Read tetala 2 Ekondo 27 Bible Online

2 Ekondo 27 - tetala bible

2 Ekondo 27

¹Jotama aki la deku akumi ahendi la tanu lamʼakandayala khumʼekanga. Ndi akulela deku dikumi la samalu la Jerusalema. Lukumbu la nyangu laki Jerusha, onʼa Zadoka.

²Ndi akatshaka akambu wʼusimbwi lu ashu wa Latuyalaka, tshe uku akatshaka Uziya, shi — dikambu otoi, ndi komboto la wulu lʼetemwelo ka Latuyalaka. Keli wudja wakatetemala ntsha akambu wa kolo.

³Ndi akahiki suku dia ladiku lu luudu la Latuyalaka, akahiki dihikahika efula ladiku dia peli dia lukumbu dia Ofele.

⁴Ndi akahiki ndu esumba lu ekungu wa Juda, ndu mvudu ya khumʼekanga la tangelu lu ekunda.

⁵Ndi akalo la khumʼekanga kʼasi Amona, akalembia. Lʼeleku kako, asi Amona wakawusha talata ya fesa lukama, la kora yʼepunga wa menge nunu dikumi, ndu kora yʼepunga wa yelela nunu dikumi. Asi Amona wakulambula wuhu ako lʼeleku ka hendindu lu ka satu.

⁶Jotama akayala wuki ne dia ndi akashikike mbuka yandi la ntundu ka Latuyalaka, Unyashungu andi.

⁷Etsha ekina wa Jotama, la ata andi tshe, la akambu tshe wakandatshaka wambufundama lu Buku dia Khumi ya dikanga ya Isariyele ndu ya Juda.

⁸Ndi aki la deku akumi ahendi la tanu lamʼakandayala khumʼekanga. Ndi akulela deku dikumi la samalu la Jerusalema.

⁹Jotama akayeli washi; wakukhunde lʼusumba wa Davidi. Ku onʼandi Ahaza akulela lu dihuli diandi.