Read tetala 2 Ekondo 11 Bible Online

2 Ekondo 11 - tetala bible

2 Ekondo 11

¹Lamʼakakumi Rehoboama la Jerusalema, ndi akasanganya khumbu ka Juda la ka Bendjamina, apami nunu lukama la akumi enanei, andoshi wa ta wa wulu, dia ntolosha Isariyele dia mbakaluya lu diulelu dia Rehoboama.

²Keli diui dia Latuyalaka diakayi le Shemaya, umvutshi a Unyashungu, ati:

³Otekete la Rehoboama, onʼa Solomona, khumʼekanga ka Juda ndu lʼasi Isariyele tshe weli lu Juda la Bendjamina. Uwateli wati:

⁴Latuyalaka kata okone ati: Tanyutshokaki dia ntolosha anengenyu. Nyu tshe untu lʼuntu akaluli lakandi, ne dia uma le mi kuyi dikambu ne. Vo wakakitanyia diui dia Latuyalaka, wakakimo dia ntsho la ntolosha Jeroboama.

⁵Rehoboama akadjase la Jerusalema; akahiki esumba a wulu wa nshimbela Juda.

⁶Ndi akahiki Betelehema, Etame, Tekoa,

⁷Bete-Zura, Soko, Adulama,

⁸Ngata, Maresha, Zifu,

⁹Adorayima, Lakishi, Azeka,

¹⁰Sora, Aidjalona, la Heberona, esumba a wulu waki la Juda la la Bendjamina.

¹¹Ndi akakikitsha esumba ako, akakitsha elombodi wʼalimbi ndu akaludia waumbelu la mbu ya nde, biso, la wanu.

¹²Ndi akakitsha dingawu la akonga lu usumba lʼusumba, akawaete esumba wuleki wulu. Juda la Bendjamina waki lu leke la ndi.

¹³Elombedi la asi Lewi waki lu Isariyele tshe wakatumbi uma lu ahuli awo, wakatshu utsha le ndi.

¹⁴Asi Lewi wakatshiki etshimba awo, etenyi kawo kʼukito, wakayi uya la Juda la Jerusalema, ne dia Jeroboama la anʼandi wakashimbi dia vo ntshela Latuyalaka ulimu awo wʼolombedi.

¹⁵Ndi akayasonwela elombedi wʼalunga, a waumi wa mbudi, ndu wa tana ta ngombe takandatshi.[37]

¹⁶Wane tshe waki lʼatei a wedja tshe wʼIsariyele wakakikitsha etema awo dia nyanga Latuyalaka, Unyashungu wa Isariyele, wakayi uya la Jerusalema dia ndjulambula Latuyalaka, Unyashungu a washewo, elambu.

¹⁷Osoku mbakawakikitsha diulelu dia Juda, ndu mbakawakikitsha Rehoboaraa, onʼa Solomona, deku satu, ne dia vo wakakendakendaka deku diako satu lu mbuka ka Davidi la Solomona.

¹⁸Rehoboama akatshuki Mahalata, onʼa Jerimote, onʼa Davidi, lakanduti la Abihayili, ona umuntu a Eliyabe, onʼa Jese.

¹⁹Ndi akuti la ndi ana apami asatu: Jeushe, Shemariya la Zahama.

²⁰Lʼokongo diku ndi akatshuki Maka, ukanʼa Abisaloma, lakayuta la ndi Abidja, Atai, Ziza, la Shelomita.

²¹Rehoboama akalangaka Maka, ukanʼa Abisaloma uleki wadiendi tshe la esika andi (ne dia ndi aki la adi dikumi la enanei la esika akumi asamalu. Ndi akuti ana apami akumi ahendi la enanei, la ana amantu akumi asamalu).

²²Rehoboama akakitsha Abidja, onʼa Maka, lu dihuli dia ntundu, akawudji uwandji wʼanangu, ne dia ndi akasanguya mbudja khumʼekanga.

²³Ndi akatshi la yimba dia nyanganya anangu tshe lu wedja tshe wa Juda ndu wa Bendjamina, lu esumba a wulu tshe. Ndi akatumelaka mbu ya nde efula, akayangela wadi efula.