Read tetala 2 Ekondo 31 Bible Online

2 Ekondo 31 - tetala bible

2 Ekondo 31

¹Lamʼakashili dikambu diako, asi Isariyele tshe waki leko wakatshu lu esumba wa Juda, wakatunyukula dimeta, wakatshatsha dikishi; wakalanya alunga la diakelu lu Juda tshe la Bendjamina, lu Efarayima ndu lu Manase, wakadilanya tshe. Ku asi Isariyele tshe wakakalula lu esumba awo untu lʼuntu lakandi.

²Hezekiya akakitsha elombedi wʼasi Lewi lu elui awo, untu lʼuntu uku ulimu andi dia nambulaka elambu wa lutshumba, elambu wa ki, dia mbuka Latuyalaka lusaka, la dia mbandula lu asuku wa pangu kandi.

³Khumʼekanga akakimo etenyi ka diango diandi, dia ndjala elambu wa lutshumba wa pindju ndu wa dikolo, elambu wa lutshumba wa nshi ya mumuya, wa talelu ta ngondo ndu wa nshi ya waki yakawashikike, uku akafundama elembe wa Latuyalaka.[54]

⁴Ndi akatela antu wakadjashi la Jerusalema dia vo mbisha elombedi la asi Lewi etenyi, dia vo mbeya nama elembe wa Latuyalaka la kolamelu.

⁵Lamʼakadiangana lukumu, asi Isariyele wakakimo diango efula: elonga wʼepunga, wa wanu, wa iso, wʼusanga ndu wa diango tshe diʼuma lu dikambo. Wakela ndu etenyi ka dikumi efula uma lu diango diawo tshe.[55]

⁶Asi Isariyele la asi Juda wakadjashi lʼesumba wa Juda, wakela etenyi ka dikumi ka ngombe, kʼekoko, ndu etenyi ka dikumi ka diango diʼekila diakakidiama le Latuyalaka, Unyashungu wakayikitsha lu elui elui.

⁷Wakatatela yimotsha lu ngondo ka satu, wakashidiya lu ngondo kʼesambeli.

⁸Hezekiya la ewandji wakayi dia ndjenda elui ako, ku vo wakatumbula Latuyalaka la wudja andi Isariyele.

⁹Hezekiya akambula elombedi la asi Lewi lu dikambu dia elui ako.

¹⁰Olombedi a ladiku Azariya, uma lu khumbu ka Zadoka, akûkaluya diui ati: Uma lamʼakawatatela mbela elambu luluudu la Latuyalaka, shu takali, takaluti, takatshiki efula, ne dia Latuyalaka akatshokola wudja andi. Lanʼeli ului a wuki wa ene wambutshikala.

¹¹Hezekiya akatela antu dia vo nongosola mvudu ya lʼatei a luudu la Latuyalaka, ku vo wakayilongosola.

¹²Vo wakela elambu, tenyi dia dikumi, la diango diʼekila la kolamelu. Konaniya aki ulami a diango, ku Shimei, onangu, kakahonyi la ndi.

¹³Khumʼekanga Hezekiya la Azariya, olombodi wa luudu la Unyashungu, wakadji Jehiyele, Azariya, Nahata, Asahele, Jerimote, Jozabada, Eliyele, Ismakiya, Mahata la Benaya lʼulimu la tshina diʼelombwelo ka Konaniya la Shimei, onangu.

¹⁴Kore, onʼa Imila, usi Lewi, ulami wa suku dia lu leke lʼehutwelu, aki ulami wa eshasha wa lulangu wakawakimoka le Unyashungu, dia nkahanya elambu wa Latuyalaka la diango diuleki ekila.

¹⁵Edena, Miniyamina, Jeshua, Shemaya, Amariya la Shekaniya wa lu esumba wʼelombedi waki la tshina diʼelombelo kandi, dia vo nkahanyaka anengewo wa dikumanyi ndu wʼakenda diango pupu uku elui awo,

¹⁶tshikima le apami wakafundama uma lʼeutwelu kawo, waya la deku satu pulu ndu ladiku; le wane watotoka lu luudu la Latuyalaka la lushi la lushi, dia ntsha ulimu awo, uku okendawo la elui awo.

¹⁷Okondo wʼelombedi akafundama uku khumbu ya washewo. Asi Lewi waki la deku akumi ahpndi pulu la diku wakafundama uku okende awo lu elui awo.

¹⁸Elui tshe wʼelombedi wakafundama kame la anʼawo wʼashashi tshe, wadiewo, anʼawo wʼapami la wʼamantu, ne dia vo wakayakidia lʼulimu la kolamelu.

¹⁹Lu dikambu diʼasika Arona, elombedi wakadjase lʼesui wa lʼetshimba, wakasonola apami wakawafundi kumbu dia nkahanya diango le apami tshe lʼatei wʼelombedi ndu le asi Lewi tshe wakafundama kumbu uku autwelu awo.

²⁰Osoku mbakatshi Hezekiya lu Juda tshe. Ndi akatshaka akambu wʼololo, akambu wʼusimbwi, la akambu wa kolamelu la ntundu ka Latuyalaka, Unyashungu andi.

²¹Ndi akatshaka ulimu tshe wakandatatela lu dikambu dia luudu la Unyashungu lʼutema otoi, dikambu dia elembe la adjangu, ndu dikambu dia nyanga Unyashungu andi; ku ndi akangone.