Read tetala 1 Ekondo 28 Bible Online

1 Ekondo 28 - tetala bible

1 Ekondo 28

¹Davidi akasanganya ewandji tshe wa Isariyele, ewandji a wauhu, elombodi wʼalimbi wakakambelaka khumʼekanga elimu lu elui awo lu etena kawo, elombodi wʼantu nunu nunu, wʼantu kama kama, waku waki la okende wa namaka diango tshe la wa dungalunga dia khumʼekanga, la dia nkimanyiaka ana wa khumʼekanga, elohe, apami wa wulu ndu akanga a dihunga la Jerusalema.

²Khumʼekanga Davidi akunela, akati ati: Nyumbukeli, nyu analingu, la wudja ami. Dimi lakasanguya dia mpikela oshete wa sheki wa Latuyalaka luudu[42] la mumuya ndu kihuna ka nkitshaka ekulu ka Unyashungu asu. Dimi lakamotsha diango dia mpika luudu lako.

³Keli Unyashungu akamvutela ati; We huhikela lukumbu lami luudu, ne dia we eli ondoshi wʼata, we akatshulula dikila.

⁴Latuyalaka, Unyashungu wa Isariyele, akansonola uma lʼatei a khumbu ka papa dia dimi ndjala khumʼekanga ka Isariyele pundju. Ndi akasonola Juda uwandji, ndu lʼatei a khumbu ka Juda, ndi akasonola luudu la papa, ndu lʼatei ana apami wa papa, ndi akangenangena dia mbidjami khumʼekanga ka Isariyele tshe.

⁵Uma lʼatei wa anʼami wʼapami tshe (ne dia latuyalaka akambisha ana apami efula), ndi akasonola onʼami Solodia Latuyalaka lu Isariyele.

⁶Ndi akamvutela ati: Onʼaye Solomona kayuhika luudu lami la kumbu yʼeseke ami, ne dia dimi lake onola, dia ndi ndjala onʼami, la dimi ndjala shi.

⁷Dimi layushikike diulelu diandi pundju naka ndi ayumamema uku atshindi elo, dia namaka elembe ami la adjangu ami.

⁸Okone lu ashu wa Isariyele tshe, wa ului wa Latuyalaka, ndu la ntundu ka Unyashungu asu, nyulamaki, nyuyangiayangiaki elembe tshe wa Latuyalaka, Unyashungu anyu, mbayunyukita kete yʼololo nye, mbayunyuyitshikela anʼanyu pundju.

⁹We onʼami Solomona ulimbiteli Unyashungu a sho, ukambeli ulimu lʼutema otoi la lumu tshe, ne dia Latuyalaka atukembaka etema tshe, atulimbitelaka dikanyiakanyia dia tukanyi. Naka we ayuyanga, ndi ayuyakimo dia we mbutana. Keli naka we ayoseka, ndi ayukukadja pundju.

¹⁰Eyi ololo wati: Latuyalaka ambukosonola dia we mbika luudu lʼetemwelo. Ukikitali, utshi.

¹¹Ku Davidi akasha onʼandi Solomona yediko ya mbalasa ya luudu lʼetemwelo, ya mvudu ya loko, ya waumbelu wa loko, ya mvudu ya ladiku, ya mvudu ya mbetama ya lʼetei, ndu ya dihuli dia edjaselu ka ketshi ladiku diʼufudi wʼoshete wa sheki.

¹²Ndi akawusha usatu waki lu yimba dikambu dia kumbu yʼaseke wa luudu la Latuyalaka, dia mvudu tshe ya lʼutshimba, ne dia waumbelu wa luudu la Unyashungu ndu ya waumbelu wa eshasha wakakidiama.

¹³Lu dikambu diʼelui wʼelombedi la asi Lewi, ndi akawenya elimu tshe wa lu luudu la Latuyalaka, la wa diango tshe diatuwutshaka ulimu lu luudu la Latuyalaka.

¹⁴Ndi akawusha yediko ya wutshu wa paunyi wa diango tshe diʼulimu dia paunyi, ndu yediko ya wutshu wa fesa wa diango tshe diʼelimu dia fesa.

¹⁵Ndi akawusha yediko ya wutshu wa dikitshelu dia paunyi la atala adio: wutshu wa ekitshelu la ekitshelu la wʼatala ato; ndu yediko ya wutshu wa dikitshelu diʼatala dia fesa: wutshu wa ekitshelu la ekitshelu ndu wʼatala ato, uku ulimu weʼkitshelu la ekitshelu ka tala.

¹⁶Ndi akawusha yediko ya wutshu wa mesa wa paunyi wa ma dia lenya: wutshu wa mesa la mesa; ndu wutshu wa fesa wa lu mesa wa fesa.

¹⁷Ndi akawusha yediko ya wutshu wa paunyi ka pudipudi ne dia somo, alonga la akoho; yediko ya wutshu wa paunyi ne dia alonga wʼafuku wa paunyi: wutshu wa donga la donga; ndu yediko ya wutshu wa fesa wʼalonga wʼafuku wa fesa: wutshu wa donga la donga.

¹⁸Ndi akawusha yediko ya wutshutshu wa paunyi ka pudipudi ne dia ediakelu ka ntshumba malashi. Ndi akawusha yediko ya wutshu wa paunyi, ne dia yediko ya pusupusu; ndu ya akeruba wusimbemadi ahafu awo dia nkumba oshete wa sheki wa Latuyalaka.

¹⁹Davidi akati ati: Uma lʼefundelu ka lunya la Latuyalaka mbakandambisha ewu lu akambu ane tshe, lu elimu ene tshe wa tediko tone.

²⁰Davidi akatela onʼandi Solomona ati: Ukikitali, uyali la dihunga, kutshi, tukaki woma kuyanga mbate asulu. Ne dia Unyashungu, Latuyalaka, Unyashungu ami, ayuyalaka la ye. Ndi hukukale, hukoseka, edja ndu lamʼayushila tumu tshe yʼulimu wa luudu la Latuyalaka.

²¹Enda, elui wʼelombedi la wʼasi Lewi weko ne dia ulimu tshe wa lu luudu la Unyashungu; ndu akanga a yimba tshe weli la etema wa lulangu wayuyala kame la ye lu wehu tshe wʼelimu, ndu elombodi la antu tshe wayukitanyiaka aui aye tshe.