Read tetala 2 Ekondo 32 Bible Online

2 Ekondo 32 - tetala bible

2 Ekondo 32

¹Lʼokongo wʼakambu aso la etsha eso wa kolamelu, Senakeribe, khumʼekanga kʼAsuriya, akayi, akoto lu Juda, akadingi esumba wa wulu, la esangweyu ka mbeosa.

²Lamʼakenyi Hezekiya ati: Senakeribe ambuya, ndu ndi ambusanguya ndosha Jerusalema,

³ndi akadji la ewandji andi la antu andi wa wulu sheki, dia ndjiha teko diʼashi diaki lʼandja wʼusumba, ku vo wakukimanyia.

⁴Ului a wuki wʼantu wakasangana, ku vo wakatedia teko tshe, wakaki kyoko yakakelaka lʼatei a wudja; wakambwana vati: Okoko wana wukuki khumi ya dikanga yʼasi Asuriya ndjutanaka ashi efula lamʼayuwukuma?

⁵Hezekiya akakikitsha utema, akalongosola peli dia lukumbu diakalana, akahiki tangelu ladiku dia to, akakikitsha Milo lʼusumba wa Davidi; akatshi dihumo dia ta la dingawu efula.

⁶Ndi akadji elombodi wa ta lu elui wʼantu, wakasanganya lasuki la dihuli dia hwe lʼeotwelo kʼusumba; akasambi ati:

⁷Nyukikitali, nyuyali la dihunga, tanyateki asulu lu dikambu dia khumʼekanga kʼasi Asuriya, ndu dia ului tshe weli kame la ndi, ne dia one leli la su, ndeka waku weli la ndi.

⁸Lunya lʼuntu mbeli kame la ndi, keli Latuyalaka, Unyashungu asu, eko kame la su dia ntukimanyia la ntolwela ata asu. Ku wudja wakekama aui wa Hezekiya, khumʼekanga ka Juda.

⁹Lʼokongo diku Senakeribe, khumʼekanga kʼAsuriya, akatumi ekambi andi la Jerusalema, lamʼakindi lu nyinga Lakishi kame lʼandoshi andi wa ta tshe, le Hezekiya, khumʼekanga ka Juda, ndu le asi Juda tshe waki la Jerusalema, ati:

¹⁰Senakeribe, khumʼekanga kʼAsuriya, kanyumbula ati: Lu na ekaminyu, dia nyu ntshikala la Jerusalema?

¹¹Aha Hezekiya nkesa mbanyukesandi, dia nyu mvo la ndjala ka kasha la pusa ka ashi, lamʼatandi ati: Latuyalaka, Unyashungu asu, ayututshungula uma lʼanya wa khumʼekanga kʼAsuriya?

¹²Aha Hezekiya ako kakanya alunga la diakelu, ndu kakadjangela Juda la Jerusalema ati: Kanyotemolaki la ntundu kʼediakelu otoi, ndu kanyulambulaki elambu wa malashi loko?

¹³Undi, nyu hanyeyi kene kakatatshela, dimi la wapapa, wedja tshe wa kete kina? Ditemolatemola dia wedja wa kete yako yaki la wulu wa mbashimbela uma lʼanya asu uka?

¹⁴Lʼatei a ditemolatemola tshe dia wedja eso wakashili wapapa ushiki, etemolatemola kakona kakeyi ntshungula wudja ato uma lʼanya ami, wayeya Unyashungu anyu nyutshungula uma lʼanya ami?

¹⁵Okone tanyetawoki Hezekiya nyukesa kana nyutshutshiya lu dikambu ne, tanyuwetawoki. Nduku etemolatemola ka wudja kana diulelu kaki la wulu wa nshimbela wudja ato uma lʼanya ami, kana uma lu anya a wapapa, keti Unyashungu anyu kayunyutshungula uma lʼanya ami!

¹⁶Ekambi wa Senakeribe wakateketa ndu aui akina wa monyola Latuyalaka Unyashungu la ukambi andi Hezekiya.

