Read tetala 2 Ekondo 29 Bible Online

2 Ekondo 29 - tetala bible

2 Ekondo 29

¹Hezekiya akayala khumʼekanga lamʼakindi la deku akumi ahendi la tanu. Ndi akulela deku akumi ahendi la divwa la Jerusalema. Lukumbu la nyangu laki Abidja, onʼa Zekariya.

²Ndi akatshaka akambu wʼusimbwi lu ashu wa Latuyalaka, tshe uku akatshaka Davidi, tshendi.

³Lʼeleku ka ntundu ka diulelu diandi, lu ngondo ka ntundu, ndi akadihula kuki ya luudu la Latuyalaka, ku ndi akayilongosola.

⁴Ndi aketi elombedi, la asi Lewi, akasanganya lu dihuli diʼutsha lʼehutwelu.

⁵Ndi akawatela ati: Nyu asi Lewi, nyumbukeli! Kakiane, nyuyakidia, nyukidia luudu la Latuyalaka, Unyashungu a washenyu, nyutundja kene tshe keli mindu uma lʼetemwelo.

⁶Washesu wakahedia Latuyalaka, Unyashungu asu, wakatshi akambu wa kolo lu ashu andi, wakbseke. Vo wakanya dundji diawo diaha vo menda luudu la Latuyalaka, wakaluki okongo.

⁷Vo wakadihi kuki ya mbalasa, wakadimi atala, ndu vo kunambula Unyashungu wa Isariyele malashi, kuyanga ulambu wa lutshumba lu dihuli diʼekila.

⁸Diako mbakayala kele ka Latuyalaka lu Juda ndu la Jerusalema. Ndi akakimo lʼukandukandu, lʼutshutshumalu, la lu tola, uku wenanyu lu ashu anyu.

⁹Uma lu dikambu so, mbakadiakema washesu, ndu mbeli anʼasu wʼapami, anʼasu wʼamantu la wadiesu lu fumbi.

¹⁰Okone dimi la esangweyu ka mbidja la Latuyalaka, Unyashungu wa Isariyele, sheki, ne dia kele kandi ka mamba kakadimo uma le su.

¹¹Kakiane, anʼami nyukimo ndjala la wendjudi, ne dia nyu nyakasonwama le Latuyalaka, dia nyu memalaka la ntundu kandi, dia ndjala ekambi andi, ndu dia mbulambu-laka malashi.

¹²Ku asi Lewi wakunela: Mahata, onʼa Amasai, Joele, onʼa Azariya, uma lʼatei wʼasika Kohata; la uma lʼatei wʼasika Merari, Kisha, onʼa Abidi, Azariya, onʼa Jehalelele; uma lʼatei wʼasika Ngereshona, Joa, onʼa Zima, Edena, onʼa Joa;

¹³uma lʼatei wʼasika Elizafana, Shimiri la Jeuele; uma lʼatei wʼasika Asafu, Zekariya la Mataniya;

¹⁴uma lʼatei wʼasika Hemana, Jehuele la Shimei; la uma lʼatei wʼasika Jedutuna, Shemaya, la Uziyele.

¹⁵Vo wakasanganya anengewo, wakayakidia, wakoto uku akadjanga khumʼekanga, uma lʼaui wa Latuyalaka, dia mbedia luudu la Latuyalaka.

¹⁶Elombedi wakoto lʼetei a luudu la Latuyalaka dia ledia. Vo wakatundja mindu tshe yakawatani lʼetemwelo ka Latuyalaka, wakatuyikitsha lu seke dia lukumbu dia luudu la Latuyalaka. Asi Lewi wakayembe lʼandja utsha lu kyoko ya Kidirona.

¹⁷Vo wakatatela nkidia luudu lu lushi la ntundu la ngondo ka ntundu. Ku lu lushi lʼenanei, vo wakakumi lu mbalasa. Vo wakakidia luudu la Latuyalaka nshi enanei. Lu lushi la dikumi lʼesamalu, vo wakashidiya.

¹⁸Ku vo wakatshu le khumʼekanga Hezekiya; wakatuwutela vati: Shu tambushidiya mbedia luudu la Latuyalaka tshe, ediakelu kʼelambu wa lutshumba la diango diato tshe, mesa watuwukitshaka ma dia lenya la diango diawo diʼulimu tshe.

¹⁹Tambolongosola ndu diango tshe diʼulimu, diakakadja khumʼekanga Ahaza lu nshi ya diulelu diandi lamʼakandatshi kolo, ndu tambudikidia. Ulungi, dio dieko la ntundu kʼediakelu ka Latuyalaka.

