Read tetala Esta 3 Bible Online

Esta 3 - tetala bible

Esta 3

¹Lʼokongo wʼakambu aso, khumʼekanga Ahasuero akambiya Hamana, onʼa Hamedatana, usi Anganga; akawedia, akukitsha lʼedie ka ladiku dia die dia ewandji tshe waki lasuki la ndi.

²Ekambi tshe wa khumʼekanga wakemalaka la suku dia khumʼekanga, wakakhuselaka Hamana adui, wakotemolaka, ne dia osoku mbaki didjangu dia khumʼekanga lu dikambu diandi. Keli Morodekai kumbukhuselaka adui, kumbotemolaka.

³Ku ekambi wa khumʼekanga wakemalaka la suku dia khumʼekanga, wakambula Morodekai vati: Okoko wana wadiakaye olembe wa khumʼekanga?

⁴Lamʼakawawutelaka la lushi la lushi, ndi kumbaukela. Ku vo wakatutela Hamana dikambu diako, dia mena kana Morodekai ayushikikala lu esangweyu kandi. Vo wakawutela vati: Usi Juda kendi.

⁵Hamana akenyi ati: Morodekai hakhuse adui la ntundu kami, ndu hantemola, ku ndi akadanganela la kele.

⁶Keli ndi akonyola dia mbahe Morodekai ndame lunya, ne dia vo wakawutela wudja akona waki Morodekai. Ku ndi akalangi ndjaka wudja wa Morodekai, asi Juda tshe, wakatanema lu diulelu tshe dia Ahasuero.

⁷Lu ngondo ka ntundu, ketawo ngondo ka Nisana, lu eleku ka dikumi lʼahendi ka diulelu dia khumʼekanga Ahasuero, wakukaka Puru, kitshimudi ati: Uwali, la ntundu ka Hamana la lushi la lushi, ndu la ngondo la ngondo edja ndu lu ngondo ka dikumi lʼahendi, ketawo ngondo ka Adara.

⁸Hamana akatela khumʼekanga Ahasuero ati: Lʼatei a beke tshe dia diulelu diaye, eko wudja omotshi wakadiangaka ndu wuyalaledi lʼatei a wedja. Wudja ako weko la elembe wutshikitanyi lʼelembe wa wedia tshe, hawutulamaka elembe wa khumʼekanga. Nduku uhumba wa khumʼekanga mbatshika ki.

⁹Naka khumʼekanga nangaka, wafundi didjangu dia mbadiaka, ku dimi layukimo talata ya fesa nunu dikumi le wane weli la okende wʼakambu wa knumʼekanga, dia vo yikitsha lu waumbelu wa khumʼekanga.

¹⁰Khumʼekanga akanya lohete la ndi uma lu lunya, akaludji Hamana, onʼa Hamedatana usi Anganga, utunyi wʼasi Juda.

¹¹Khumʼekanga akatela Hamana ati: Wakakusha falanga, ndu wudja one pupu; uwatsheli uku alangaye.

¹²Ku lushi la dikumi lʼasatu la ngondo ka ntindu, waketi afundji wa khumʼekanga. Ku vo wakayufunda kene tshe kakadjangela Hamana olohe wa khumʼekanga, embuledi wa beke tshe dia wedja, ndu ewandji wa wedja tshe, leke la leke uku efundelu kawo, ndu wudja la wudja uku oteketa awo. Wakafundi mikanda lu lukumbu la khumʼekanga Ahasuero, ku wakemati la lohete la khumʼekanga.

¹³Wakatumi mikanda ako la andawi lu beke tshe dia wedja dia khumʼekanga, dia vo nanya, ndjaka la nshila asi Juda tshe ushiki, akenda ndu esumbi, amantu la ana wʼashashi lu lushi otoi, lushi la dikumi lʼasatu la ngondo ka dikumi lʼahendi, ketawo ngondo ka Adara, ndu dia vo mumba diango diawo dimbu.

¹⁴Mikanda waki la dikatshi diakafundami olembe wakawahumbi nyanganya lu leke la leke tshe, ndu diakaweti wedja tshe dia vo ndjalongosola lushi lako.

¹⁵Andawi wakatshu esadi uku diui dia khumʼekanga. Olembe ako akadiangana ndu lu Susa, usumba a wuki. Ku lamʼaki khumʼekanga la Hamana lu no, usumba wa Susa wakakasana.