Read tetala Nehemiya 5 Bible Online

Nehemiya 5 - tetala bible

Nehemiya 5

¹Apami wa lu wudja la wadiewo wakalelela anengewo, asi Juda lʼalelu a wulu.

²Amotshi wakati vati: Shu la anʼasu wʼapami la anʼasu wʼamantu taya efula, watusha epunga wa shu nde mbayutuyala la lumu.

³Akina wakati vati: Shu hatukimo kete yasu, dikambo diasu dia vinyo, la mvudu yasu, dia shu ndjala la epunga lu nshi ya ndjala ka kasha.

⁴Akina wakati vati: Shu takasombe falanga ne dia kete yasu la dikambo diasu diʼelua, dia nfuta ulambu wa khumʼekanga.

⁵Ku kakiane alimba asu wambuyala uku alimba wʼanengesu, anʼasu uku anʼawo. Enda, tambukimo anʼasu wʼapami la anʼasu wʼamantu lu lohombo; la anʼasu wʼamantu amotshi wambutshokaka edja lu lohombo. Shu kema la wulu wa mbatshungula, kete yasu la dikambo diasu diambuyalaka diʼantu akina.

⁶Dimi lakuki kele ka wulu lamʼakamuki alelu awo la aui awo.

⁷Ku dime lakayambula, lakahangwela antu a waki, la elohe; lakawatela nti: Mete, nyu nsondjaka anengenyu la waho a wuki![4] Ku lakamotsha ului a wuki lʼutshimba awo,

⁸dimi lakawatela nti: Shu takatshungula anengesu asi Juda, wakasundjama le wedja, uku aki wulu asu. Ku nyu nyame nyambusundja anengenyu, nti: Kana shu mbukuki mbatshungula! Ku vo wakalembohala, nduku untu aki la diui dia nkaluya.

⁹Ku dimi lakawatela nti Dikambu diambunyutsha kema ololo. Undi, nyu hanyuhumbi nkendakenda lu woma wa Unyashungu asu, diaha shu monywama le wedja weli atunyi asu?

¹⁰Ndu dimi ntu, nyu analingu, la ekambi asu, dimi lakasondja falanga la epunga. Dimi lambunyosengasenga nti: Takimweli diango diakulesu.

¹¹Timi lambunyosengasenga elo nti: Nyakaluya kete yawo, dikambo diawo dia vinyo, eweli awo, la mvudu yawo, ndu etenyi etoi ka lukama ka falanga, kʼepunga, kʼashi wʼelua, ndu ka iso kakanyalombe waho.

¹²Vo wakakaluya diui vati: Shu tayakaluyadio, ndu natalomba nduku engo, shu tayutsha uku wataye. Osoku dimi laketi elombedi la ntundu kawo, lakatshibia dia vo nama diui diako.

¹³Ku dimi lakanyinginya ukutu ami, lata nti: Unyashungu anyinginya untu tshe wuhu one lʼandja a luudu landi la diango dia ndi luhulama daka. Untu ako kanyinganyami wuhu ako, katshikali anya hwe. Ului tshe wʼantu wakakitshiya vati: Ayali osoku! Wakandula Latuyalaka. Ku antu tshe wakatshi uku daka diawo.

¹⁴Umaka lushi lakambidji khumʼekanga umbuledi wa Juda, uma lʼeleku kʼakumi ahendi edja ndu lʼeleku kʼakumi asatu lʼahendi, ka diulelu dia khumʼekanga Aratashasta, aya deku dikumi la pendi, dimi la analingu kombosa diango diatosaka umbuledi.

¹⁵La ntundu kami, umbuledi wa ntundu wakahekuya wudja, wakalungulaka ma la wanu uma le wo, ladiku dia toshekele ta fesa akumi anei. Ndu ekambi awo wakasuyaka wudja. Dimi kuntsha wuhu oso uma lu woma wa Unyashungu.

¹⁶Uma laso, dimi lakakambi ulimu wa nongosola eheli kene ka lukumbu. Shu kunsumba nduku kete, ndu ekambi ami tshe wakasangana kame lʼulimu.

¹⁷Dimi lakayalaka la antu lukama la akumi itanu, asi Juda la elohe, lu mesa ami ladiku dia wane wakayakaka le su uma lu wedja wutudingi.

¹⁸Wakakatelaka la lushi la lushi ngombe otoi, ekoko esamalu wa losonola la fudu, ndu lʼatei a nshi dikumi, vo wakakatelaka wehu tshe wa wanu. Kuku dimi konomba diango diatosaka umbuledi, ne dia elimu waki wutshu le wudja one.

¹⁹Unyashungu ami li, umbuho ololo, ne dia kene tshe kakamatshela wudja one.