Read tetala 2 Ekondo 21 Bible Online

2 Ekondo 21 - tetala bible

2 Ekondo 21

¹Jehoshafata akayeli washi; wakukhunde lʼusumba wa Davidi la le washi. Ku onʼandi Jehorama akulela lu dihuli diandi.

²Jehorama aki la anangu ane; ana wʼapami wa Jehoshafata: Azariya, Jehiyele, Zekariya, Azariya, Mikaele, la Shefatiya. Vo tshe waki ana wʼapami wa Jehoshafata, khumʼekanga ka Juda.

³Shewo akawasha eshasha efula: wa fesa, wa paunyi, la wa diango diʼushinga a wulu kame la esumba a wulu wa Juda. Keli ndi akasha Jehorama diulelu, ne dia ndi aki ona lʼenundu.

⁴Lamʼakakiti Jehorama diulelu dia shi, ndu lamʼaka-ndashikikala, ndi akadiaki anangu tshe la yombo ndu ewandji emotshi wa Isariyele.

⁵Jehorama aki la deku akumi asatu la pendi lamʼakandayala khumʼekanga. Ndi akulela deku enanei la Jerusalema.

⁶Ndi akakendakendaka lu mbuka ka khumi ya dikanga ya Isariyele, uku akatshaka khumbu ka Ahaba, ne dia ndi akose onʼa Ahaba wadi. Ndi akatshaka akambu wa kolo lu ashu wa Latuyalaka.

⁷Keli Latuyalaka kunanga nanya luudu la Davidi, ne dia sheki yakandatadji la Davidi, ndu daka diakandatalakanyi la ndi, dia mbushaka ndi la anʼandi tala pundju.[43]

⁸Lu nshi ya Jehorama, asi Edome wakahindwela Juda[44] wakayadjela khumʼekanga.

⁹Jehorama akatshu ndi la elombodi andi wa ta la pusupusu yandi tshe. Ndi akatunela lʼutshu, akatolo lʼasi Edome wakudingi ndi la elombodi andi wa pusupusu.

¹⁰Okone asi Edome wakahindwela asi Juda edja ndu elo; ndu Libina akahindwela pupu lʼetena kako, ne dia Jehorama akaseke Latuyalaka, Unyashungu a washi.

¹¹Jehorama akatshi ndu alunga lu ekungu wa Juda. Ndi akanganyia asi Jerusalema dia ntemola ditemolatemola, akanganyia ndu Juda.

¹²Mukanda akayi le ndi uma le umvutshi Elidja ati: Latuyalaka, Unyashungu a Davidi tsheye, kata ati: Ne dia we kondendakenda lu mbuka ya sho Jehoshafata, ndu lu mbuka ya Asa, khumʼekanga ka Juda,

¹³keli we akakendakenda lu mbuka ya khumi ya dikanga ya Isariyele, we akanganyia Juda la asi Jerusalema dia vo ntemola ditemolatemola, uku akatshaka khumbu ka Ahaba, ndu we akadiaki ananyo wakuti sho, wakakuleki ololo;

¹⁴ulungi, Latuyalaka ayusuya wudja aye, anʼaye, wadieye la diango diaye tshe sui dia wulu.

¹⁵Ndu we ayuka kandji ka wulu lu esohi aye, edja ndu esohi aye wambutumba lʼandja, uma lʼefulanelu ka kandji ka la lushi la lushi.

¹⁶Latuyalaka akatshutshiya kele kʼasi Filistiya la asi Arabiya wuladi lasuki lʼasi Etiyopiya dia vo ndosha Jehorama.

¹⁷Vo wakayi dia ndjolosha Juda, wakayilanya, wakatole diango tshe diakawatani lu luudu la khumʼekanga, anʼandi, la wadiendi. Lʼatei wa anʼandi wʼapami, paka Jehoahaza, onʼandi la kushi, kakatshikala.

¹⁸Lʼokongo wʼakambu aso, Latuyalaka akukia Jehorama kandji ka lʼesohi, wuhu wakindi kumbeya nkono.

¹⁹Kandji kako kakatafulanelaka la lushi la lushi, ku lʼekumelu kʼeleku ka hendi, esohi andi wakatumbi lʼandja uma lu wulu wa kandji kandi. Ku ndi akavu lʼatei wʼasui a wulu. Wudja andi kumbutshumbela malashi wa mbolemia, uku akawatshumbelaka washi.

²⁰Ndi aki la deku akumi asatu la pendi lamʼakandayala khumʼekanga. Ndi akulela deku enanei la Jerusalema. Ndi akavu, nduku untu aki la ulingulingu. Vo wakukhunde lʼusumba wa Davidi, keli aha lu weuku a waumbu wa khumi ya dikanga.