Read tetala 2 Ekondo 1 Bible Online

2 Ekondo 1 - tetala bible

2 Ekondo 1

¹Solomona onʼa Davidi, akashikikala lu diulelu diandi. Latuyalaka, Unyashungu andi, aki la ndi, akawete wuki otekoya.

²Solomona akateketa la Isariyele tshe, elombodi wʼantu nunu nunu, wʼantu kama kama, embadi la ewandji wʼIsariyele tshe, ete wa khumbu ya washewo.

³Okone Solomona akatshu ndi la ului tshe utsha la dihuli dia ladiku diaki la Ngibiyona. Leko kaki luudu lʼesanganelu la dipema la Unyashungu, lakatahiki Mose, ukambi wa Latuyalaka, lʼusui wa shenga.

⁴Laso ku Davidi akembe oshete wa Unyashungu uma la Kiriyate-Jearima utsha lu dihuli diakandolongoswela, ne dia ndi akuhikela luudu la dipema la Jerusalema.[1]

⁵Ediakelu kʼohotela[2] kakatshi Bezalele, onʼa Uri, onʼa Hura, kaki leko la ntundu ka etemwelo ka dipema ka Latuyalaka. Solomona la ului tshe wʼantu wakayangi Latuyalaka.

⁶Leko kakalambula Solomona Latuyalaka elambu wa lutshumba kinunu ladiku diʼediakelu kʼohotela, kaki la ntundu ka luudu lʼesanganelu la dipema.

⁷Unyashungu akene le Solomona lu do lʼutshu. Ndi akawutela ati: Onombe kene kalangaye, keli nkusha.

⁸Solomona akûkaluya diui ati: We akenyaka papa Davidi ngandji kaye ka wuki ndu ka shikaa, ndu we ambumbidja khumʼekanga lu dihuli diandi.

⁹Kakiane, we Unyashungu, Latuyalaka, ushikike daka diakayalaki papa Davidi, ne dia we ambumbidja khumʼekanga ka wudja weli efula uku ditshu dia kete.[3]

¹⁰Okone umbisha yimba la ewu dia dimi mbeya nombola wudja one. Akona ukuki nsambulaka akambu a wudja aye, wudja one wuleki wuki?

¹¹Unyashungu akatela Solomona ati: Ne dia dikambu ne mbeli lʼutema aye, osoku mbahayalombi engonyi kana ukundji, nemo kana nyumu yʼatunyi aye, kuyanga lulumbi. Keli we akalombi yimba la ewu dia we nsambulaka akambu a wudja ami, wakamakudji khumʼekanga.

¹²Dimi lambukusha yimba la ewu. Dimi layukusha ndu ongonyi, ukundji la nemo wuhu waki kundjala le nduku khumʼekanga kaki la ntundu kaye ndu wahayalaki le nduku khumʼekanga kayuyala lʼokongo aye.

¹³Ku Solomona akamo uma la dihuli dia ladiku diaki la Ngibiyona, uma la ntundu ka luudu lʼesanganelu la dipema. Ndi akatshu la Jerusalema. Ndi akatulela Isariyele.

¹⁴Solomona akasanganya pusupusu ya ta lʼambahemi wa falasa. Ndi aki la pusupusu ya ta kinunu la kama nyei, la ambahemi wa falasa nunu dikumi la pendi.[4] Ndi akayikitsha lu esumba wakandakitshaka pusupusu yandi ya ta, ndu motshi la Jerusalema lasuki la khumʼekanga.

¹⁵Khumʼekanga akete fesa la paunyi anyanya uku ave la Jerusalema,[5] ndu etamba wʼesasi uku etamba wa khumu yatulaka lʼukidi efula efula.

¹⁶Falasa ya Solomona yakayakaka uma lu kete yʼEdjibitu.[6] Asumbishi wa khumʼekanga wakayilungulaka nyimba nyimba lʼushinga wakawashikike.

¹⁷Vo wakatshokaka lʼEdjibitu, wakatusumbaka pusupusu otoi lʼushinga wa toshekele ta fesa kama shamalu la falasa otoi lʼushinga wa lukama la akumi atanu. Vo wakayelaka ndu le khumi ya dikanga tshe yʼasi Hiti ndu le khumi ya dikanga ya Suriya.