Read tetala Esta 1 Bible Online

Esta 1 - tetala bible

Esta 1

¹Lu nshi ya Ahasuero,[1] Ahasuero ako kakulela beke dia wedja lukama akumi ahendi la esambeli, uma lu kete ya lndiya pulu ndu lu kete ya Etiyopiya.

²Lu nshi yako, khumʼekanga Ahasuero akadjashi lu kiti kandi ka diulelu keli lu luudu la khumʼekanga la Susa, usumba a wuki.

³Lʼeleku ka satu ka diulelu diandi, ndi akatshela ewandji tshe waki lʼokongo andi, ekambi andi, ewandji wʼului wʼalimbi wʼasi Peresiya ndu wʼasi Mediya, antu a waki ndu embuledi wa beke wakasangana la ntundu kandi, dambu.

⁴Ndi akawaenya engonyi la lutumbu la diulelu diandi, nemo la wulu andi wa mamba nshi efula, nshi lukama la akumi enanei.

⁵Lamʼaketi nshi yako, khumʼekanga akatshela antu tshe waki lʼusumba a wuki wa Susa, ndu wa waki ndu wa tshitshe, dambu yediko ya nshi esambeli, lu seke diʼekambo ka luudu la khumʼekanga.

⁶Wakahane ahondo a wema, ndu wʼedima wakakelekami la ekodi wa linene wʼololo la wʼengingi lu ashingu wa fesa ndu lu dikoho diʼave wʼawadiawadi. Tangi ya paunyi la ya fesa yaki lʼudihi yakatshama lʼave wʼushinga a wulu wa tilili, wa ngaingai, wʼendondo ndu wʼedima.

⁷Vo wakawasha dinono lu akoho a waki wa paunyi, akoho a waki a wehu wehu. Wanu wa khumʼekanga wakakimwama efula lu lukahu la khumʼekanga.

⁸Keli vo konosha untu la khudu, ne dia khumʼekanga akadjangela antu tshe waki lu luudu landi, dia untu lʼuntu ntsha uku lulangu landi.

⁹Ndu Vashiti, khumʼekanga ka umuntu, akatshela amantu waki lu luudu la diulelu la khumʼekanga Ahasuero dambu.

¹⁰Lu lushi lʼesambeli la dambu, lamʼakangenangena utema a Khumʼekanga Ahasuero la wanu, ndi akatela Mehumana, Bizita, Harabona, Bingita la Abangita, Zetara la Karakasi, elenga esambeli wakakambaka lu luudu la khumʼekanga Ahasuero,

¹¹dia vo mbela khumʼekanga ka umuntu Vashiti la ntundu kandi ulimbi dembo diandi dia kusu dia lu khumʼekanga, dia menya wedja la ewandji dimena diandi, ne dia Vashiti aki dimena diahangone.

¹²Keli khumʼekanga ka umuntu Vashiti akatuni ndja lamʼakutumela khumʼekanga diui dia ndi ndja le elenga. Uma lu dikambu so, khumʼekanga akumala, akadanganela la kele ka wulu.

¹³Khumʼekanga akasawula la akanga a yimba wakeyaka elembe la dumbwelu.

¹⁴Lanʼeli ewandji esambeli wʼasi Peresiya la wʼasi Mediya, wakayalaka lasuki la khumʼekanga ndu waki lu dihuli dia ntundu lu diulelu diandi: Karashema, Shetara, Adimata, Tarashishi, Merese, Marasena, la Memukana.

¹⁵Ndi akawambula ati: Kata elembe, dia shu ntshela khumʼekanga ka umuntu Vashiti na? ne dia ndi hatshi uku diui diakutumedi khumʼekanga Ahasuero le elenga.

¹⁶Ku Memukana akakaluya diui la ntundu ka khumʼekanga la ewandji ati: Khumʼekanga ka umuntu Vashiti hakutshedi weme utu kolo, keli ndi akatshedi ndu ewandji tshe la antu tshe weli lu beke diaye dia wedja, we khumʼekanga Ahasuero, kolo.

¹⁷Dikambu ne diambutsha khumʼekanga ka umuntu diayeyama le amantu tshe, ku vo wayonyolaka waumewo. Ku wayutaka vati: Khumʼekanga Ahasuero akatela wadendi khumʼekanga ka umuntu Vashiti dia ndi ndja la ntundu kandi, keli ndi kuntsho.

¹⁸Umaka elo, wadi wʼewandji wa Peresiya la wa Mediya wayuka lukumu la dikambu dia mbutsha khumʼekanga ka umuntu ku wayuditelaka ewandji tshe wa khumʼekanga. Uma lu dikambu so, dionyo la kele ayuyala efula.

¹⁹Naka we khumʼekanga alanga, udjangi didjangu, wadifundi lʼatei wʼelembe wʼasi Peresiya la wʼasi Mediya, waheyi nkadimo, diaha Vashiti ndja ntu la ntundu kaye, we khumʼekanga Ahasuero. Usha umuntu luleki ololo dihuli diandi, dia khumʼekanga ka umuntu.

²⁰Lamʼayudiangana lukumu la didjangu diaye we khumʼekanga lu diulelu diaye, amantu tshe wayolemia waumewo, wa ladiku ndu wa wa lʼesi.

²¹Aui aso wakangenyangenya khumʼekanga la ewandji, ku khumʼekanga akatshi uku diui dia Memukana.

²²Khumʼekanga akatumi mikanda lu beke tshe dia diulelu, leke la leke uku efundelu kalo, wudja la wudja uku oteketa awo, ati: Pami tshe ayali uwandji wa luudu landi, kateketaki oteketa a wudja awo.