Read tetala 2 Ekondo 36 Bible Online

2 Ekondo 36 - tetala bible

2 Ekondo 36

¹Asi wudja wakose Jehoahaza, onʼa Josiya, wakukitsha khumʼekanga la Jerusalema lu dihuli dia shi.

²Jehoahaza aki la deku akumi ahendi la satu lamʼakandayala khumʼekanga. Ndi akulela ngondo shatu la Jerusalema.

³Khumʼekanga kʼEdjibitu akayuwunya la Jerusalema, akafutsha wudja ulambu wa talata ya fesa lukama, la wa talata otoi ka paunyi.

⁴Khumʼekanga kʼEdjibitu akadji Eliyakima, onangu Jehoahaza, khumʼekanga ka Juda la Jerusalema. Ndi akakadimula lukumbu landi dia lo ndjala Jehoyakima. Keli Neko akose Jehoahaza, onangu, akotole lʼEdjibitu.[66]

⁵Jehoyakima[67] aki la deku akumi ahendi la tanu lamʼakandayala khumʼekanga. Ndi akulela deku dikumi la otoi la Jerusalema. Ndi akatshaka kene kaki kolo lu ashu wa Latuyalaka, Unyashungu andi.

⁶Nebukadineza, khumʼekanga ka Babilona, akayi dia najolosha,[68] akayukeleka molola dia ntsho la ndi utsha la Babilona.

⁷Nebukadineza akembe ndu diango diʼulimu dia lu luudu la Latuyalaka utsha la Babilona, akatudikitsha lu luudu landi la khumʼekanga la Babilona.

⁸Etsha ekina wa Jehoyakima, akambu wa wononyi wakandatshaka ndu akambu waki lʼutema andi, enda, vo wambufundama lu Buku dia Khumi ya dikanga ya Isariyele ndu ya Juda. Ku onʼandi Jehoyakina akulela lu dihuli diandi.

⁹Jehoyakina aki la deku enanei lamʼakandayala khumʼekanga. Ndi akulela ngondo shatu la nshi dikumi la Jerusalema. Ndi akatshaka kene kaki kolo lu ashu wa Latuyalaka.

¹⁰Lʼetatelu kʼeleku kekina, khumʼekanga Nebukadineza akatumi akendji dia najotola utsha la Babilona,[69] kame la diango diʼulimu diʼushinga a wulu dia luudu la Latuyalaka. Ndi akadji Zedekiya, onangu Jehoyakina, khumʼekanga ka Juda la Jerusalema.[70]

¹¹Zedekiya[71] aki la deku akumi ahendi la otoi lamʼakandayala khumʼekanga. Ndi akulela deku dikumi la otoi la Jerusalema.

¹²Ndi akatshaka kene kaki kolo lu ashu wa Latuyalaka, Unyashungu andi. Ndi kundjakitshakitsha la ntundu ka umvutshi Jeremiya, lakateketaka aui uma lʼunyo wa Latuyalaka.

¹³Ndi akahendwela ndu khumʼekanga Nebukadineza[72] lakutshibia Unyashungu. Ndi akayala lʼote wulu, akakikitsha utema diaha nkadimo le Latuyalaka, Unyashungu wa Isariyele.

¹⁴Ewandji tshe wʼelombedi la wudja wakafudia ndu vo ehedia awo lu akambu tshe wa wononyi wa wedja. Vo wakete luudu la Latuyalaka, luudu lakandakidia la Jerusalema, mindu.

¹⁵Latuyalaka, Unyashungu a washewo, al atumelaka aui wa mbaewula esadi le atumami andi, ne dia ndi akalangaka mpandja wudja andi la edjaselu kandi hita.

¹⁶Keli vo wakolaka atumami wa Unyashungu, wakonyolaka aui andi ndu wakasokaka amvutshi andi, edja ndu kele ka Latuyalaka kakahami le wudja wuhu waki kumbeya nkitakita.

¹⁷Okone Unyashungu akatumela khumʼekanga kʼasi Kaladiya[73] lakayudiaka elongo awo wʼapami la yombo lʼetei a luudu lʼetemwelo kawo. Ndi kumpandja olongo a pami kana usekaseka a umuntu, usumbi a pami kana u umbi wa lukusumbi. Unyashungu akakimo tshe lʼanya andi.

¹⁸Ndi akatole diango tshe diʼulimu dia luudu la Unyashungu, dia waki ndu dia tshitshe, diango uma lu waumbelu wa lu luudu la Latuyalaka, ndu uma lu waumbelu wa khumʼekanga ndu wʼewandji andi utsha la Babilona.

¹⁹Vo wakatshumbi luudu la Unyashungu,[74] wakanyukula peli dia lukumbu la Jerusalema, wakatshumbi mvudu tshe ya khumʼekanga yaki leko, wakalanya diango tshe diʼulimu diʼushinga a wulu.

²⁰Nebukadineza akatole wane tshe waki kundjakema la yombo fumbi utsha la Babilona. Vo wakatuyala ekambi andi ndu wa anʼandi, edja ndu lu nshi ya diulelu dia Perisiya,

²¹dia diui dia Latuyalaka diakandati lʼunyo wa Jeremiya nshidiyama; edja ndu kete yakayala la nshi yayo ya mumuya. Yo yakumuya etena kakiyo hwe edja ndu lamʼakakuki deku akumi esambeli. [75]

²²Lʼeleku ka ntundu ka diulelu dia Kuro, khumʼekanga ka Peresiya, Latuyalaka akahashahasha yimba ya Kuro, dia diui diakati Latuyalaka lʼunyo wʼumvutshi Jeremiya nshidiyama. Okone Kuro akadianganya didjangu lu diulelu diandi tshe, lʼunyo ndu lu mukanda ati:

²³Kuro, khumʼekanga ka Peresiya, kata ati: Latuyalaka, Unyashungu a lʼulungu, lakambisha waulelu tshe wa la kete, ndi kakambisha okende wa dimi ntuhikela luudu la Jerusalema[76] ya la Juda. Untu tshe lʼatei anyu leli usi wudja wa Latuyalaka, Unyashungu andi, ayali la ndi, atshu utsha leko.