Read tetala 2 Ekondo 15 Bible Online

2 Ekondo 15 - tetala bible

2 Ekondo 15

¹Nyuma ka Unyashungu akahema Azariya, onʼa Odede.

²Ku ndi akatshu dia ntuhumana la Asa, akawutela ati: Asa, we la asi Juda tshe, la asi Bendjamina nyumbukeli. Latuyalaka atuyalaka la nyu lamʼayunyuyalaka kame la ndi. Naka nyu nyayuyanga, nyu nyayutana; keli naka nyu nyavoseka, ndi ayunyoseka.

³Nshi kambi Isariyele kumbeya Unyashungu a mete, ndu kundjala la olombedi dia mbaetsha, kuyanga ndjala la elembe.

⁴Keli lamʼakawayala la ohenyohenyo, vo wakakadimo le Latuyalaka, Unyashungu wa Isariyele, wakuyangi wakawushula.

⁵Lu nshi sho nduku untu aki la lutui tshitshi, ohenyohenyo a wuki aki le asi kete tshe.

⁶Vo wakatshanelaka kolo la wudja, usumba lʼusumba ne dia Unyashungu akahenyahenya la wehu tshe wʼasui.

⁷Keli nyu, nyuyali la dihunga! Anya tawuyalaki wodu, ne dia ulimu anyu ayuyala la difutu.

⁸Lamʼakuki Asa aui aso, ndu aui wʼumvutshi Azariya, onʼa Odede, ndi akakikitala, akanya diango dia wononyi uma lu kete tshe ya Juda ndu ya Bendjamina, ndu uma lʼesumba wakandahotola lʼekungu wa Efarayima. Ndi akalongosola ediakelu ka Latuyalaka kaki la ntundu ka mbalasa ka luudu la Latuyalaka.

⁹Ndi akasanganya asi Juda tshe la asi Bendjamina, asi Efarayima, asi Manase la asi Simeyona wakadjashi lʼatei awo, ne dia asi Isariyele efula wakuyelilamʼakawenyi vati: Latuyalaka, Unyashungu andi, eko kame la ndi.

¹⁰Ku wakasangana kame la Jerusalema lu ngondo ka satu lʼeleku ka dikumi la atanu ka diulelu dia Asa.

¹¹Ku lushi lako vo wakalambula Latuyalaka ngombe kama esambeli la ekoko nunu esambeli uma lu diango dia dimbu diakawela.

¹²Vo wakadji sheki dia nyanga Latuyalaka, Unyashungu a washewo, lʼetema awo tshe ndu la nyumu yawo tshe,

¹³la dia ndjaka untu tshe la wuki kana la tshitshe, pami kana umuntu, lahetawo nyanga Latuyalaka, Unyashungu wa Isariyele.

¹⁴Vo wakatshibela Latuyalaka la diui dia wulu la waelu wʼongenongeno lʼamama ndu la pungi.

¹⁵Asi Juda tshe wakangenangena la etshibelu kako, ne dia vo wakatshibi lʼetema awo tshe, wakuyangi la saki tshe, ku wakutani. Okone Latuyalaka akawasha mumuya lu beke tshe.

¹⁶Khumʼekanga Asa akanya Maka, nyangu, uma lu dihuli dia nemo dia wadi a khumʼekanga, ne dia ndi akatshi ekishi dikambu dia Ashera. Asa akatshatsha ekishi kako, akakiete efushi, akatukitshumba lasuki la kyoko ya Kiderona.

¹⁷Keli vo kuminya alunga lu Isariyele, kuyanga mbaki utema wa Asa uluwanyi lu nshi ya lumu landi tshe.

¹⁸Ndi akela diango tshe diakatakidisha shi uya lu luudu la Unyashungu, ndu diango diakandakidia ndame, fesa, paunyi la diango diʼekila diʼulimu.

¹⁹Vo kundjala la ta ntu, edja ndu lʼeleku kʼakumi asatu la atanu ka diulelu dia Asa.