Read tetala Nehemiya 13 Bible Online

Nehemiya 13 - tetala bible

Nehemiya 13

¹Lushi lako, vo wakali aui uma lu buku dia Mose la ntundu ka wudja, ku wakatani ufundami ati; Usi Amona la usi Moaba, tawotoki lu lusanganya la Unyashungu pundju,

²ne dia vo kunungula asi Isariyele la ma ndu lʼashi; ndu ne dia vo wakawaetela Balama la falanga dia ndjuwadja mananu,[45] keli Unyashungu asu akakadimula mananu otshoko.[46]

³Lamʼakawuki olembe ako, vo wakamamitula angendangenda tshe uma le asi Isariyele.

⁴La ntundu kʼakambu aso, olombedi Eliyashiba, laki la okende wa namaka mvudu ya lʼetei a luudu la Unyashungu asu, ndu lakukanaka la Tobiya,

⁵akalongoswela Tobiya luudu la wuki lʼetei a luudu la Unyashungu, lene akawadjaka elambu wa shima, malashi, diango diʼulimu, tenyi dia dikumi diʼepunga, diʼashi wʼelua, la dia iso nshi ya ntundu, uku aki olembe dikambu dia asi Lewi, emimbi la alami wʼasuku, ndu elambu wa lediedia dikambu diʼelombedi.

⁶Lamʼakawatshaka akambu aso, dimi taki la Jerusalema, ne dia dimi lakatshu le Aratashasta, khumʼekanga ka Babilona, lʼeleku kʼakumi asatu lʼahendi. Lamʼaketi nshi motshi, dimi lakalombe khumʼekanga wulu,

⁷wa nkalula la Jerusalema. Dimi lakayena kolo kakatshi Eliyashiba lu dikambu dia Tobiya lamʼakandolongoswela luudu lʼetei a lukumbu la seke dia luudu la Unyashungu.

⁸Ku lakatundja diango tshe dia Tobiya uma lu luudu lako;

⁹lakadji olembe dia mbedia mvudu ya lʼetei. Ku lakakaluya diango diʼulimu dia luudu la Unyashungu, elambu wa shima la wa malashi loko.

¹⁰Dimi lakayulimbitela nti: Asi Lewi kunungula tenyi diawo.[47] Dimi lakayutana asi Lewi la emimbi waki la okende wʼulimu wambushila ndawo, untu lʼuntu dia ntukamba ekambo kandi.

¹¹Okone dimi lakahangwela elohe, lakawambula nti: Okoko wana wambosekama luudu la Unyashungu? Ku lakasanganya asi Lewi la emimbi, lakakitsha lu ahuli awo wʼelimu.

¹²Ku asi Juda tshe wakela tenyi dia dikumi diʼepunga, diʼashi wʼelua ndu dia iso.[48]

¹³Ku dimi lakakitsha antu ane dia namaka waumbelu: olombedi Shelemiya, ufundji Zadoka, Pedaya, uma lʼatei wʼasi Lewi. Lakawasha ndu Hanana, onʼa Zakura, onʼa Mataniya, ukimanyidi ne dia vo waki tutshundju. Vo waki la ulimu wa nkahanya anengewo diango.

¹⁴Unyashungu ami li, umbuhoki lu dikambu ne, tuhelaki etsha ami wʼololo wakamatshi lu dikambu dia luudu la Unyashungu ami ndu dia elimu alo.

¹⁵Lu nshi sho, dimi lakenyi asi Juda amotshi wamula ashi wʼelua lu yundja lushi la mumuya, ndu wemba dikanda diʼepunga diakawahe ladiku dia punda kame la wanu, elua wa vinyo, wa fingu, la wehu tshe wa diango diakawayelaka uya la Jerusalema lushi la mumuya.[49] Ku dimi lakawaewula lushi lakawasundja ndu yawo ya nde.

¹⁶Asi Tura amotshi wakadjase la Jerusalema wakelaka nsi la wehu tshe wa diango diʼukanda, wakayudisundjaka lushi la mumuya le asi Juda ndu la Jerusalema.

¹⁷Ku dimi lakahangwela ewandji wa Juda, lakawambula nti: Na etshelu kene ka kolo kambunyutsha dia nanya lushi la mumuya?

¹⁸Aha wuhu one mbakatshi washenyu? Ndu aha uma lu dikambu ne, mbakela Unyashungu asu alanyelu ane tshe ladiku diasu ndu lʼusumba one? Ku nyu nyambukutwela Isariyele kele kandi ntu, lamʼambunyulanya lushi la mumuya!

¹⁹Dimi lakadjanga dia vo ndjiha kuki ya Jerusalema la tushu ta shimba, ntundu ka lushi la mumuya, la dia vo ndjidihula paka lʼokongo a lushi la mumuya. Ku dimi lakakitsha ekambi ami emoishi dia nshimba untu mboto lʼeshiko lushi la mumuya.

²⁰Ku asi ukanda la asundjishi wa wehu tshe wa diango wakalali lʼandja a Jerusalema, etena otoi kana tena pendi.

²¹Ku dimi lakawaewula, lakawambula nti: Okoko wana wuladinyu lʼandja a lukumbu? Naka nyu nyayutsha ntu, layunyunda. Uma lʼetena keso, vo kundja ntu lushi la mumuya.

²²Dimi lakadjangela asi Lewi dia vo ndjaedia la dia vo ndjulama asuku dia nkidia lushi la mumuya. Unyashungu ami li, umbuho ne dia dikambu ne, unami jku eli wuki wa ngandji kaye ka mamba!

²³Lu nshi sho, dimi lakenyi asi Juda wakatshuki amantu wʼasi Ashidode, wʼasi Amona, la wʼasi Moaba.

²⁴Etenyi ka hendi ka anʼawo wakateketaka oteketa wʼasi Ashidode, kumbeya nteketa oteketa wa Juda. Vo wakeyaka paka oteketa a wudja omotshi kana wudja ukina.

²⁵Dimi lakahangwela, lakawadji mananu; lakakomola amotshi, lakahatul divu. Dimi lakatshibia lu lukumbu la Unyashungu nti: Tanyutshukamiaki anʼanyu wʼamantu le anʼawo, ndu tanyutshukelaki anʼanyu wapami anʼawo, kuyanga nyu nyame mbatshuka.[50]

²⁶Aha uma lu dikambu dia wuhu ako, mbakangi Solomona, khumʼekanga ka Isariyele? Lʼatei a wedja efula, nduku khumʼekanga kaki uku ndi, ndi akalangema le Unyashungu andi.[51] La Unyashungu akukitsha khumʼekanga ka isariyele tshe, keli amantu wʼasi wedja wakukutula utsha lu kolo.[52]

²⁷Undi, ololo shu nyukela dia ntsha kolo kene ka wuki, dia mpedia Unyashungu asu lu ntshuka amantu wʼasi wedja?

²⁸Ona pami omotshi a Joyada, onʼa olombedi a ladiku Eliyashiba, akatshuki onʼa Sanabalata,[53] usi Horona. Okone dimi lakawutshanya uma lasuki la mi.

²⁹Unyashungu ami le, uwauho ne dia vo wakasuwula ulimu wʼolombedi ndu sheki yakadji elombedi ndu yʼasi Lewi.

³⁰Okone dimi lakawaedia uma le asi wedja tshe. Lakasha elombedi la asi Lewi untu lʼuntu okende wʼulimu wakandahumbi ntsha,

³¹ndu wa elambu wa kunyi lu tena diakasonwana, ndu elambu wʼelonga. Unyashungu ami li, umbuho ololo!