Read tetala 2 Ekondo 30 Bible Online

2 Ekondo 30 - tetala bible

2 Ekondo 30

¹Hezekiya akatumi akendji lu Isariyele tshe ndu la Juda, akafundela ndu asi Efarayima la asi Manase mikanda dia vo ndja uya la luudu la Latuyalaka la Jerusalema, dia ndjolemia lushi la wuki lʼelekanelu le Latuyalaka, Unyashungu wa Isariyele.

²Khumʼekanga, ewandji andi, la ului tshe wa la Jerusalema, wakasanguya dia ndjolemia lushi la wuki lʼelekanelu lu ngondo ka hendi,

³ne dia vo kumbeya nemia lushi la wuki lʼelekanelu lʼetena kalo, ne dia laso ku elombedi efula watayakidia ndu antu watasangana la Jerusalema[53]

⁴la dikambu so diaki ololo lu ashu wa khumʼekanga la wʼului tshe wʼantu.

⁵Okone vo wakashikike didjangu dia nyanganya lukumu lu Isariyele tshe, uma la Bere-Sheba pulu ndu la Dane, dia vo tshe ndja la Jerusalema; dia ndjolemia lushi la wuki lʼelekanelu le Latuyalaka, Unyashungu wa Isariyele, ne dia ului wʼantu konemiaka lushi lako la wuki wuhu wakafundama.

⁶Okone akendji wakakindula lu Isariyele la Juda tshe la mikanda uma le khumʼekanga la ewandji andi waki la olembe wa khumʼekanga lako ati: Nyu asi Isariyele, nyukaluli le Latuyalaka, Unyashungu wʼAbarahama, wa Isaka, la Isariyele dia ndi nkalula le nyu, nyu wane wakahandi uma lʼanya wa khumi ya dikanga yʼasi Asuriya.

⁷Tanyuyalaki uku washenyu la anengenyu wakahediaka Latuyalaka, Unyashungu a washewo, edja ndu ndi akakimo utsha lʼelanyelu uku wenanyu.

⁸Tanyuyalaki la ete wulu, uku aki washenyu. Nyuyakimo le Latuyalaka, nyoto lu etemwelo kandi kakandakidia dia ndjala pundju. Nyotemolaki Latuyalaka, Unyashungu anyu, dia kele kandi ka mamba mumo uma le nyu.

⁹Naka nyu nyayukalula le Latuyalaka, anengenyu la anʼanyu wayukama ketshi le waku wakatole lu fumbi. Ku vo wayukalula lu kete nye ne dia Latuyalaka, Unyashungu anyu, eli kanga ngandji ka mamba la ketshi. Ndi hunya elundji uma le nyu, naka nyu nyayukalula le ndi.

¹⁰Akendji aku waked lʼusumba lʼusumba lu kete yʼEfarayima la Manase pulu ndu la Zebuluna. Antu wakawaole, wakasoke.

¹¹Keli antu amotshi wʼasi Ashere, wʼasi Manase la wʼasi Zebuluna wakayakitshakitsha, wakayi la Jerusalema.

¹²Lunya la Unyashungu lakalombola Juda dia vo ndjela olembe wa khumʼekanga la ewandji uma lu diui dia Latuyalaka lʼutema otoi.

¹³Antu efula wakasangana la Jerusalema dia nemia lushi la wuki la ma diaha la edya lu ngondo ka hendi. Vo waki ului a wuki.

¹⁴Vo wakunela, wakanya diakelu diaki la Jerusalema, wakanya ndu diakelu tshe diakawalambulaka malashi, wakatudikadja lu kyoko ya Kidirona.

¹⁵Vo wakadiaki esongo wʼekoko ne dia lushi la wuki lʼelekanelu, lu lushi la dikumi lʼanei la ngondo ka hendi. Elombedi la asi Lewi wakalombo la sonyi, wakayakidia, wakela elambu wa lutshumba uya lu luudu la Latuyalaka.

¹⁶Vo wakemala lu ahuli awo, uku olembe wa Mose, umvutshi a Unyashungu. Elombedi wakamonge dikila diakawalungula uma lʼanya wʼasi Lewi.

¹⁷Laso ku antu efula lʼatei wʼului watakidiama. Okone asi Lewi waki la okende wa ndjakela waku tshe waha pudipudi esongo wʼekoko ne dia dambu diʼelekanelu, dia mbakidia le Latuyalaka;

¹⁸ne dia ului a wuki wʼantu, asi Efarayima, asi Manase, asi Isakara, ndu asi Zebuluna, kundjaedia. Vo wakali ma diʼelekanelu wuhu waki nkufundama, ne dia Hezekiya akalombela Unyashungu ati: Latuyalaka leli ololo, adimanyia untu tshe,

¹⁹lambudja utema dia nyanga Unyashungu Latuyalaka, Unyashungu a washi, kuyanga ndi kundjaedia uku elembe wʼekila wa edielo.

²⁰Latuyalaka akukela Hezekiya, akadimanyia wudja.

²¹Okone asi Isariyele waki la Jerusalema, wakalemia lushi la wuki la ma diaha la edya lʼongenongeno a wuki nshi esambeli. Asi Lewi la elombedi wakimbelaka Latuyalaka esambu ndu wakahelenganyaka dihumahuma la lushi la lushi.

²²Hezekiya akakikitsha etema wʼasi Lewi tshe waki la ewu ka wuki ka ntsha ulimu wa Latuyalaka. Vo wakalemia lushi la wuki yediko ya nshi esambeli, wakalambula elambu wa ki wandula Latuyalaka, Unyashungu a washewo.

²³Ului tshe wʼantu wakasangi lulimi dia nemia lushi lako la wuki nshi esambeli kina. Ku vo wakalolemia lʼongenongeno nshi esambeli yako.

²⁴Hezekiya, khumʼekanga ka Juda akasha ului wʼantu esongo wa ngombe kinunu la ekoko nunu esambeli dia ndjala elambu. Ku ewandji wakasha ului wʼantu esongo wa ngombe kinunu, la ekoko nunu dikumi. Elombedi efula wakayakidia.

²⁵Ului tshe wʼasi Juda, elombedi, asi Lewi, ului tshe wakayi uma la Isariyele ndu angendangenda wakayi uma lu kete ya Isariyele kana wakadjashi la Juda, wakangenangena.

²⁶Okone ongenongeno a wuki aki la Jerusalema, umaka nshi ya Solomona, onʼa Davidi, khumʼekanga ka Isariyele, ongenongeno a wuhu oso watayala la Jerusalema.

²⁷Ku elombedi, la asi Lewi wakunela, wakatshokola wudja. Diui diawo diakukema, la dombelo diawo diakakumi pulu lʼulungu, lu edjaselu kʼekila ka lʼulungu.