Read tetala 2 Ekondo 20 Bible Online

2 Ekondo 20 - tetala bible

2 Ekondo 20

¹Lʼokongo wʼakambu aso, asi Moaba, asi Amona la asi Meunima amotshi wakayi la ndjolosha Jehoshafata.

²Wakayutela Jehoshafata vati: Ului a wuki wʼantu uma la wedi wʼashi a waki, uma le Suriya lu ndjayi, dia ndjolo la ye. Enda, vo wambukuma la Hozazona-Tamara (ketawo vati: Ene-Ngedi).

³Jehoshafata akuki woma, akadji utema dia nyanga Latuyalaka; akatumi diui lʼatei a Juda tshe dia antu nkila ma.

⁴Asi Juda wakamote dia nomba ekimanyelu uma le Latuyalaka. Uma lu esumba tshe wa Juda mbakawayi dia ndjuyanga Latuyalaka.

⁵Jehoshafata akemala lu lusanganya lʼasi Juda la asi Jerusalema lu luudu la Latuyalaka, la ntundu ka seke diʼuyuyu;

⁶akalombe ati: Latuyalaka Unyashungu a washesu li, we kema Unyashungu leli lʼulungu? We kema umbuledi a waulelu tshe wa wedja? Wulu la khudu weko le ye wuhu waheyi untu nsemanela la ye.

⁷Unyashungu asu li, we kumbitshanya asi kete nye la ntundu ka wudja aye Isariyele? We kundjisha tukanula tʼongenyi aye Abarahama[40] pundju?

⁸Vo wakadjase loko, wakakuhikela etemwelo dikambu dia lukumbu laye, wata vati:

⁹Naka kolo kambuya le su, yombo, elumbwelu, ulandu, kana ndjala ka kasha, shu tayemala la ntundu ka luudu lone ndu la ntundu kaye, ne dia lukumbu laye leko lu luudu lone, tayukulelela lu asui asu, we ayutukela, ayutushimbela.

¹⁰Enda kakiane, asi Amona, asi Moaba la wa lʼUkungu a Seire, wakiye kumbetawo asi Isariyele mbeta lu kete yawo lamʼakawayayakaka uma lu kete ya Edjibitu,[41] keli vo waketola uma le wo kumbalanya;

¹¹enda wuhu walangawo ntutshela dia ntutshanya uma lu kete yaye yakayatusha ukito.

¹²Unyashungu asu li, we huwalumbuya? Shu kema la wulu la ntundu kʼului one a wuki wayayi dia ndjutolosha. Shu hateyi wuhu wa ntsha; ashu asu weko paka le ye.

¹³Asi Juda tshe wakemala la ntundu ka Latuyalaka kame la anʼawo wʼashasha, wadiewo la ana awo.

¹⁴Ku Nyuma ka Latuyalaka akahema Jahaziyele, onʼa Zekariya, onʼa Benaya, onʼa Jeyele, onʼa Mataniya, usi Lewi, uma lʼatei wʼasika Asafu lʼatei a lusanganya.

¹⁵Ku ndi akati ati: Nyuhukami, nyu asi Juda tshe, nyu asi Jerusalema ndu we khumʼekanga Jehoshafata, Latuyalaka kanyutela ati: Tanyukaki woma, tanyataki ului one a wuki asulu, ne dia ta ne kema dianyu, dio dieko dia Unyashungu.

¹⁶Kanyuhulo lui dia ntalosha. Enda vo wayambela lu embelu ka Zize, nyu nyayutatana la kuma kʼukidi welanedi lʼusui wa shenga wa Jeruele.

¹⁷Nyu hanyuyala la dikambu dia ndo la wo lu ta ne, kanyuyalonge, kanyemali ki. Juda la Jerusalema li, kanyendi etshungwelu kene kayunyutshungula Latuyalaka. Tanyukaki woma, tanyateki asulu, kanyutshu lui dia ntolo la wo, ne dia Latuyalaka ayuyala la nyu.[42]

¹⁸Jehoshafata akakole elundji lu kete. Asi Juda tshe la asi Jerusalema wakayakosha la kete la ntundu ka Latuyalaka wotemola.

¹⁹Asi Lewi wʼuma lʼatei wʼasika Kohata la asika Kora wakemala dia mandula Latuyalaka, Unyashungu wa Isariyele, wakadji dielu dia wulu.

