Read tetala Nehemiya 11 Bible Online

Nehemiya 11 - tetala bible

Nehemiya 11

¹Ewandji a wudja wakadjase la Jerusalema. Ku antu wakatshikala wakuki uwali dia nsonola untu otoi otoi lʼatei a dikumi, dia ndjudjase la Jerusalema, usumba wʼekila, ku akina mbidjase lu esumba ekina.

²Antu wakatshokola apami tshe waketawo lʼongenongeno dia ndjudjase la Jerusalema.

³Ewandji wa leke la Juda wakadjase la Jerusalema ene. Keli asi Isariyele, elombedi, asi Lewi, alami wʼetemwelo, la tukanula ta ekambi wa Solomona wakadjase lu esumba wa Juda, untu lʼuntu lu dihuli diandi lʼusumba awo.

⁴Asi Juda amotshi la asi Bendjamina amotshi wakadjase la Jerusalema.[42] Asi Juda ane: Ataya, onʼa Uziya, onʼa Zekariya, onʼa Amariya, onʼa Shefatiya, onʼa Mahalalele, uma lʼatei wʼasika Pereze;

⁵la Maseya, onʼa Baruka, onʼa Kolo-Hoze, onʼa Hazaya, onʼa Adaya, onʼa Joyariba, onʼa Zekariya, onʼa usi Shilo.

⁶Asika Pereze tshe wakadjase la Jerusalema waki apami a wulu kama nyei akumi asamalu la enanei.

⁷Asi Bendjamina ane: Salu, onʼa Meshulama, onʼa Joeda, onʼa Pedaya, onʼa Kolaya, onʼa Maseya, onʼa Itiyele, onʼa Jeshaya,

⁸ku lʼokongo andi, Ngabai la Salai, antu kama divwa akumi ahendi la enanei.

⁹Joele, onʼa Zikiri, aki umendji awo; la Juda, onʼa Hasenua, aki umendji a hendi wa lʼusumba.

¹⁰Uma lʼatei wʼelombedi: Jedaya, onʼa Joyariba, Jakina,

¹¹Seraya, onʼa Hilikiya, onʼa Meshulama, onʼa Zadoka, onʼa Merayota, onʼa Ahitube, laki olombodi wa luudu la Unyashungu,

¹²la anengewo wakatshaka ulimu lu luudu la Unyashungu, waki kama enanei akumi ahendi la ahendi; Adaya, onʼa Jerohama, onʼa Pelaliya, onʼa Amizi, onʼa Zekariya, onʼa Pashura, onʼa Malakidja,

¹³la anangu, ete wa khumbu ya washewo, kama hyendi akumi anei la ahendi; Amashisai, onʼa Azarele, onʼa Azai, onʼa Meshilemote, onʼa Imere,

¹⁴kame lʼanengewo, apami a wulu, lukama akumi ahendi la enanei. Zabidiyele, onʼa Hangedolima, aki umendji awo.

¹⁵Uma lʼatei wʼasi Lewi: Shemaya, onʼa Hashuba, onʼa Azirikame, onʼa Hashabiya, onʼa Buni;

¹⁶ndu Shabetai la Jozabada, uma lʼatei wʼewandji wʼasi Lewi, waki la okende wʼelimu wa lʼandja wa luudu la Unyashungu;

¹⁷Mataniya, onʼa Mika, onʼa Zabidi, onʼa Asafu, laki olombodi wa ntatelaka mbuka lusaka lu dombelo, la Bakebukiya, untu la hendi lʼatei wʼanangu; la Abida, onʼa Shamua, onʼa Ngalala, onʼa Jedutuna.

¹⁸Asi Lewi tshe wakadjashi lʼusumba wʼekila, waki kama hyendi akumi enanei la anei.

¹⁹Alami wʼasuku: Akuba, Talamona la anengewo, wane wakalamaka asuku, waki lukama akumi esambeli la ahendi.

²⁰Wane wakatshikala uma lʼatei wʼasi Isariyele, wʼelombedi ndu wʼasi Lewi, wakadjase lʼesumba tshe wa Juda, untu lʼuntu lu dihuli diandi.

²¹Keli alami wʼetemwelo wakadjase lu Ofele. Ziha la Ngishipa waki elombodi wʼekambi wa lu etemwelo.

²²Umendji wʼasi Lewi waki la Jerusalema aki Uzi, onʼa Bani, onʼa Hashabiya, onʼa Mataniya, onʼa Mika, uma lʼatei wʼasika Asafu, emimbi, waki la okende wʼelimu wa luudu la Unyashungu,

²³ne dia khumʼekanga akadji didjangu lu dikambu diawo dia antu nkutsha ehumba wa la lushi la lushi wʼemimbi.

²⁴Petahiya, onʼa Meshezabele, uma lʼatei wʼasika Zera, onʼa Juda, akakimanyiaka khumʼekanga lu akambu tshe wa wudja.

²⁵Lu dikambu dia ngelu ya beke diawo, asi Juda amotshi wakadjase la Kiriyate-Araba ndu lu ngelu ya lʼokongo awo, Dibona ndu lu ngelu ya lʼokongo awo, la Jekabizele ndu lu ngelu ya lʼokongo awo,

²⁶la Jeshua, Molada la Bete-Pelete,

²⁷la Hazara-Shuala, la Bere-Sheba ndu lu ngelu ya lʼokongo awo,

²⁸la Zikilange, Mekona ndu lu ngelu ya lʼokongo awo,

²⁹la Ene-Rimona la Zora, la Jaramuta,

³⁰Zanoa, Adulama ndu lu ngelu ya lʼokongo awo, Lakishi la kete yawo, ndu la Azeka lu ngelu ya lʼokongo awo. Okone vo wakadjase uma la Bere-Sheba pulu ndu lʼukidi wa Hinome.

³¹Asi Bendjamina wakadjase umaka Ngeba, la Mikimashi, Aidja, Betele ndu lu ngelu ya lʼokongo awo,

³²la Anatota, Nobo, Hananiya,

³³la Hazora, Rama, Ngitayima,

³⁴la Hadida, Zeboyima, Nebalata,

³⁵la Loda ndu la Ono, ukidi wʼasi ulimu.

³⁶Elui emotshi wʼasi Lewi wakadjashi la Juda, wakayala kame lʼasi Bendjamina.