Read tetala Nehemiya 2 Bible Online

Nehemiya 2 - tetala bible

Nehemiya 2

¹Lu ngondo ka Nisana, lʼeleku kʼakumi ahendi ka diulelu dia khumʼekanga Aratashasha, lamʼakawela wanu la ntundu kandi, dimi lakose wanu, lakawasha khumʼekanga. Dimi komenamaka nduku lushi la lunyangu la ntundu kandi.

²Ku khumʼekanga akamumbula ati: Okoko wana weye la elundji ka lunyangu lamʼeye kema la kandji? Nduku dikambu dikina undu, paka lunyangu mbeli lʼutema. Ku dimi lakuki woma efula.

³Dimi lakakaluya khumʼekanga diui nti: Khumʼekanga alumbaki pundju. Ukundi ahamayala la elundji ka lunyangu, lamʼambulana usumba lenʼeli waumbu a wapapa, la kuki yawo yambulungula?[3]

⁴Ku khumʼekanga akamumbula ntu ati: Kalombaye na? Ku lakalombe Unyashungu a lʼulungu.

⁵Dimi lakakaluya khumʼekanga diui nti: Khumʼekanga, naka we nangaka, ndu naka dimi ukambi aye lambuhumo lukulu lʼolo lu ashu aye, untumi la Juda, utsha lʼusumba a waumbu a wapapa dia dimi ntuhika ntu.

⁶Khumʼekanga akamumumbula (etena kako wadi a khumʼekanga akadjashi lasuki la ndi) ati: Lokendo laye layuyala nshi ngana, ndu etena kakona kayuyukalula? Khumʼekanga akangenangena dia ntumami, ku dimi lakawutela etena.

⁷Dimi lakatela khumʼekanga ntu nti: Naka we khumʼekanga nangaka, wambisha mikanda utsha le embuledi wa lu leke la Wedi a Ndjali, dia vo mbetshami edja ndu lamʼayumukuma la Juda;

⁸ndu mukanda le Asafu, ulami wʼukunda wa khumʼekanga, dia ndi mbishami etamba wa ntsha kuki yʼetangelu lasuki lʼetemwelo ndu wa eheli ka lukumbu lʼusumba, ndu wa luudu layumutudjase. Ku khumʼekanga akambisha mikanda ako, ne dia lunya lʼololo la Unyashungu laki la mi.

⁹Dimi lakatshu le embuledi wa lu leke la Wedi a Ndjali, lakatuwasha mikanda wʼuma le khumʼekanga. Khumʼekanga akatumi elombodi wa ta la ambahemi wa falasa dia vo ntshindelami.

¹⁰Keli lamʼakuki Sanabalata, usi Horona, la ukambi Tobiya, usi Amona, dikambu ne, vo wakanyangi efula ne dia untu omotshi ambuya, dia ndjukimanyia asi Isariyele.

¹¹Dimi lakakumi la Jerusalema, lakayuhanga leko nshi shatu.

¹²Lʼokongo diku laketo lʼutshu, dimi la apami amotshi. Dimi kumvutela nduku untu kene kakadji Unyashungu ami lʼutema ami, dia ntsha la Jerusalema. Nduku nyama kaki la su, tshikima kene kakamahemaka dime.

¹³Dimi lakatumbi lʼutshu lu Suku dia Ukidi, ku lakekela utsha lʼUshima wa Mbulu, laketi la Suku dia Tumi, lakashishima peli dia lukumbu la Jerusalema lakalana. Ku lakenyi nti: Kuki yayo yakalungula.

¹⁴Ku dimi laketi lasuki la Suku diʼEteko la Uduwa a Khumʼekanga. Keli nyama kakamahemi komena dihuli dia mbeta.

¹⁵Dimi lakambela lu kyoko lʼutshu, lakashishima eheli ka lukumbu ntu. Ku lakakadimo, lakoto lu Suku dia Ukidi, lakakalula.

¹⁶Embuledi kumbeya lene akamatshu, kuyanga kene kakamatutsha. Edja ndu lʼetena keso, dimi kumvuta nduku diui le asi Juda, elombedi, kana le antu a waki, le elohe, kuyanga le wane wayutsha ulimu.

¹⁷Dimi lakawatela nti: Nyu menaka nyati: Lʼatei elanyelu kesu. Jerusalema akalana, la kuki yayo yakalungula! Nyeso tuhiki eheli ka lukumbu la Jerusalema, mbahatuyala lu sonyi ntu.

¹⁸Dimi lakawatela dia lunya lʼololo la Unyashungu ami le mi, ndu dia aui wakamvutela khumʼekanga. Ku vo wakati vati: Tuneli, tuluhiki! Ku vo wakayakikitsha dia ntsha ulimu one wʼololo.

¹⁹Keli lamʼakuki Sanabalata usi Horona la ukambi Tobiya, usi Amona, la Ngesheme, usi Arabiya, dikambu so, vo wakatole, wakatonyola. Vo wakatumbula vati: Katshanyu leku na? Undi, nyambotombokwela khumʼekanga?

²⁰Ku dimi lakakaluya diui nti: Unyashungu a lʼulungu, ayutukimanyia lʼulimu one. Okone shu ekambi andi tayunela, tayutuhika, keli nyu kema lʼetenyi, kuyanga wulu, kana euhwelu lu Jerusalema.