Read tetala Ezera 9 Bible Online

Ezera 9 - tetala bible

Ezera 9

¹Lamʼakashili akambu ane, ewandji wakasukana la mi, wata vati: Asi Isariyele, elombedi, ndu asi Lewi watayatula uma le wedja wa la kete ndu watuyelaka ditshelu diawo dia wononyi, diʼasi Kanana, diʼasi Hiti, diʼasi Perizi, diʼasi Jebuse, diʼasi Amona, diʼasi Moaba, diʼasi Edjibitu ndu diʼasi Amora.

²Vo wakatshuki anʼawo wʼamantu, ndu wakatshukela anʼawo wʼapami. Ku vo wakasohanya diuhu diʼekila la wedja wa lu kete ku. Ewandji lʼelohe wakaleki ntsha kolo kako.

³Lamʼakamuki dikambu so, dimi lakatshatsha ahondo ami la ukutu ami, lakahatula divu diʼuma lʼote ami la loledu, lakadjase la lunyangu.

⁴Lasuki la mi kakasangana wane tshe wakadidimia aui wa Unyashungu wa Isariyele ne dia kolo ka wane waki lu fumbi, ku dimi lakatshikala ludjashi ndu la lunyangu edja ndu lʼulambu wa dikolo.

⁵Ku lʼetena kʼulambu wa dikolo, dimi lakunela lʼatei a lunyangu lami la ahondo ami lʼukutu ami betshibetshi, lakakhuse adui, lakasimbula anya ami utsha le Latuyalaka, Unyashungu ami.

⁶Ku dimi lakolombe nti: Unyashungu ami li, dimi lambolombo, lambuvo sonyi dia mbedia elundji utsha le ye, we Unyashungu ami! ne dia kolo yasu yambufulanela ladiku diʼete asu, la munga yasu yambukuma pulu ndu lʼulungu.

⁷Uma lu nshi ya washesu, shu takayala la unungu a wuki edja ndu elo. Uma lu kolo yasu, mbakayatukimo, ndu shu, ndu khumi ya dikanga yasu, la elombedi asu lʼanya wa khumi ya dikanga yʼasi wedja, lu yombo, lu lohombo, lu elanyelu ndu lu sonyi kukumbi dundji diasu edja ndu elo.

⁸Kakiane, we Latuyalaka, Unyashungu asu, ambutukutenya ngandji kaye dia we ntutshika shu atshikadi amotshi la ntusha hyuli lu dihuli diaye diʼekila, dia we Unyashungu asu mbeya nsenya ashu asu la ntusha etenyi ka lumu lʼatei a lohombo lasu.

⁹Keli we Unyashungu kuntoseka lʼatei a lohombo lasu. We akatenya ngandji kaye ka mamba la ntundu ka khumi ya dikanga ya Peresiya dia ntusha yema ya lumu la dia meme luudu la Unyashungu asu, la dia nongosola ahuli wakalana, la dia ntudingia la eheli ka lukumbu lu Juda la Jerusalema.

¹⁰Unyashungu asu li, kakiane, kayututa lu dikambu ne? Ne dia shu takaseke elembe aye,

¹¹wakayatudjela uma le ekambi aye amvutshi, wati: Kete yayanganyu nkita, eli kete yakasana la mindu yʼantu wa lu wedja ako, uma lu akambu awo wa wononyi wakawayiludia uma lu kuma kemotshi pulu ndu lu kuma kekina, kame la mindu yawo.

¹²Okone tanyu-tshukamiaki anʼanyu wʼamantu le anʼawo wʼapami, kuyanga ntshukela anʼanyu wʼapami anʼawo wʼamantu.[21] Tanyokomiaki diese diawo kuyanga ongonyi awo pundju. Osoku mbayunyuyala la wulu, mbayunyole diango diuleki ololo diʼuma lu kete, ndu mbayunyuyitshikela anʼanyu ukito pundju.

¹³Lʼokongo wʼakambu ane tshe wambuya le su, ne dia kolo yasu la unungu asu a wuki wakatatshi, we Unyashungu asu, kuyanga mbakiye kuntusuya uku yediko ya kolo yasu, la we akatutshiki shu atshikadi amotshi.

¹⁴Ku shu tayuhedia elembe aye ntu dia ndjala kame la antu aku watutshaka akambu ane wa wononyi? Undi, we hutuka kele ntu edja ndu we ambutushila ushiki, diaha ntutshika nduku utshikadi?

¹⁵Latuyalaka li, Unyashungu wa Isariyele, we keli ololo! Shu atshikadi amotshi teko elo. Shu akanga wʼenungu ane teko la ntundu kaye. Keli nduku otoi asu lukuki memala la ntundu kaye.