Read tetala Nehemiya 4 Bible Online

Nehemiya 4 - tetala bible

Nehemiya 4

¹Lamʼakuki Sanabalata ati: Shu teko lu mpika eheli ka lukumbu, ndi akumala, akuki kele ka wulu, akole asi Juda.

²Ndi akambula anangu la ului wʼalimbi wa la Samariya ati: Katsha asi Juda ane waha la wulu na? Vo wayuluwanya ulimu one? Wayulambula elambu? Vo wayeya nshidiya ulimu one tshe lushi otoi? Vo wayutundja ave ane uma lu awenga wakawalungula, la mbaluwanya?

³Etena keso Tobiya, usi Amona, aki lasuki la ndi, ku ndi akati ati: Elu, kene kahikawo naka mbulu ayulimbo ladiku diʼeheli, to kayunyukula eheli kawo kʼave.

⁴Unyashungu asu li, uki uku ambutonywama. Ukaluya dionyo diawo utsha le wo, uwakimo diango dia dimbu lu kete ya fumbi.

⁵Tuwadimanyiaki uhedia awo; kolo kawo tadimwamaki la ntundu kawo; ne dia vo wakatshela ambiki kolo.

⁶Shu takahiki eheli ka lukumbu. Ku eheli tshe kakasamana yediko yʼetenyi otoi ka hendi lu wemema. Antu wakakambi ulimu one lʼutema otoi.

⁷Keli lamʼakuki Sanabalata, Tobiya, asi Arabiya, asi Amona la asi Ashidode lukumu vati: Peli dia lukumbu la Jerusalema diambumbiyama, ndu ahuli wambutatela ndjihama, vo wakuki kele ka wulu.

⁸Vo tshe wakadji sheki kame dia ntolosha Jerusalema, ndu dia ntuyilanya.

⁹Shu takalombe Unyashungu asu, takakitsha alami yanyi ndu lʼutshu, dia ntulama uma lʼata awo.

¹⁰Keli Juda akati ati: Amembi a wetshu kema la wulu ntu, ndu elanyelu keko efula. Shu hateyi mpika eheli ka lukumbu.

¹¹Ku atunyi asu wakati vati: Vo haweyi, ndu hawenyi nduku engo, edja ndu tambukuma lʼatei awo; shutayadiaka, tayakimuya ulimu.

¹²Asi Juda wakaladi lasuki la wo, wakayi tena dikumi dia ndjututela vati: Uma lu ahuli tshe wudjashiwo, mbayuwuya dia ndjutolosha.

¹³Diako mbakamakitsha antu uku khumbu, vo tshe la tombo tawo, akonga awo, la eta awo lu afuku waki lʼeheli ka lukumbu ndu ladiku dia kete ya wumu.

¹⁴Dimi lakendi, ku lakunela, lakatela antu a waki, elohe, la atshikadi a wudja nti: Tanyuwaukaki woma. Nyuho Khumadiondjo, leli wuki ndu leli woma. Nyolwele anengenyu, anʼanyu wʼapami la anʼanyu wʼamantu, wadienyu la mvudu yanyu ta.

¹⁵Lamʼakuki atunyi asu vati: Shu tambeya dikambu, Unyashungu akalanya esangweyu kawo, ku shu tshe takakalula lʼeheli ka lukumbu, untu lʼuntu lʼulimu andi.

¹⁶Umaka lushi loso, etenyi ka hendi kʼekambi ami wakakambaka, ku etenyi ka hendi kekina waki la akonga, dingawu, eta la eloto wa ta. Elombodi wakemadi lʼokongo wa khumbu tshe ka Juda,

¹⁷wane waki la mpika eheli ka lukumbu. Wane wakembaka wetshu wakakambaka la lunya lomotshi, ku lunya lukina nkimela ehumo.

¹⁸Wane wakahikaka, untu lʼuntu aki la yombo yandi lu lukindi. One lakadaka dimama akemalaka lasuki la mi.

¹⁹Dimi lakatela antu a waki, elohe, la atshikadi a wudja nti: Ulimu waya efula ndu waya wuki, ku shu takadiangana ladiku diʼeheli, one lene ukina lene.

²⁰Okone lu dihuli diayunyuka dimama, kanyusangani lasuki la su: Unyashungu asu ayutolwela ta.

²¹Osoku mbakatatshaka ulimu, etenyi ka hendi kasu, akonga lʼanya umaka kesekese edja ndu toto tambene.

²²Ndu lʼetena keso, dimi lakatela wudja ntu nti: Untu lʼuntu katetamaki la Jerusalema kame la ukambi andi, dia vo ntulamaka lʼutshu, ku nkambaka ulimu la yanyi.

²³Shu kunkululaka ahondo asu, dimi, analingu, ekambi ami, kuyanga alami wakatshokaka la mi: untu lʼuntu aki paka la dihumo diandi lʼanya.