²⁰La wedi a pindju, vo wakunela la kesekese, wakatshu utsha lʼusui wa shenga wa Tekoa. Jehoshafata akemala, akati ati: Nyuhukami, nyu asi Juda la asi Jerusalema, nyekami le Latuyalaka, Unyashungu anyu, mbayunyushikikala. Nyetawo amvutshi andi, mbayunyongona.

²¹Lamʼakandashili nkitshanyia la wudja, ndi akasonwela emimbi watimbelaka Latuyalaka esambu, ndu watotemolaka lʼotemwelo wuleki dimena wa shikaa, watatshu la ntundu kʼalimbi watati vati: Nyuki Latuyalaka lusaka, Ne dia ngandji kandi ka mamba katutshikalaka pundju!

²²Lu etena kakawatatela esambu la diandu, Latuyalaka akakitshiya asi Amona, asi Moaba ndu wane waki uma lʼUkungu a Seire, wakayi dia ndjolo lʼasi Juda, lalu. Ku vo wakalembiama.

²³Asi Amona la asi Moaba wakunela dia ndosha asi Ukungu a Seire, wakalembia, wakashili ushiki. Lamʼakawashili asi Seire ushiki, vo wakaloshanya vame.

²⁴Lamʼakakumi asi Juda lʼetangelu ka lʼusui, wakedia ashu lu leke lʼului wʼantu, wenyi ku edu etu wukalemi kalakala lu kete. Nduku otoi akahandi.

²⁵Lamʼakatshu Jehoshafata la wudja andi dia ntosa diango diawo, vo wakatutana ekundji efula la diango diʼushinga a wulu lʼatei wʼedu. Vo wakadiose wuhu akiwo kunkuka diemba tshe. Vo wakatshikala nshi shatu dia ntose diango dia dimbu ne dia dio diaki efula.

²⁶Lu lushi la nei vo wakasangana lʼUkidi a Beiaka, lene akawatumbula Latuyalaka. Diako mbatuwetaka dihuli diako edja ndu elo vati: Ukidi a Beraka.

²⁷Asi Juda la asi Jerusalema tshe wakakalula utsha la Jerusalema lʼongenongeno. Jehoshafata kaki lolombo lawo, ne dia Latuyalaka akaludia too lʼongenongeno lamʼakandatshungula uma le atunyi awo.

²⁸Vo wakakumi la Jerusalema ndu la luudu la Latuyalaka la lundju lʼakembi, sese, la amama.

²⁹Woma a wuki wa Unyashungu akandi waulelu tshe wa kete kina lamʼakawuki lukumu vati: Latuyalaka akalwela asi Isariyele le atunyi awo.

³⁰Okone diulelu dia Jehoshafata diaki ki, ne dia Unyashungu andi akawusha mumuya lu beke tshe.

³¹Jehoshafata akulela Juda. Ndi aki la deku akumi asatu la tanu lamʼakandayala khumʼekanga. Ndi akulela deku akumi ahendi la tanu la Jerusalema. Lukumbu la nyangu laki Azuba, onʼa Shilihi.

³²Ndi akakendakendaka lu mbuka ka Asa, shi. Ndi akatshaka kene kaki ololo lu ashu wa Latuyalaka.

³³Keli dikambu otoi, alunga kuminyama, ndu antu kumbidja etema awo lu nyanga Unyashungu a washewo.

³⁴Etsha ekina wa Jehoshafata, wa ntundu ndu wa lʼokongo, wakafundama lu aui wa Jehu, onʼa Hanani, wakawadji lu Buku dia Khumi ya dikanga ya Isariyele.

³⁵Lʼokongo wʼakambu ane, Jehoshafata, khumʼekanga ka Juda, akekesanela la Ahaziya, khumʼekanga ka Isariyele. Ahaziya akatshaka kolo efula.

³⁶Jehoshafata akekesanela la ndi dia vo ntsha mashua wa ntsho la Tarashishi. Vo wakatshi mashua ako la Eziyona-Ngebere.

³⁷Ku Eliyezere, onʼa Dodavahu, usi Maresha, akati akambu wahatayi lu dikambu dia Jehoshafata ati: Ne dia we akekesanela la Ahaziya mbambulanya Latuyalaka elimu aye. Mashua wakahandjo, okone vo kumbeya ntsho la Tarashishi.