Read tetala 2 Ekondo 18 Bible Online

2 Ekondo 18 - tetala bible

2 Ekondo 18

¹Jehoshafata akayala la ongonyi efula ndu la lukumu. Ndi akayala kame la Ahaba.

²Lamʼaketi deku dimotshi, ndi akatshu utsha le Ahaba la Samariya; Ahaba akudiakela ndi la antu waki la ndi ekoko la ngombe efula. Ndi akosengola dia ndi ntsho la ndi dia ntolosha Ramota-Ngiliyade.

³Ahaba, khumʼekanga kʼIsariyele, akambula Jehoshafata, khumʼekanga ka Juda, ati: We ayulanga ntsho la mi utsha la Ramota-Ngiliyade? Jehoshafata akûkaluya diui ati: Dimi leli uku we, wudja ami weko uku wudja aye. Shu tayutsho kame la ye lu ta.

⁴Jehoshafata akasengasenga khumʼekanga kʼIsariyele ati: Utambudi diui dia Latuyalaka.

⁵Khumʼekanga kʼIsariyele akasanganya amvutshi yediko ya kama nyei. Ndi akawambula ati: Ololo shu ntsho utsha la Ramata-Ngiliyade lu ta, kana ntshiki dikambu? Vo wakûkaluya diui vati: Tshoka, ne dia Unyashungu ayukikimo lu anya aye, we khumʼekanga.

⁶Keli Jehoshafata akawumbula ati: Nduku umvutshi ukina wa Latuyalaka wekiko, wakukisu mumbula?

⁷Khumʼekanga kʼIsariyele akakaluya Jehoshafata diui ati: Untu omotshi eko, lukukisu mumbula uma le Latuyalaka, keli dimi mbuhetshaka, ne dia ndi hatoteketaka akambu wahatayi ololo lu dikambu diami, paka kolo ketu. Ndi eli Mikaya, onʼa Imila. Keli Jehoshafata akûkaluya diui ati: Khumʼekanga li, takuta osoku!

⁸Ku khumʼekanga kʼIsariyele aketi usi mbalasa omotshi, akawutela ati: Tshoka esadi, utuyi la Mikaya, onʼa Imila.

⁹Laso ku khumʼekanga kʼIsariyele la Jehoshafata, khumʼekanga ka Juda wudjashi, untu lʼuntu lu kid kandi ka diulelu, lʼeotwelo ka suku dia Samariya, wolotshi ahondo wa diulelu. Amvutshi tshe wakataka akambu wahatayi la ntundu kawo.

¹⁰Zedekiya, onʼa Kenana, akayatshulela seki ya mbulu, akati ati: Latuyalaka kata ati: La seki nye mbayuyutshutshiya asi Suriya edja ndu we ambalanya.

¹¹Amvutshi tshe wakataka akambu wahatayi pupu vati: Utshu la Ramota-Ngiliyade! We ayutuhumo lukulu lʼolo, ne dia Latuyalaka ayukikimo lu anya aye, we khumʼekanga.

¹²Dikendji diakatshu la nteta Mikaya akatuwutela ati: Ulungi, amvutshi wambuta aui wʼololo atu le khumʼekanga. Okone lambukosengasenga nti: Aui aye kawuyali uku aui awo, kututi aui wʼololo atu!

¹³Mikaya akûkaluya diui ati: Uku eli Latuyalaka la lumu! kene kayumvutela Unyashungu ami, kayumuta.

¹⁴Lamʼakandakumi la ntundu ka khumʼekanga, khumʼekanga akawumbula ati: Mikaya, ololo shu ntsho utsha la Ramota-Ngiliyade lu ta, kana ntshiki dikambu? Ndi akûkaluya diui ati: Utshu, we ayutuhumo lukulu lʼolo; vo wayukimwama lu anya aye.

¹⁵Khumʼekanga akawutela ati: Tena dingana diahumbami nkutshibia, dia we mvutelami paka aui wa mete lu lukumbu la Latuyalaka?

¹⁶Mikaya akûkaluya diui ati: Dimi lakenyi Isariyele tshe wadiangana vwaa lu ekungu, uku ekoko waha la ulami.[39] Ku Latuyalaka akati ati: Antu ane kema la khumi, vo tshe, untu lʼuntu akaluli utsha lakandi la ki.

