Read tetala 2 Ekondo 24 Bible Online

2 Ekondo 24 - tetala bible

2 Ekondo 24

¹Joashi aki la deku esambeli lamʼakandayala khumʼekanga. Ndi akulela deku akumi anei la Jerusalema. Lukumbu la nyangu laki Zibiya, usi Bere-Sheba.

²Joashi akatshaka akambu wʼusumbwi lu ashu wa Latuyalaka lu nshi ya lumu tshe yʼolombedi Jehoyada.

³Jehoyada akosela Joashi wadi ahendi. Ku ndi akuti la wo ana apami la ana amantu.

⁴Lʼokongo wʼakambu aso, Joashi akasanguya dia nongosola luudu la Latuyalaka.

⁵Ndi akasanganya elombedi la asi Lewi, akawatela ati: Kanyutshoki lʼesumba wa Juda, kanyutosaka falanga uma lu Isariyele tshe eleku lʼeleku dia nongosola luudu la Unyashungu anyu. Nyusamanya dia ntsha dikambu so. Keli asi Lewi kunsamanya.

⁶Ku khumʼekanga akatumbi untu dia nteta olombedi wa ladiku Jehoyada, akayuwumbula ati: Okoko wana wakiye kuntshutshiya asi Lewi dia vo mbosaka ulambu wakadjanga Mose, ukambi wa Latuyalaka, uma le asi Juda, asi Jerusalema la ului tshe wa Isariyele dikambu dia luudu la dipema lʼomenyi?[46]

⁷Ne dia ana wʼapami wa Ataliya, umuntu uku a kolo, wakalanya luudu la Unyashungu, wakatshela Wa-Bala elimu la diango tshe diʼulimu diʼekila diaki lu luudu la Latuyalaka.

⁸Khumʼekanga akawatela dia vo ntsha oshete, ku vo wakukitsha lʼandja a suku dia luudu la Latuyalaka.

⁹Vo wakadianganya diui lu Juda la Jerusalema dia antu mbela Latuyalaka ulambu wakadjangela Mose, ukambi a Unyashungu, Isariyele lʼusui wa shenga.

¹⁰Ewandji tshe la asi wudja tshe wakangenangena, wakakimoka elambu edja ndu vo wakakutsha kene kakawahumbi nfuta.

¹¹Lamʼakenyi asi Lewi vati: Falanga yaya efula lʼoshete, vo wakelaka oshete le elohe wa khumʼekanga. Ufundji wa khumʼekanga la olohe wa olombedi a ladiku wakanyaka falanga uma lʼoshete, ku wakakaluyaka oshete ako lu dihuli diawo. Osoku mbakawatshaka la lushi la lushi, ku wakasanganyaka falanga efula.

¹²Ku khumʼekanga la Jehoyada wakayikimoka le waku waki la okende wa nongosola luudu la Latuyalaka, wakafutaka ambiki wa mvudu yʼave; la etshudi wʼabaya, dia nongosola luudu la Latuyalaka; ndu etshudi wa mbulu la wʼohotela dia nongosola luudu la Latuyalaka.

¹³Wane waki la okende wʼulimu wakakambaka, wakatshaka ulimu la kondodi, wakalongosola luudu la Unyashungu, wakaluluwanya, wakalukikitsha.

¹⁴Lamʼakawashidiya ulimu ako, vo wakela falanga ya fesa yakatshikala la ntundu ka khumʼekanga la Jehoyada. Vo wakayitshi diango diʼelimu dia luudu la Latuyalaka, diango dia ulimu dia ujambu wa lutshumba, alonga wa malashi, diango diʼulimu dia paunyi la dia fesa. Vo wakalambulaka elambu wa lutshumba lu luudu la Latuyalaka nshi ya lumu tshe ya Jehoyada.

¹⁵Jehoyada akayala usumbi wa lukusumbi, akunduya andja, akavu. Ndi aki la deku lukama la akumi asatu lamʼakandavu.

¹⁶Wakukhunde lʼusumba wa Davidi la le khumi ya dikanga, ne dia ndi akatshaka ololo lu Isariyele lu ashu wa Unyashungu, akatshela wa lu luudu landi ololo.

¹⁷Lʼokongo wa nyoi ka Jehoyada, ewandji wa Juda wakayi, wakayukusamela khumʼekanga, ku khumʼekanga akawaukela.

¹⁸Ku vo wakaseke luudu la Latuyalaka, Unyashungu a washewo, wakatendela WaAshere la dikishi. Kele ka Latuyalaka kakayi le Juda la Jerusalema dikambu dia kolo kene kakawatshi.

¹⁹Latuyalaka akatumi amvutshi lʼatei awo dia mbaela le ndi. Keli vo kunanga nunga aui wakawuki.

²⁰Zekariya, onʼa olombedi Jehoyada, akaludiama la Nyuma ka Unyashungu. Ndi akemala la ntundu ka wudja, akawatela ati: Unyashungu kata ati: Okoko wana wambunyuhedia elembe ami, dimi Latuyalaka? Nyu hanyongona. Nyu nyakanseke, okone ndu dimi layunyoseka.

²¹Ku vo wakutshwela sheki, wakawuki ave uma lu diui dia khumʼekanga lu seke dia lukumbu dia luudu la Latuyalaka.[47]

²²Khumʼekanga Joashi kumbuho ololo wakutshelaka Jehoyada, shi Zekariya. Ku ndi akadiaki onʼandi. Zekariya akati lamʼakindi lasuki la nyoi ati: Latuyalaka endi, ndu asambuli!

²³Lʼekumelu kʼeleku, ului wʼalimbi wʼasi Suriya wakayi dia ndjolosha Joashi wakakumi la Juda ndu la Jerusalema. Vo wakadiaki ewandji tshe wa wudja lʼatei wʼantu, ku wakatumela khumʼekanga ka Damaseke diango diawo dia dimbu tshe.

²⁴Alimbi wʼasi Suriya wakayi ului wa tshitshe. Ku Latuyalaka akakimo ului a wuki wʼalimbi wʼasi Juda lʼanya awo, ne dia vo wakaseke Latuyalaka, Unyashungu washewo. Ku asi Suriya wakasambula dikambu dia Joashi.

²⁵Lamʼakawamo uma le ndi, vo wakutshiki lʼasui a wulu, ku ekambi andi wakawudjela sheki dikambu dia dikila diʼona olombedi Jehoyada. Vo wakudiaki lu tangi kandi, ku ndi akavu. Wakukhunde lʼusumba wa Davidi, keli kumbukhunde lu weuku a waumbu wa khumi ya dikanga.

²⁶Wane wakawudjela sheki ku Zabada, onʼa Shimeate, umuntu usi Amona, la Jehozabada, onʼa Shimirite, umuntu usi Moaba.

²⁷Lu dikambu diʼana andi la efula kʼakambu wahatayi wakatama dikambu diandi, la elongoswelo ka luudu la Unyashungu, enda, vo wambufundama lu Okondo wa lu Buku dia Khumi ya dikanga. Onʼandi Amaziya akulela lu dihuli diandi.