Read tetala 2 Ekondo 2 Bible Online

2 Ekondo 2 - tetala bible

2 Ekondo 2

¹Solomona akasanguya dia mpikela lukumbu la Latuyalaka luudu ndu luudu la diulelu dikambu diandi.

²Solomona akali apami nunu akumi esambeli dia membaka wetshu, apami nunu akumi enanei dia mbataka ave lu ekungu, lʼantu nunu satu la kama shamalu dia ndjala elombodi awo.

³Solomona akatumela Hurama, khumʼekanga ka Tura, diui ati: Uku akayatshela papa Davidi lamʼakayutumela etamba wʼesasi wa ndi mpika luudu landi, untsheli ndu dimi pupu.

⁴Enda, dimi luyanga mpikela Latuyalaka, Unyashungu ami, luudu, dia mbukidiyalo, dia ntshumbaka tsho yʼupumu la ntundu kandi, dia nkitshaka ma dia lenya tena tshe, ndu dia mbulambulaka elambu wa lutshumba wa pindju ndu wa dikolo, wa nshi ya mumuya wa talelu ta ngondo ndu wa nshi ya waki ya Latuyalaka, Unyashungu asu. Oso eli olembe wa pundju le Isariyele.

⁵Luudu layangami mpika layuyala wuki, ne dia Unyashungu eko wuki ndeka ditemolatemola tshe.

⁶Keli akona ukuki mbuhikela luudu[7] lamʼaheyi ulungu la ulungu wa ladiku diʼulungu nkuka le ndi? Dimi leli na, dia dimi mbuhikela luudu naka aha lu dikambu dia ntshumbaka tsho la ntundu kandi?

⁷Kakiane untumeli untu leli la yimba ya ntsha ulimu wa paunyi, wa fesa, wʼohotela, wa mbulu, wʼahondo wʼengengi, wa tilili la w edima, ndu leya ulimu wa nsanga lʼutshimo, dia ndjukamba kame lʼapami wa tokomba weli la mi lu Juda la Jerusalema, wakatasonodi papa Davidi.

⁸Kuntumeli ndu etamba wʼesasi, weoto, ndu ekulungu wa la Lebanona, ne dia dimi mbeyaka nti: Ekambi aye mbateyaka nkota etamba wa la Lebanona. Ulungi, ndu ekambi ami wayuyala kame la ekambi aye,

⁹dia ntshelami etamba efula, ne dia luudu layangami mpika layuyala wuki ndu dimena dia mamba.

¹⁰Ulungi, dimi layusha ekambi aye, wane wayokota etamba kora yʼepunga wa menge wa lususula nunu akumi ahendi, la kora nunu akumi ahendi yʼepunga wa yelela, bata ya wanu nunu akumi ahendi la bata ya iso nunu akumi ahendi.

¹¹Hurama, khumʼekanga ka Tura, akakaluya Solomona diui lu mukanda wakandutumela ati: Latuyalaka mbukaka wudja andi ngandji, mbakandakudji khumʼekanga kawo.

¹²Hurama akawutela ntu ati: Latuyalaka, Unyashungu wa Isariyele, lakatungi ulungu la kete, lakasha khumʼekanga Davidi ona pami la yimba la komi ndu luludi too la ewu, layanga mpikela Latuyalaka luudu ndu luudu la diulelu diandi, atumbwami!

¹³Dimi lambukutumela pami ka komba, luludi too la yimba, Hurama-Abi,

¹⁴ona pami a umuntu omotshi usi Dane, la shi usi Tura. Ndi eko la yimba ya ntsha elimu wa paunyi, fesa, ohotela, mbulu, ave, etamba, ahondo wʼengengi, wʼedima, wa linene wʼololo, la wa tilili. Ndi mbeyaka ndu wehu wʼelimu tshe wa losela ndu wa nsanga lʼutshimo. Ndi ayukamba kame lʼantu aye wa tokomba ndu kame lʼantu wa tokomba wa khumemi Davidi, sho.

¹⁵Kakiane we khumemi, utumeli ekambi aye epunga wa menge, epunga wa yelela, iso la wanu wakayati.

¹⁶Ku shu tayokota etamba wa la Lebanona uku ayuyuhumba. Shu tayekeleka dikanda, tayukutumelawo lu ashi a waki uku nendi utsha la Jopa, ku we ayuyuwemba uma leko utsha la Jerusalema.

¹⁷Solomona akali angendangenda tshe waki lu kete ya Isariyele uku akatawadi Davidi, shi. Vo wakatani antu nunu lukama akumi atanu la satu la kama shamalu.

¹⁸Ndi akawaose nunu kama esambeli dia membaka wetshu, nunu akumi enanei dia mbataka ave lu ekungu, la antu nunu satu la kama shamalu tupita ta mbakambiaka ulimu.