¹⁷Khumʼekanga ka Isariyele akatela Jehoshafata ati: Dimi hakutedi nti: Ndi hatutaka akambu wahatayi ololo lu dikambu diami, paka kolo ketu?

¹⁸Mikaya akati ntu ati: Nyulungi diui dia Latuyalaka! Dimi lakenyi Latuyalaka udjashi lu kiti kandi ka diulelu, la ului tshe wʼalimbi wa lʼulungu wemadi lu lunya landi la lu pami ndu la lomoso.

¹⁹Latuyalaka akawambula ati: Akona ayutukesa Ahaba dia ndi ntsho la Ramota-Ngiliyade, dia ndi ntudiakema leko? Ku vo wakûkaluya diui, omotshi wuhu one la omotshi wuhu ukina.

²⁰Nyuma kemotshi kakemala la ntundu ka Latuyalaka, akati ati: Dimi layukesa. Latuyalaka akawumbula ati: Wuhu akona?

²¹Nyuma akûkaluya diui ati: Dimi layutsho, layutuyala nyuma ka kashi lʼenyo wʼamvutshi tshe. Ku Latuyalaka akawutela ati: We kayutukesa, ndu we kayutolembia. Kutshu, kututshi osoku.

²²Okone nyulungi, Latuyalaka akadji nyuma ka kashi lʼenyo wʼamvutshi aye aku tshe. La Latuyalaka akati kolo lu dikambu diaye.

²³Ku Zedekiya, onʼa Kenana, akasukana uya le Mikaya, akokomola luwala lu tama; akawumbula ati: Uma lendi akatumbi Nyuma ka Latuyalaka uma le mi dia ntoteketa la ye?

²⁴Mikaya akûkaluya diui ati: Enda, we ayena dikambu ne lushi luku lamʼayuyoto lu luudu la lʼetei dia ntuyash?

²⁵Khumʼekanga kʼIsariyele akati ati: Nyundi Mikaya, nyutshu la ndi le Amona, umbuledi wa lʼusumba, la le Joashi, onʼa khumʼekanga.

²⁶Nyutuwateli nyati: Khumʼekanga kata ati: Nyudji untu one lu lukanu, kanyuwushaki ma la ashi wʼasui, edja ndu lamʼayumukalula la ki.

²⁷Mikaya akati ati: Naka we ayukalula la ki, keti Latuyalaka konteketa uma le mi. Ku ndi akati ntu ati: Nyu antu tshe aso wuka diui diami so.

²⁸Ku khumʼekanga kʼIsariyele la Jehoshafata, khumʼekanga ka Juda, wakatshu utsha la Ramota-Ngiliyade.

²⁹Khumʼekanga kʼIsariyele akatela Jehoshafata ati: Dimi layuyafanya lʼuntu kʼuntu, ku layutsho lu ta. Keli we, olote ahondo aye wa khumʼekanga. Okone khumʼekanga kʼIsariyele akayafanya lʼuntu kʼuntu, ku vo wakatshu lu ta.

³⁰Khumʼekanga ka Suriya akadjangela elombodi wa pusupusu yandi ya ta ati: Tanyolokaki lʼantu wa tshitshe kuyanga a waki, kanyolo paka la khumʼekanga ka Isariyele.

³¹Lamʼakenyi elombodi wa pusupusu ya ta Jehoshafata, wakati vati: Mete, khumʼekanga ka Isariyele uku! Ku vo wakudingi dia ndo la ndi. Jehoshafata akaleli, ku Latuyalaka akukimanyia, Unyashungu akawunyiawo.

³²Lamʼakenyi elombodi wa pusupusu vati: Ndi kema khumʼekanga ka Isariyele, vo wakamo uma le ndi.

³³Keli untu omotshi akuki dikuwa wukuka, ku dio diakayoto lu sambi diʼeloto wa ta wa khumʼekanga ka Isariyele, diakuhumuya. Okone ndi akatela one lakatasukuyaka pusupusu kandi ati: Ukadimo, untundja uma lʼului a wane walo ta, ne dia dimi lambuhumo wulu.

³⁴Ta diakayala wulu lushi lako. Keli khumʼekanga akasʼmgukala lu pusupusu kandi elanedi lʼasi Suriya edja ndu dikolo. Ku ndi akavu lamʼakadji unya.