Read tetala 1 Ekondo 21 Bible Online

1 Ekondo 21 - tetala bible

1 Ekondo 21

¹Satana akunela dia ndosha Isariyele akatshutshiya Davidi dia mbala asi Isariyele.

²Davidi akatela Joaba la ewandji wa wudja ati: Nyutshu, nyutali asi Isariyele uma la Bere-Sheba pulu ndu la Dane, kanyuyumvuteli dia dimi mbeya efula kawo.

³Joaba akûkaluya diui ati: Latuyalaka afudia wudja andi tena lukama uma lu yediko yawo. Keli khumemi khumʼekanga aha vo tshe ekambi aye mbewo? Dikambu kuna dialangaye dikambu ne khumemi? Ukundi ayangaye munganyia Isariyele okone?

⁴Keli aui wa khumʼekanga wakalembia utema wa Joaba. Okone Joaba akunela, akakindula lu Isariyele tshe, akakalula la Jerusalema.

⁵Joaba akayutela Davidi efula kʼantu wakawali. Efula kʼasi Isariyele tshe wakakimelaka tombo waki yediko yʼantu miliyo otoi la nunu lukama, la efula kʼasi Juda wakakimelaka tombo waki nunu kama nyei la akumi esambeli.

⁶Keli ndi kumbala asi Lewi la asi Bendjamina waki lʼatei awo, ne dia diui diakati khumʼekanga diakayala wononyi le ndi.

⁷Unyashungu akanyangi dia dikambu ne, diako mbakandasuya Isariyele.

⁸Davidi akatela Unyashungu ati: Dimi lakatshi kolo ka wuki, dia ntsha dikambu ne. Keli kakiane lambukosengasenga nti: Unyimanyia, dimi ukambi aye, kolo kene, ne dia lakatshi uku enginya.

⁹Latuyalaka akatela Ngada, omenyi wʼakambu wahatayi a Davidi, ati:

¹⁰Tshoka tuteli Davidi wati: Latuyalaka kata ati: Dimi lambukitsha akambu asatu la ntundu kaye. Osonole dimotshi uma lʼatei awo, dia dimi nkutsheladio.

¹¹Ku Ngada akatshu le Davidi, akatuwutela ati: Latuyalaka kata ati: Osonole kene kalangaye.

¹²Deku satu dia ndjala ka kasha, ngondo shatu ya nanyema le atunyi aye, lamʼeli yombo yʼatunyi aye lu nkuma le ye, kana nshi shatu ya yombo ya Latuyalaka, ya asui wa wulu lu kete ndu yʼelanyelu kayela ondjelo wa Latuyalaka lu beke tshe dia Isariyele. Kakiane ukani yimba dia mvutelami diui diayumukaluya le one lakantumi.

¹³Davidi akakaluya Ngada diui ati: Dimi laya lʼasa kanda la kanda. Ndjakosha lu anya wa Latuyalaka, ne dia ndi eli kanga ketshi efula. Keli dimi takoshamaki lu anya wʼantu.

¹⁴Okone Latuyalaka akatumela Isariyele sui dia wulu, ku antu nunu akumi esambeli wakavu.

¹⁵Unyashungu akatumi ondjelo la Jerusalema dia ndjilanya. Kamʼakandayangi ndjilanya, Latuyalaka akendi, akalembe utema, akatela ondjelo wʼelanyelu ati: Ambukuka! Ukitsha lunya. Ondjelo wa Latuyalaka akemadi lasuki la dihuli diʼesuswelu ka Oronana, usi Jebuse.

¹⁶Davidi akedia ashu, enyi ku ondjelo wa Latuyalaka emadi lʼasa ulungu la kete uhangaki yombo ladiku dia Jerusalema. Ku Davidi la dihangamendi wolote akutu wakayakosha ekhukumadi la kete.

¹⁷Davidi akambula Unyashungu ati: Aha dimi kakadjanga dia mbala antu? Mete, dimi kakatshi kolo, dimi kakangi, keli ekoko ene kakawatshi na? Okone we Latuyalaka, Unyashungu ami, lunya laye landosha, dimi la wa lu luudu la papa atu. Keli talutshaki nduku sui lʼatei a wudja aye.

¹⁸Ondjelo wa Latuyalaka akatela Ngada dia mvutela Davidi dia ndi ntsho la ntutshela Latuyalaka ediakelu lʼesuswelu ka Oronana, usi Jebuse.

¹⁹Davidi akatshu, uku diui diakati Ngada lu lukumbu la Latuyalaka.

²⁰Oronana akakadimo, akenyi ondjelo wa Latuyalaka la anʼandi anei wushami. Etena keso ku Oronana aki lu nsusula epunga.

²¹Lamʼakakumi Davidi lasuki la Oronana, Oronana akedia ashu, akenyi Davidi. Ku ndi akatumbi uma lu dihuli diʼesuswelu, akatukhusama la ntundu ka Davidi, akakolama.

²²Ku Davidi akatela Oronana ati: Umbisha dihuli diaye diʼesuswelu keli ntsheli Latuyalaka ediakelu lawo, usundjadio lusundja la falanga, dia sui ne mumo uma lu wudja.

²³Oronana akakaluya Davidi diui ati: We khumemi khumʼekanga, ose dihuli ne wososa, utshi la dio uku alangaye. Enda, layukusha ngombe ne dia ulambu wa lutshumba, pusupusu dia yo ndjala kunyi, ndu epunga ne dia ulambu wa shima, layudikimo dio tshe.

²⁴Keli khumʼekanga Davidi akûkaluya diui ati: Kema, mete dimi nangaka nkisumba lusumba la falanga, ne dia haleyi nkimo engo kaye le Latuyalaka, kuyanga nambula ulambu wa lutshumba wakimi kunsumba.

²⁵Okone Davidi akawusha paunyi yaki la wutshu wa toshekele kama shamalu lʼushinga wa dihuli diako.

²⁶Ku Davidi akatshela Latuyalaka ediakelu laawo, akulambula elambu wa lutshumba, la elambu wa ki. Ndi aketi Latuyalaka, ku Latuyalaka akûkaluya diui uma lʼulungu lu dja yakahulo ladiku diʼediakelu kʼulambu wa lutshumba.

²⁷Latuyalaka akatela ondjelo dia nkaluya yombo yandi lu dihusu. Ku ndi akayikaluya.

²⁸Lʼetena keso, lamʼakenyi Davidi ati: Latuyalaka ambumbukela lu dihuli diʼesuswelu dia Oronana, usi Jebuse, ndi akalambula elambu leko.

²⁹Keli lʼetena keso, etemwelo ka dipema ka Latuyalaka kakataki Mose lʼusui wa shenga, la ediakelu kʼelambu wa lutshumba, waki lu dihuli dia ladiku dia la Ngibiyona.

³⁰Keli Davidi kumbeya ntsho la ntundu kʼediakelu kako dia ntuyanga Unyashungu, ne dia ndi akukaka yombo ya ondjelo Latuyalaka woma.