Read tetala 2 Ekondo 26 Bible Online

2 Ekondo 26 - tetala bible

2 Ekondo 26

¹Wudja tshe wa Juda wakose Uziya laki la deku dikumi la samalu, wakawudji khumʼekanga lu dihuli dia Amaziya, shi.

²Lʼokongo a lamʼakayeli khumʼekanga Uziya akahiki Elote, akakikaluya le asi Juda.

³Uziya aki ia deku dikumi la samalu lamʼanandayala khumʼekanga. Ndi akulela deku akumi atanu la pendi la Jerusalema. Lukumbu la nyangu laki Jekoliya, usi Jerusalema.

⁴Ndi akatshaka akambu wʼusimbwi lu ashu wa Latuyalaka, tshe uku akatsha Amaziya, shi.

⁵Ndi akadji utema dia nyanga Unyashungu lu nshi ya lumu ya Zekariya laki la ewu ka waenelo wa Unyashungu. Tena tshe diakandayangaka Latuyalaka, Unyashungu akongonyaka.

⁶Ndi akatshu la ntolosha asi Filistiya, akatuhandjula peli dia lukumbu la Ngata, peli dia lukumbu la Jabine, ndu peli dia lukumbu lʼAshidode. Ndi akahiki esumba lu leke lʼAshidode, ndu lu ahuli akina lʼatei wʼasi Filistiya.

⁷Unyashungu akukimanyia dia ndosha asi Filistiya, asi Arabiya wakadjashi la Nguru-Bala, ndu asi Meunima.

⁸Asi Amona wakalambulaka Uziya elambu, ku lukumbu landi lakadiangana pulu ndu lʼulelu wa Edjibitu ne dia ndi akayala wuki efula.

⁹Dikambu dikina, Uziya akahiki tangelu ladiku dia lukumbu la Jerusalema, ladiku dia Suku dia Tshuku, ladiku dia Suku diʼUkidi, ndu ladiku dia Tshuku, akadikikitsha.

¹⁰Ndi akatuhika tangelu ndu lʼusui wa shenga. Wakatshimi eshima efula, ne dia ndi aki la dungalunga efula lu ekidi ndu lu esui wa bamubamu, ndu la ekambi wa dikambo ndu ekambi wa dikambo diʼelua lu ekungu ndu lu kete yʼeteto, ne dia ndi akalangaka ulimu wa dikambo.

¹¹Uziya aki la ului wʼalimbi wakatshokaka lu ta lu tombo tawo, uku akawali ufundji Jeyele la olohe Meseya. Vo wakakitshama la tshina diʼelombwelo ka Hananiya, olombodi omotshi wʼalimbi wa khumʼekanga.

¹²Efula ka ete wa khumbu ya washewo, akanga ahunga, kaki yediko ya nunu pendi la kama shamalu.

¹³Vo mbakalombolaka andoshi wa ta wa wulu nunu kama shatu la esambeli la kama tshanu wakasukelaka khumʼekanga dia ndosha utunyi.

¹⁴Uziya akatshela vo, la alimbi tshe dingawu, akonga, fule ya ta, eloto wa ta, eta, la tuka-ave.

¹⁵Ndi akatshi mashinyi la Jerusalema, wuhu wakatungi akanga a yimba dia mbakitsha ladiku dia angelu ndu ladiku diʼatshuku wa lukumbu, dia mbukaka akuwa lʼave a waki. Lukumu landi lakadiangana etali, ne dia ndi akakundja ekimanyelu ka wulu edja ndu lamʼakandayala wuki.

¹⁶Lamʼakandayala wuki, utema andi akawumbiya dia mbutungela elanyelu. Ndi akahedia Latuyalaka, Unyashungu andi, akoto lu etemwelo ka Latuyalaka dia ntshumba malashi ladiku diʼediakelu ka malashi.

¹⁷Olombedi Azariya akuyeli, ndi la elombedi wa Latuyalaka akumi enanei, apami wa dihunga.

¹⁸Vo wakashimbi khumʼekanga Uziya; wakawutela vati: We kema la wulu wa nambula Latuyalaka malashi! Elombedi ana apami wʼArona, wakakidiama, mbeli la wulu wa nambula malashi.[49] Utumbi uma lʼetemwelo, ne dia we ambutsha kolo. Ndu dikambu ne hadiukukundjiya nemo le Latuyalaka Unyashungu.

¹⁹Uziya akuki kele, akakimela mbidika ka malashi dia ntshumba malashi. Ku lamʼakanduki elombedi kele, sudi kakatumbi lu fumu kandi la ntundu kʼelombedi lu luudu la Latuyalaka, lasuki lʼediakelu ka malashi.

²⁰Ku Azariya, olombedi wa ladiku, la elombedi ekina tshe wakawendi, wenyi ku aya la sudi lu fumu. Vo wakawutshanya uma leko esadi, ndu ndi ndame akasamanya dia ntumba, ne dia Latuyalaka akusuya.

²¹Khumʼekanga Uziya akatshikala la sudi edja ndu lushi landi la nyoi. Ndi akadjase ndame lu luudu la dieta uku kanga sudi, ne dia ndi akanyema uma lu luudu la Latuyalaka. Onʼandi Jotama, laki ote wa khumbu kandi, akasambulaka akambu wʼantu wa lu wudja.

²²Etsha ekina wa Uziya, wa ntundu ndu wa lʼokongo, umvutshi Isaya, onʼa Amoza, kakefundi.

²³Uziya akayeli washi.[50] Wakukhunde la le washi, lʼusui a waumbu wa khumi ya dikanga, ne dia vo wakati vati: Ndi eli kanga sudi. Ku onʼandi Jotama akulela lu dihuli diandi.