Read tetala 2 Ekondo 35 Bible Online

2 Ekondo 35 - tetala bible

2 Ekondo 35

¹Josiya akatshi dambu diʼelekanelu la Jerusalema, dia nemia Latuyalaka. Vo wakadiaki esongo wʼekoko wa dambu diʼelekanelu lu lushi la dikumi lʼanei la ngondo ka ntundu.

²Ndi akakitsha elombedi lu ahuli awo wʼulimu wakakikitsha lu ulimu a luudu la Latuyalaka.

³Ndi akatela asi Lewi waketshaka Isariyele tshe ndu wakakidiama le Latuyalaka ati: Nyutukitsha oshete wʼekila lu luudu lakahiki Solomona, onʼa Davidi, khumʼekanga ka Isariyele. Nyu hanyuhumbi mbenba lu aheka anyu ntu. Kakiane, nyukambeli Latuyalaka, Unyashungu anyu, la wudja andi Isariyele ulimu.

⁴Nyuyalongosole lu khumbu yanyu ndu lʼelui anyu, uku akati Davidi, khumʼekanga ka Isariyele, la onʼandi Solomona lu efundelu.[62]

⁵Nyemali lu dihuli diʼekila, uku weli elui wa khumbu yʼanengenyu asi wudja. Untu lʼuntu uma lʼatei wʼasi Lewi, ayali la okende wa khumbu kemotshi.

⁶Nyudiaki esongo wʼekoko wa dambu diʼelekanelu; nyuyakidia; nyelongoswele anengenyu uku diui dia Latuyalaka uma le Mose.

⁷Josiya akasha asi wudja tshe waki leko esongo wʼekoko la esongo wa mbudi dia ndjala elambu wa dambu diʼelekanelu vediko ya nunu akumi asatu, la esongo wa ngombe nunu satu. Eso tshe waki uma lu dungalunga dia khumʼekanga.

⁸Ewandji andi wakasha asi wudja, elombedi, la asi Lewi eshasha wa lulangu. Hilikiya, Zekariya ia Jehiyele, elonbodi wa ladiku wa lu luudu la Unyashungu, wakasha elombedi esongo wʼekoko la esongo wa mbudi nunu pendi la kama shamalu, la esongo wa ngombe kama shatu, dia ndjala elambu wa dambu diʼelekanelu.

⁹Ndu Konaniya la Shemaya la Netanele anangu, la Hashabiya, Jeyele, la Jozabada, ewandji wʼasi Lewi, wakasha asi Lewi esongo wʼekoko la esongo wa mbudi nunu tanu, la esongo wa ngombe kama tshanu.

¹⁰Ulimu oso wakalongoswama, ku elombedi la asi Lewi wakayala lu ahuli awo, lu elui awo, uku diui dia khumʼekanga.

¹¹Wakadiaki nyama ya dambu diʼelekanelu. Elombedi wakamonge dikila diakawalungula uma lʼanya wʼasi Lewi. Ku asi Lewi wakuwula nyama yakawadiaki.

¹²Vo wakakitsha elambu wa lutshumba amakina dia mbisha khumbu yʼasi wedja dia vo mbelambula le Latuyalaka, uku ufundami lu buku dia Mose. Osoku mbakawatshi ndu lʼesongo wa ngombe.

¹³Vo wakafumbi nyama ya dambu diʼelekanelu lu dja uku didjangu,[63] ku vo wakakati diango diʼekila lu tusaka ta puki, lu puki ya waki ndu lu dikalango, wakasamanya dikahanya le wudja tshe.

¹⁴Lʼokongo diku, asi Lewi wakalongosola etenyi kawo ndu etenyi kʼelombedi, ne dia elombedi, ana wa Arona, wakakambi ulimu edja ndu lʼutshu wa nambula elambu wa lutshumba la wata. Diako mbakalongosola asi Lewi etenyi kawo ndu etenyi kʼelombedi, ana wa Arona.

¹⁵Emimbi, ana wa Asafu, waki lu ahuli awo uku diui dia Davidi, Asafu, Hemana, la Jedutuna, omenyi wʼakambu wahatayi wa khumʼekanga.[64] Alami waki lu asuku tshe. Vo kumpumba mumo uma lʼulimu awo ne dia asi Lewi wakalongoswela etenyi kawo.

¹⁶Okone ulimu tshe wa Latuyalaka wakatshama lushi lako, dia ntsha dambu diʼelekanelu, la dia nambula elambu wa lutshumba lʼediakelu ka Latuyalaka, uku akadjanga khumʼekanga Josiya.

¹⁷Asi Isariyele tshe wakasangana leko, wakalemia lushi la wuki lʼelekanelu lʼetena kako, ndu lushi la wuki la ma diaha la edya nshi esambeli.[65]

¹⁸Nduku lushi la wuki lʼelekanelu la wuhu oso lakalemiama lu Isariyele uma lu nshi yʼumvutshi Samuele. Nduku khumʼekanga ka Isariyele kakalemia lushi la wuki lʼelekanelu uku loso lakalemia Josiya, elombedi, asi Lewi, Juda tshe, la Isariyele waki leko, ndu asi Jerusalema.

¹⁹Wakalemia lushi la wuki lako lʼeleku ka dikumi lʼenanei ka diulelu dia Josiya.

²⁰Lʼokongo wʼakambu aso tshe, lamʼakashidiya Josiya nongosola etemwelo, Neko, khumʼekanga kʼEjibitu, akatshu utsha la Eyufarate dia ntolosha Karakemishi. Josiya akatshu dia ntolo la ndi.

²¹Ku Neko akutumela akendji ati: Kʼasʼami la ye we khumʼekanga ka Juda? Dimi handji elo dia ndjolo la ye, keli dia ntolo la khumbu keku kalo la mi ta. Unyashungu akamvutela dia dimi nsamanya. Okone tosemanelaki la Unyashungu leli kame la mi, ne dia ndi atukukudiaka.

²²Keli Josiya kumbetawo mumo uma le ndi, akayafanya lʼuntu ukina dia ndo la ndi. Ndi kumbetawo aui wa Neko waki uma lʼunyo wa Unyashungu. Ndi akatshu dia ntolo la ndi lʼukidi wa Mengido.

²³Ambuki wʼeta wakatsheta khumʼekanga Josiya, ku ndi akatela ekambi andi ati: Nyuminya uma lane, ne dia lambuhumo wulu.

²⁴Ekambi andi wakawunya uma lu pusupusu, wakawudji lu pusupusu kekina kaki kandi, wakayi la ndi uya la Jerusalema. Ndi akavu. Ku wakukhunde lu waumbu a washi. Juda tshe la Jerusalema wakaleli Josiya.

²⁵Jeremiya akati aui lu ngengu wa ndela Josiya. Emimbi wʼapami tshe ndu wʼamantu watutaka dia Josiya lu kimbu yawo ya ngengu edja ndu elo. Vo wakayishikike uku etshelu lu Isariyele. Esambu ako wambufundama lu kimbu ya Ngengu.

²⁶Etsha ekina wa Josiya, akambu wʼololo wakandatshaka, uku ufundami lʼelembe wa Latuyalaka,

²⁷etsha andi wa ntundu ndu wa lʼokongo, enda vo wambufundama lu Buku dia Khumi ya dikanga ya Isariyele ndu ya Juda.