davidi akahimbula falasa tshe yakakutulaka pusupusu eshisha ayo wa lʼekulu. Ndi akatshiki paka falasa yukuki nkutula pusupusu lukama.

⁵Lamʼakayi asi Suriya uma la Damaseke dia ndjukimanyia Hadarezere, khumʼekanga ka Zoba, Davidi akadiaki asi Suriya nunu akumi ahendi la pendi.

⁶Ku Davidi akakitsha malu la Suriya ka la Damaseke. Ku asi Suriya wakayala lʼokongo andi; wakulambulaka ulambu. Latuyalaka akete Davidi onembishi lu ahuli tshe wakandatatshokaka.

⁷Davidi akose dingawu dia paunyi diakakimelaka ekambi wa Hadarezere, akadiela uya la Jerusalema.

⁸Davidi akose ehotela efula uma la Tibihate la la Kuna, esumba wa Hadarezere. Solomona akayuwetsha puki ka wuki kʼohotela, dikoho la diango diʼulimu diʼohotela.[28]

⁹Lamʼakuki Tou, khumʼekanga ka Hamata, ati: Davidi ambowela ului wʼalimbi wa Hadarezere, khumʼekanga ka Zoba,

¹⁰ndi akatumi onʼandi, Hadorama, le khumʼekanga Davidi, dia ntuwemula la ntuwandula ne dia ndi akalo la Hadarezere, ku akowele (ne dia Hadarezere akalokaka la Tou). Hadorama akela wehu tshe wʼalonga, wa paunyi, wa fesa, la wʼehotela.

¹¹Khumʼekanga Davidi akakidia ndu diango ne le Latuyalaka kame la fesa la paunyi yakandosaka uma lu wedja tshe: uma lʼEdome, uma la Moaba, uma le asi Amona, uma le asi Filistiya la uma lʼAmaleka.

¹²Abishai, onʼa Zeruya, akadiaki asi Edome nunu dikumi la enanei lʼukidi a Leho.[29]

¹³Ndi akatshiki malu lu Edome, ku asi Edome tshe wakayala lʼokongo wa Davidi. Latuyalaka akete Davidi onembishi lu ahuli tshe wakandatatshokaka.

¹⁴Davidi akulela Isariyele tshe. Ndi akatshelaka wudja andi tshe akambu wusimbwi la wʼololo.

¹⁵Joaba, onʼa Zeruya, aki umbuledi wʼalimbi. Jehoshafata, onʼa Ahilude, aki okondodi.

¹⁶Zadoke, onʼa Ahitube, la Ahimeleke, onʼa Abiyatara, waki elombedi. Shavisha aki ufundji.

¹⁷Benaya, onʼa Jehoyada, aki uwandji wʼasi Kerete la asi Pelete. Ku ana apami wa Davidi waki elohe lasuki la khumʼekanga.