Read tetala 2 Ekondo 33 Bible Online

2 Ekondo 33 - tetala bible

2 Ekondo 33

¹Manase aki la deku dikumi la pendi lamʼakandayala khumʼekanga. Ndi akulela deku akumi atanu la tanu la Jerusalema.

²Ndi akatshaka kene kaki kolo lu ashu wa Latuyalaka,[56] akayeli akambu wa wononyi wa wedja wakatatshanyaka Latuyalaka la ntundu kʼasi Isariyele.

³Ndi akalongosola alunga wakalanya Hezekiya, shi. Ndi akatshi diakelu dia WaBala, akatshi dikishi dia WaAshera, ndi akatemolaka ului wa diango tshe dia lʼulungu, akadikhusamelaka.

⁴Ndi akatshi diakelu lu luudu la Latuyalaka, kuyanga mbakati Latuyalaka ati: La Jerusalema kayumushikike lukumbu lami.[57]

⁵Ndi akatshela ului tshe wa diango dia lʼulungu diakelu lʼatei a kumbu hyendi yʼaseke wa luudu la Latuyalaka.

⁶Ndi akatshumbi anʼandi wʼapami lu dja lʼukidi wʼona Hinome, akatshaka aloho, akendjaka wetshi, akakitsha antu amotshi dia nteketshaka djimu la dia ndjala akanga wʼaloka. Ndi akatatekoyaka ntsha kolo lu ashu wa Latuyalaka dia mbukia kele.

⁷Ndi akakitsha efanelu ka losela kʼekishi kakandasele lu luudu la Unyashungu, lakatela Unyashungu Davidi la onʼandi Solomona ati: Lu luudu lone, ndu la Jerusalema yakamasonola lʼatei a wedja tshe wa Isariyele, kayumushikike lukumbu lami pundju.

⁸Ndu dimi halekekuyaki akaka wa Isariyele ntu lʼandja a kete yakamasha washewo, naka vo wayutshaka akambu tshe wakamawadjangela, elembe tshe, aui la adjangu wakandjema uma le Mose.[58]

⁹Manase akanganyia Juda la asi Jerusalema dia vo ndeka wedja wakatalanyaka Latuyalaka la ntundu kʼasi Isariyele ntsha kolo.

¹⁰Latuyalaka akateketa la Manase la wudja andi, keli vo kumbukela.

¹¹Okone Latuyalaka akawela elombodi wa ta wa khumʼekanga kʼAsuriya, vo wakayunda Manase wakawudji lu luweti, wakukeleka molola, wakatshu la ndi lu Babilona.

¹²Lamʼakindi lu pa, ndi akasengasenga Latuyalaka, Unyashungu andi, akayakitshakitsha efula la ntundu ka Unyashungu a washi.

¹³Ndi akolombe, ku Latuyalaka akawukela, aketawo osengosengo andi, akûkaluya uya la Jerusalema lu diulelu diandi. Ku Manase akalimbitela ati: Latuyalaka keli Unyashungu.

¹⁴Lʼokongo diku, ndi akahiki eheli lʼandja wʼusumba wa Davidi, lu leke lʼedjelu la Ngihona, lʼukidi, edja ndu la Suku dia Nsi, ndi akakidingia Ofele; akakihiki utali efula utsha lʼulungu. Ndi akakitsha elombodi wa ta lu esumba tshe a wulu wa Juda.

¹⁵Ndi akanya ditemolatemola dia wedja, la ekishi uma lu luudu la Latuyalaka, akalanya diakelu tshe diakandatshi lʼukungu wa luudu la Latuyalaka ndu la Jerusalema, akadikadja lʼandja wʼusumba.

¹⁶Ndi akatshi ediakelu ka Latuyalaka ntu, akalambula elambu wa ki la wʼeukelu ka lusaka, akadjangela Juda dia vo ntemola Latuyalaka, Unyashungu a Isariyele.

¹⁷Antu wakalambulaka elambu lu alunga, keli paka le Latuyalaka, Unyashungu awo.

¹⁸Enda, etsha ekina wa Mantse, elombelo kandi le Unyashungu andi, aui wakawutela amenyi wʼakambu wahatayi lu lukumbu la Latuyalaka, Unyashungu wa Isariyele, wambufundama lʼatei wʼEtsha wa Khumi ya dikanga ya Isariyele.

¹⁹Elombelo kandi la wuhu wakawukela Unyashungu, kolo kandi tshe la uhedia andi, alunga wakandatshi, ekishi ka Ashera la difanelu dia losela diakandatshi ntundu ndi atayakitshakitsha, wambufundama lu Ekondo wʼAmenyi wʼakambu wahatayi.

²⁰Manase akayeli washi; wakiikhunde lu luudu landi. Ku onʼandi Amona akulela lu dihuli diandi.

²¹Amona aki la deku akumi ahendi la pendi lamʼakandayala khumʼekanga. Ndi akulela deku pendi la Jerusalema.

²²Ndi akatshaka kene kaki kolo lu ashu wa Latuyalaka, uku akatshaka Manase, shi. Amona akalambulaka difanelu tshe dia losela, diakatatshi Manase, shi, elambu, akadikhusamelaka.

²³Ndi kundjakitshakitsha la ntundu ka Latuyalaka, uku akayakitshakitsha Manase, shi, ne dia ndi akatatetemalaka ndjaete lʼunungu.

²⁴Ekambi andi wakutshwela sheki, wakudiaki lu luudu landi.

²⁵Keli antu wa lu wudja wakadiaki waku tshe wakatshwela khumʼekanga Amona sheki. Ku vo wakakitsha onʼandi Josiya khumʼekanga lu dihuli diandi.