Read tetala 2 Ekondo 5 Bible Online

2 Ekondo 5 - tetala bible

2 Ekondo 5

¹Osoku mbakashidiya Solomona ulimu tshe wa luudu la Latuyalaka. Solomona akatole diango diakatakidisha Davidi,[15] shi: fesa, paunyi, la diango tshe diʼulimu akadikitsha lu waumbelu wa lu luudu la Unyashungu.

²Khumʼekanga Solomona akasanganya dihangamendi dia Isariyele, ewandji tshe wa wedja, ete wa khumbu ya Isariyele la Jerusalema dia ntela oshete wa sheki wa Latuyalaka uma lʼusumba wa Davidi[16] wetawo vati: Siona.

³Apami tshe wʼIsariyele wakasangana la le khumʼekanga lu dambu dia lu ngondo kʼesambeli.

⁴Dihangamendi tshe diʼIsariyele wakatshu, ku asi Lewi wakatemba oshete.

⁵Vo wakatole oshete wa Latuyalaka, luudu lʼesanganelu la dipema, la diango tshe diʼelimu diʼekila diaki lu luudu. Elombedi la asi Lewi atu mbakayadiembaka.

⁶Khumʼekanga Solomona la ului tshe wʼIsariyele wakandeti la le ndi wakemala la ntundu kʼoshete walambula ekoko la ngombe, wuhu waki kumbeyama mbala ne dia efula kayo.

⁷Elombedi wakela oshete wa sheki wa Latuyalaka uya lu dihuli diawo, lu luudu lʼekila lu dihuli diuleki ekila la tshina diʼahafu wʼakeruba.

⁸Ahafu wʼakeruba wakasimbimadi ladiku dia dihuli diʼoshete wakukumbi, vo la esimbi awo.

⁹Esimbi ako waki etali, okone kuma yawo yakenamaka uma lu dihuli diʼekila la ntundu ka oshete, keli vo komenamaka uma lʼandja. Oshete ako weko lawo edja ndu elo.

¹⁰Nduku engo kaki lʼoshete, tshikima pasi pendi diʼave diakatadji Mose lu Horeba[17] lamʼakadji Latuyalaka lʼasi Isariyele sheki lu etumbelu kawo uma lu Edjibitu.

¹¹Lamʼakatumbi elombedi uma lu dihuli diʼekila (ne dia elombedi tshe waki leko wakayakidia kundjalonga lu ahuli wʼelui awo;

¹²ndu emimbi tshe wʼasi Lewi: Asafu, Hemana, Jedutune, anʼawo wʼapami la anengewo wolote ahondo wa linene wʼololo, wakemadi lu leke lʼehutwelu lʼediakelu la ekokoloko, akembi la sese. Elombedi lukama la akumi ahendi waki laawo wada amama.)

¹³Lamʼakahelenganya amvudi wʼamama la emimbi usambu awo kame dia ndjala diui otoi lu mandula la mbuka Latuyalaka lusaka, ndu lamʼakawedia aui awo kame la amama, ekokoloko, la dihumahuma dia mandula Latuyalaka vati: Ndi eli ololo, ne dia ngandji kandi ka mamba katutshikalaka pundju.[18] Ku luudu lakaluli la dingi,[19] luudu la Latuyalaka.

¹⁴Elombedi kumbeya ntshikala loko dia ntsha elimu ne dia dingi diako; ne dia lutumbu la Latuyalaka lakaluli lu luudu la Unyashungu.