²⁰Khumʼekanga Hezekiya aketo kʼolomo la pindju, akasanganya ewandji wʼusumba, ku wakatshu utsha la luudu la Latuyalaka.

²¹Vo wakela esongo wa ngombe esambeli, waumi wʼekoko esambeli, esongo wʼekoko esambeli, la weumbi wa mbudi esambeli, ulambu wa kolo dikambu dia diulelu, dikambu diʼetemwelo ndu dikambu dia Juda. Khumʼekanga akatela elombedi, ana wa Arona, dia vo mbelambula lʼediakelu ka Latuyalaka.

²²Ku vo wakadiaki esongo wa ngombe, elombedi wakose dikila, wakadimonge lʼediakelu. Vo wakadiaki ekoko a waumi, wakamonge dikila lʼediakelu. Vo wakadiaki ndu esongo wʼekoko, wakamonge dikila lʼediakelu.

²³Vo wakela weumbi wa mbudi ulambu wa kolo la ntundu ka khumʼekanga la ului wʼantu, ku vo wakawahe anya.

²⁴Elombedi wakediaki, wakatshi ulambu wa kolo la dikila diawo lʼediakelu, dia ntshela Isariyele tshe ulambu wa kolo, ne dia khumʼekanga akadjanga dia ulambu wa lutshumba la ulambu wa kolo ndjala dikambu dia Isariyele tshe.

²⁵Ndi akadji asi Lewi lu luudu la Latuyalaka, kame la ekokoloko, akembi, la sese, uku akadjanga Davidi, Ngada, omenyi wʼakambu wahatayi wa khumʼekanga, la umvutshi Natana, ne dia didjangu diako diaki uma le Latuyalaka lʼenyo wʼamvutshi.

²⁶Asi Lewi wakemala wukimedi dihumahuma dia Davidi ndu elombedi wukimedi pungi.

²⁷Hezekiya akadjanga dia nambula ulambu wa lutshumba lʼediakelu. Lamʼakawatatela nambula ulambu wa lutshumba, wakatatela ndu usambu wa Latuyalaka, kame la pungi la dihumahuma dia Davidi, khumʼekanga ka Isariyele.

²⁸Ku ului tshe wʼantu wakatemola Latuyalaka, amimbi wakimbi usambu la amvudi wa pungi wakadi pungi. Vo tshe wakatshaka osoku edja ndu lamʼakashili ulambu wa lutshumba.

²⁹Lamʼakawashidiya nambula ulambu, khumʼekanga la wane tshe waki la ndi wakakolama, wakatemola Latuyalaka.

³⁰Ku khumʼekanga Hezekiya la ewandji wakadjangela asi Lewi dia mimbela Latuyalaka esambu wa diandu lu aui wa Davidi la wa Asafu, omenyi wʼakambu wahatayi. Vo wakimbi esambu wa diandu lʼongenongeno, wakakole ete, wakatemola Latuyalaka.

³¹Hezekiya akatela antu ati: Kakiane, nyu nyambuyakidia le Latuyalaka, nyusukani, nyela elambu la eshasha wʼeukelu ka lusaka uya lu luudu la Latuyalaka. Ului wʼantu wakela nyama yʼelambu la elambu wʼeukelu ka lusaka. Wane tshe wakalangi lʼetema awo, wakela elambu wa lutshumba.

³²Efula kʼelambu wa lutshumba wakela ului wʼantu waki esongo wa ngombe akumi esambeli, ekoko a waumi lukama, ndu esongo wʼekoko kama hyendi. Eso tshe waki ulambu wa lutshumba le Latuyalaka.

³³Vo wakakimo ndu ngombe kama shamalu, la ekoko nunu satu.

³⁴Keli elombedi waki ului wa tshitshe, okone vo kumbeya mbuwula nyama tshe yʼelambu wa lutshumba. Ku anengewo asi Lewi waka kimanyia edja ndu lamʼakayakidia elombedi ekina, edja ndu lamʼakashili ulimu, ne dia asi Lewi waki la pusa lʼetema dia ndjakidia uleki elombedi.

³⁵Elambu wa lutshumba waki efula, ndu wata wa elambu wa ki, la elambu wa lutela ne dia elambu wa lutshumba. Osoku mbakawaluwanya ulimu wa lu luudu la Latuyalaka.

³⁶Hezekiya la antu tshe wakangenangena ne dia Unyashungu akatshela antu ololo, ne dia dikambu so diakatshama shashimuya.