Read tetala 1 Ekondo 5 Bible Online

1 Ekondo 5 - tetala bible

1 Ekondo 5

¹Ana apami wa Rubena, onʼa Isariyele lʼenundu (ndi aki ona lʼenundu, keli ne dia akatshi kolo lu tangi ka shi[5] mbakakimwama ukito andi wʼona enundu le ana wa Josefu onʼa Isariyele. Keli tena tshe hawutalaka Josefu lʼekondo uku ona enundu.

²Ne dia Juda akaleki ndjala untu a wuki lʼatei wʼanangu ndu uma le ndi kakatungo uwandji;[6] keli ukito wʼona lʼenundu eko la Josefu).

³Ana apami wa Rubena, onʼa Isariyele lʼenundu ane: Hanoka, Palu, Hezerona la Karami.

⁴Ana pami a Joele ane: Shemaya; Shemaya akuti Ngonga; ku Ngonga akuti Shimei.

⁵Shimei akuti Mika, Mika akuti Reaya; ku Reaya akuti Bala.

⁶Bala akuti Bera, lakatole Tilingate-Pilinesere, khumʼekanga kʼAsuriya, lu fumbi.[7] Ndi aki uwandji wa asika Rubena.

⁷Khumbu ya anangu Bera uku akawafundama lu ekondo wa nonga yawo, nye: Uwandji Jeyele, Zekariya,

⁸Bela, onʼa Azara, onʼa Shema, onʼa Joele. Bela akatasekosekoka la Aroera pulu ndu la Nebo edja ndu la Bale-Mo.

⁹Ndi akatasekosekoka pulu ndu lʼeotwelo kʼusui wa ndjali kʼEyufarate, ne dia dungalunga diawo diakayala efula lu kete ya Ngiliyade.

¹⁰Lu nshi ya Saulu, vo wakalosha asi Hangara, wakalembia. Ku vo wakatadjaseka lu mvudu yawo yʼapema lu leke lʼehutwelu tshe la la Ngiliyade.

¹¹Asika Ngada wakadjase lu welelo awo, lu kete ya Bashana, pulu ndu la Saleka.

¹²Joele aki uwandji, Shafama aki divwa diandi, Janai, la Shafata lu Bashana.

¹³Anengewo uma lu khumbu ya washewo ane: Mikaele, Meshulama, Sheba, Jorai, Jakana, Ziya la Ebere, esambeli.

¹⁴Aso weli ana wʼapami wa Abihayile, onʼa Huri, onʼa Jaroa, onʼa Ngiliyade, onʼa Mikaele, onʼa Jeshishai, onʼa Jado, onʼa Buza.

¹⁵Ahi, onʼa Bediyele, onʼa Guni, aki uwandji a khumbu ya washewo.

¹⁶Vo wakadjashi la Bashana ka la Ngiliyade ndu lu ngelu yawo ndu lʼesui tshe wa lu leke la Sharona edja ndu lʼelelu awo.

¹⁷Aso tshe wakawafundi lʼekondo wa nonga yawo lu nshi ya diulelu dia Jotama, khumʼekanga ka Juda, ndu lu nshi ya diulelu dia Jeroboama, khumʼekanga ka Isariyele.

¹⁸Apami wa wulu wa asi Rubena, wʼasi Ngada la wʼetenyi ka hendi ka diuhu dia Manase wakembaka engawu la yombo, wakukaka uta, ndu wakeyaka ndo ta, waki yediko yʼantu nunu akumi anei la nei kama esambeli la akumi asamalu.

¹⁹Vo wakalo la asi Hangara, Jeture, Nafishi, la Nodaba.

²⁰Vo wakakundja ekimanyelu lamʼakawalokaka la wo. Vo wakalembia asi Hangara ndu wane tshe waki kame la wo. Vo wakalelela Unyashungu lu ta. Ku ndi akawaukela ne dia vo wakawekama.

²¹Vo wakandi dungalunga diawo: kamelo nunu akumi atanu, ekoko nunu kama hyendi la akumi atanu, la punda nunu pendi. Vo wakandi ndu antu nunu lukama.

²²Vo wakadiaki antu efula ne dia ta diakayi uma le Unyashungu. Vo wakadjase lu ahuli awo edja ndu lamʼakawatolama lu fumbi.

²³Etenyi ka hendi ka diuhu dia Manase wakadjase lu kete yako. Vo wakayala efula, wakadjase uma la Bashanapulu ndu la Bala-Heremona, la Senire, ndu lʼUkungu a Heremona.

²⁴Ete wa khumbu ya washewo cne: Efere Ishi, Eliyele, Aziriyele, Jeremiya, Hodaviya la Jadiyele, apami wa dihunga ndu wa lukumu, ete wa khumbu ya washewo.

²⁵Vo wakahediaka Unyasnungu a washewo, wakatemolaka ditemolatemola dia wedja wi lu kete, wakataianyaka Unyashungu la ntundu kawo.

²⁶Unyashungu wa Isariyele akahashahasha utema wa Pulu,[8] khumʼekanga kʼAsuriya, utema wa Tilingate-Pilinesere,[9] khumʼekanga kʼAsuriya, ku ndi akatole asi Rubena, asi Ngada la etenyi ka hendi ka diuhu dia Manase lu fumbi. Ndi akatshu la wo utsha la Hala, Habora, Hara, ndu lʼumamu wʼokedi wa Ngozana, lene udjashiwo edja ndu elo.[10]