Read tetala 2 Ekondo 12 Bible Online

2 Ekondo 12 - tetala bible

2 Ekondo 12

¹Lamʼakashikikala diulelu dia Rehoboama, ndu lamʼakandayala la wulu, ndi akaseke olembe wa Latuyalaka ndu Isariyele tshe kame la ndi.

²Lʼeleku ka tanu ka diulelu dia Rehoboama, Shishake, khumʼekanga ka Edjibitu, akayi dia ndjolosha Jerusalema ne dia vo wakahedia Latuyalaka.

³Ndi akayi la pusupusu ya ta kinunu la kama hyendi la ambahemi wa falasa nunu akumi asamalu; ndu antu efula efula waheyama mbala wakayi la ndi uma lʼEdjibitu — asi Libiya, asi Sukima la asi Etiyopiya.

⁴Ndi akalembia esumba wa wulu wa la Juda, akakumi pulu ndu la Jerusalema.

⁵Umvutshi Shemaya akayi le Rehoboama la ewandji wa Juda wakamote la Jerusalema lu dikambu dia Shishake. Ndi akawatela ati: Latuyalaka kata ati: Nyu nyakanseke, mbamumunyoseka ndu dimi, mbamumunyukimo lʼanya wa Shishake.

⁶Ewandji wa Isariyele la khumʼekanga wakayakitshakitsha, wakati vati: Latuyalaka keli ololo.

⁷Lamʼakenyi Latuyalaka ati: Vo wambuyakitshakitsha, diui diandi diakayi le Shemaya ati: Vo wambuyakitshakitsha, okone dimi haluwadiaka. Dimi layakimanyia yema, ndu kele kami huyala le Jerusalema uma le Shishake.

⁸Keli vo wayuyala lʼokongo andi, dia vo mbeya etshikitanelu ka nkambelami la ka nkambela waulelu wa kete kina ulimu.

⁹Okone Shishake, khumʼekanga ka Edjibitu, akayi dia ndjolosha Jerusalema, akayosa diango uma lu waumbelu wa lu luudu la Latuyalaka ndu wa lu luudu la khumʼekanga, akaditole tshe. Ndi akatole ndu dingawu dia paunyi diakatatshi Solomona.[38]

¹⁰Khumʼekanga Rehoboama akatshi dingawu diʼehotela lu dihuli diadio, akadikimo lʼanya wʼelombodi wʼalami wakalamaka suku dia luudu la khumʼekanga.

¹¹Tena tshe diakatshokaka khumʼekanga utsha lu luudu la Latuyalaka, alami wakayakaka, wakayudiembaka, ku wakadikaluyaka lu luudu lʼalami.

¹²Lamʼakayakitshakitsha khumʼekanga, kele ka Latuyalaka kakamo uma le ndi. Diako mbakindi kumbudiaka ludiaka. Ndu akambu amotshi wʼololo waki lu Juda.

¹³Okone khumʼekanga Rehoboama akashikikala la Jerusalema, akulela. Rehoboama aki la deku akumi anei la otoi lamʼakandayala khumʼekanga. Ndi akulela deku dikumi la esambeli la Jerusalema, usumba wakasonola Latuyalaka uma lʼatei a wedja tshe wa Isariyele dia nkitsha lukumbu landi. Lukumbu la nyangu laki Nama, usi Amona.

¹⁴Rehoboama akatshi kolo ne dia ndi kumbidja utema andi dia nyanga Latuyalaka.

¹⁵Undi, ditshelu dia Rehoboama, dia ntundu ndu dia lʼokongo, hadiufundami lu aui wa umvutshi Shemaya la wa Ido, omenyi wʼakambu wahatayi, lʼatei wʼekondo wʼeutwelu? Ta diakayalaka nshi tshe lʼasa Rehoboama la Jeroboama.

¹⁶Rehoboama akayeli washi; wakukhunde lʼusumba wa Davidi. Ku onʼandi Abidja akulela lu dihuli diandi.