Read tetala 2 Ekondo 14 Bible Online

2 Ekondo 14 - tetala bible

2 Ekondo 14

¹Abidja akayeli washi; wakukhunde lʼusumba wa Davidi. Ku onʼandi Asa akulela lu dihuli diandi. Lu nshi yandi kete yaki ki deku dikumi.

²Asa akatshaka kene kaki ololo ndu kʼusimbwi lu ashu wa Latuyalaka, Unyashungu andi.

³Ndi akanya diakelu diʼasi wedja ndu alunga, akanyukula dimeta, akatshatsha dikishi.

⁴Ndi akatela asi Juda dia vo nyanga Latuyalaka, Unyashungu a washewo, la ntsha elembe la adjangu.

⁵Ndi akanya alunga la dimeta diakawatshela unya uma lʼesumba tshe wa Juda, ku diulelu diakayala ki lu nshi yandi.

⁶Ndi akahiki esumba wa wulu lu Juda ne dia kete yaki ki. Ndi kundjala la ta lu deku diako, ne dia Latuyalaka akawusha mumuya.

⁷Ndi akatela asi Juda ati: Tuhiki esumba ene, katedingi la peli dia kumbu, tangelu, kuki la tukingiti. Kete yeki lʼanya asu ne dia shu takayangi Latuyalaka, Unyashungu asu. Shu takuyangi, ku ndi akatusha mumuya lu beke tshe. Okone vo wakahiki, wakangone.

⁸Asa aki la ului wʼalimbi, apami nunu kama shatu uma lu wudja wa Juda wakakimelaka dingawu la akonga, ndu apami nunu kama hyendi la nunu akumi enanei uma lu wudja wa Bendjamina wakakimelaka dingawu ndu wakukaka eta. Vo tshe waki apami a wulu.

⁹Zera, usi Etiyopiya, akayi dia ndjolo la wo ndi la ului wʼalimbi, apami miliyona otoi, la pusupusu ya ta kama shatu. Ndi akavukuma pulu ndu la Maresha.

¹⁰Asa akatumbi dia ntuhumana la ndi, ku vo wakayalonge lʼenongo wa ta lʼukidi wa Zefata, lasuki la Maresha.

¹¹Asa akaleli le Latuyalaka, Unyashungu andi, ati: Latuyalaka, we weme kukuki nkimanyia one leli wodu uku ukukiye nkimanyia kanga wulu. We Latuyalaka, Unyashungu asu, utukimanyia, ne dia le ye kekamisu. Lu lukumbu laye mbambututumba dia ndjolo la ului one a wuki, Latuyalaka li, we keli Unyashungu asu, tetawoki untu nkolembia.

¹²Okone Latuyalaka akalembia asi Etiyopiya la ntundu ka Asa la kʼasi Juda; ku asi Etiyopiya wakalawo.

¹³Asa la wudja waki la ndi wakayelana la wo pulu ndu la Ngerare. Vo wakadiaki asi Etiyopiya efula efula. Okone vo kumbeya ndjalonga lu ta ntu, ne dia Latuyalaka akalembia ndi lʼului andi wʼandoshi wa ta. Ku Asa la wudja andi wakose diango dia dimbu efula.

¹⁴Vo wakalembia esumba tshe waki lasuki la Ngerare, ne dia woma a wuki wa Latuyalaka wakandi esumba ako. Vo wakalanya esumba tshe, wakose diango dia dimbu efula.

¹⁵Vo wakalanya ndu mvudu yʼapema la dungalunga, wakatole ekoko efula la kamelo. Ku vo wakakalula la Jerusalema.