Read tetala 2 Ekondo 28 Bible Online

2 Ekondo 28 - tetala bible

2 Ekondo 28

¹Ahaza aki la deku akumi ahendi lamʼakandayala khumʼekanga. Ndi akulela deku dikumi la samalu la Jerusalema. Ndi kuntshaka akambu wʼusimbwi lu ashu wa Latuyalaka, uku akatshaka Davidi, tshendi.

²Ndi akakendakendaka lu mbuka ya khumi ya dikanga ya Isariyele. Ndi akatshi dikishi dia lolelola dikambu dia WaBala.

³Ndi akatshumbaka malashi lʼukidi wa onʼa Hinome, akatshumbi anʼandi lu dja, akayeli akambu wa wononyi wakatshaka wedja wakatatshanyaka Latuyalaka la ntundu kʼasi Isariyele.

⁴Ndi akalambulaka elambu, akatshumbaka malashi lu alunga, lu akuna ndu la tshina diʼutamba tshe wʼuyuyu.

⁵Uma lu akambu aso, mbakukimo Latuyalaka Unyashungu andi, lu anya wa khumʼekanga ka Suriya. Ku asi Suriya wakalembia, wakatole ului a wuki lu fumbi, wakatukuma la wo la Damaseke. Ahaza akakimwama ndu lʼanya wa khumʼekanga ka Isariyele lakolembia, ndu lakadiaki asikandi efula.

⁶Peka, onʼa Remaliya, akadiaki andoshi wa ta wa wulu nunu lukama la akumi ahendi lushi otoi lu Juda, ne dia vo wakaseke Latuyalaka, Unyashungu a washewo.[51]

⁷Zikiri, dihuka diʼusi Efarayima, akadiaki Maseya, onʼa khumʼekanga, Azirikame, olombodi a luudu la khumʼekanga, ndu Elekana, divwa dia khumʼekanga.

⁸Asi Isariyele wakandi anengewo asi Juda nunu kama hyendi lu fumbi, amantu, ana apami la ana wʼamantu. Vo wakambi ndu diango efula, wakatshu la wo la Samariya.

⁹Keli umvutshi omotshi wa Latuyalaka aki leko, lukumbu landi Odede. Ndi akatshu la ntuhumana la ului wʼandoshi wa ta wakayayakaka uya la Samariya; akawatela ati: Nyulungi, Latuyalaka, Unyashungu a washenyu, akuki asi Juda kele, mbakandakimolʼanya anyu. Ku nyu nyanibadiaka lu ududu wambukuma pulu ndu lʼulungu.

¹⁰Kakiane, nyu nyambusanguya ndjakitshiya asi Juda la asi Jerusalema fumbi yanyu yʼapami la tumbi yanyu yʼamantu. Keli nyu mbaha la unungu le Latuyalaka, Unyashungu anyu, uka?

¹¹Kakiane nyumbukeli, nyukaluya fumbi nye yakanyatosa uma lʼatei wʼanengenyu, ne dia kele ka mamba ka Latuyalaka keko le nyu,

¹²Ku ewandji emotshi wʼasi Efarayima, Azariya, onʼa Johanana, Berekiya, onʼa Meshilemote, Jehizikiya, onʼa Shaluma, la Amasa, onʼa Hadilai, wakahangwela wane wakayayakaka uma lu ta, vati:

¹³Tanyukumaki la fumbi ku lindu! ne dia nyu nyambuyanga ntutungela unungu le Latuyalaka, dia ntahela kolo dia munga yasu. Shu tambuyalaka la unungu, ndu kele ka mamba ka Latuyalaka keko le su, shu Isariyele.

¹⁴Ku andoshi wa ta wakatshiki fumbi la diango dia dimbu la ntundu kʼewandji la ului tsh wʼantu.

¹⁵Okone apami wakatudi kumbu wakunela, wakose fumbi wakalotsha wane tshe waki etakataka ahondo waki uma lu dimbu, wakawadji sabata, wakawasha mbu ya nde ndu dia no, wakashinula iso. Vo wakahe wane tshe wakalembe lu punda, wakatole lasuki lʼanengewo, la Jeriko, lʼusumba wʼatuku. Ku vo wakakalula la Samariya.

¹⁶Lʼetena keso, khumʼekanga Ahaza akatumela khumʼekanga kʼAsuriya diui dia ndi mbukimanyia.

¹⁷Asi Edome wakayi ntu, wakayolembia Juda, wakatole fumbi.

¹⁸Ndu asi Filistiya wakasombwela esumba wa la Shefela ndu wa la Nengebe ka Juda; wakalembia Bete-Shemeshe, Aidjalona, Ngederote, Soko kame la ngelu ya lʼokongo ato, Timina la ngelu ya lʼokongo ato, Ngimizo la ngelu yaki lʼokongo ato, ku vo wakadjase leko.

¹⁹Latuyalaka akakitshakitsha Juda lu dikambu dia Ahaza, khumʼekanga ka Isariyele lakatshi akambu wufutanu lu Juda, ndu lakatshi kolo le Latuyalaka.

²⁰Tilingate-Pilinesere, khumʼekanga kʼAsuriya, akayi le ndi, akayohenyahenya, keli kumbukimanyia.

²¹Ahaza akose diango dimotshi uma lu luudu la Latuyalaka, uma lu luudu la khumʼekanga, ndu uma lu luudu lʼewandji, akadisha khumʼekanga kʼAsuriya, keli ndi kumbukimanyia nduku yema.

²²Lamʼakahenyahenya khumʼekanga Ahaza, ndi akaleki ntsha kolo le Latuyalaka.

²³Ndi akalambula ditemolatemola dia Damaseke, diako diakolembia; akati ati: Ditemolatemola dia khumi ya dikanga ya Suriya, diakakimanyia. Diako mbayumudilambula elambu dia dio nkimanyiami. Keli dio diakayala elanyelu le ndi ndu le Isariyele tshe.

²⁴Ahaza akasanganya diango diʼekila diʼulimu dia luudu la Unyashungu, akahimbuhimbuya diango tshe diʼekila diʼulimu dia luudu la Unyashungu, akadihi kuki ya luudu la Latuyalaka. Ndi akayatshela diakelu lu atshuku tshe wa Jerusalema.

²⁵Ndi akatshi alunga lu esumba tshe wa Juda dia ntshumbela ditemolatemola malashi! Okone ndi akukia Latuyalaka, Unyashungu a washi, kele.

²⁶Enda, etsha andi ekina la akambu tshe wakandatshaka, wa ntundu ndu wa lʼokongo, wambufundama lu Buku dia Khumi ya dikanga ya Juda ndu ya Isar yele.

²⁷Ahaza akayeli washi.[52] Wakukhunde lʼusumba wa Jerusalema, keli kumoukhunde lu waumbu wa khumi ya dikanga ya Isariyele. Ku onʼandi Hezekiya akulela lu dihuli diandi.