¹⁷Ndi akatumi mukanda la aui wa ntenga Latuyalaka, Unyashungu wa Isariyele, awonyola ati: Uku aki ditemolatemola dia wedja ekina kumbeya nshimbela wedja awo, osoku mbahushimbela Unyashungu wa Isariyele wudja andi uma lʼanya ami.

¹⁸Ekambi wa Senakeribe wakahangohango lʼaui a wulu lʼeteketa wʼasi Juda, ne dia mbata asi Jerusalema wakadjashi ladiku diʼeheli asulu la mbautsha woma, dia vo mbeya nembia usumba.

¹⁹Vo wakateketa dia Unyashungu wa Jerusalema uku ditemolatemola dia wedja wa la kete, diakatshama lʼanya wʼantu.

²⁰Khumʼekanga Hezekiya la umvutshi Isaya, onʼa Amoza, wakalombe lu dikambu ne, wakaleli utsha lʼulungu.

²¹Ku Latuyalaka akatumi ondjelo, wakayudiaka apami wʼahunga tshe, ewandji, la elombodi waki lu pangu ka khumʼekanga kʼAsuriya. Ku ndi akakalula la sonyi utsha lu kete yandi. Lamʼakandatoto lu luudu la etemolatemola kandi, anʼandi wakanduti wakudiaki la yombo.

²²Osoku mbakashimbela Latuyalaka Hezekiya la asi Jerusalema uma lʼanya wa Senakeribe, khumʼekanga kʼAsuriya, ndu uma lʼanya wʼakina tshe. Ndi akalami uma le waku tshe wakadingi.

²³Antu efula wakela eshasha le Latuyalaka la Jerusalema ndu diango diʼushinga a wulu le Hezekiya, khumʼekanga ka Juda. Uma lʼetena kako, ndi akayala la lukumu lu ashu a wedja tshe.

²⁴Etena keso Hezekiya akuki kandji ka nyoi. Ndi akalombe Latuyalaka, ku Latuyalaka akûkaluya diui, akawusha djimbitelu.

²⁵Keli Hezekiya kunkalula diui lu ololo wakandalungula, ne dia ndi akayambiya lʼutema, diako mbakayi kele ka Latuyalaka le ndi, lu Juda ndu lu Jerusalema.

²⁶Hezekiya akayakitshakitsha ndi la asi Jerusalema uma lu ndjambiya kandi. Okone kele ka Latuyalaka kunkuma le wo lamʼaki Hezekiya la lumu.

²⁷Hezekiya aki la ukundji efula ndu la lukumu; akayatshela waumbelu wa fesa, wa paunyi, wʼave wʼushinga a wulu, wa diango diʼupumu, wa dingawu ndu wa wehu tshe wa diango diʼulimu diʼololo;

²⁸waumbelu wʼepunga, wa wanu ndu wa iso, mvudu ya ngombe la ekutu wʼekoko.

²⁹Ndi akavahikela esumba, aki la nyimba yʼekoko la ya ngombe efula, ne dia Unyashungu akawusha ekundji efula.

³⁰Hezekiya ako kakaki tokoko ta Ngihona, aketsha ashi ato lʼuhulula lu leke lʼedjelu la usumba wa Davidi. Hezekiya akangone lu elimu andi tshe.

³¹Lʼetena kako, lamʼakatumi ewandji wa Babilona akendji le ndi dia ndjuwutela dikambu dia man ja diakayala lu kete, Unyashungu akukimo dia mbedika, ne aia mbeya kene tshe kaki lʼutema andi.

³²Enda, etsha ekina wa Hezekiya la akambu andi wʼololo wambufundama lu enelo ka umvutshi Isaya, onʼa Amoza, lu Buku dia Khumi ya dikanga ya Juda ndu ya Isariyele.

³³Hezekiya akayeli washi; wakukhunde lʼatei a waumbu wʼana wa Davidi, lu leke la ladiku. Juda tshe la asi Jerusalema wakolemia lu nyoi kandi. Onʼandi Manase akulela lu dihuli diandi.