Read tetala Esta 9 Bible Online

Esta 9 - tetala bible

Esta 9

¹Lu lushi la dikumi la satu la ngondo ka dikumi lʼahendi, ketawo ngondo ka Adara, lushi lakahumbi diui la didjangu dia khumʼekanga ntshama, lakalungamela atunyi wʼasi Juda mbaulela, lo lakakadimo lushi la asi Juda mbulela atunyi awo.

²Asi Juda wakasangana lu esumba awo lu beke tshe dia kete ya khumʼekanga Ahasuero dia mbahe waku wakalangi mbatshela kolo lunya. Nduku untu akeyi nsemanela la wo, ne dia woma awo akandi wedja tshe.

³Ewandji tshe wa beke, elohe, embuledi la waku wakatshaka ulimu wa khumʼekanga, wakakimanyia asi Juda, ne dia vo wakatela Morodekai asulu.

⁴Morodekai akayala untu a wuki lu luudu la khumʼekanga. Lukumu landi lakadiangana lu beke tshe, ne dia ndi akatakolamelaka mpama.

⁵Asi Juda wakahiki atunyi awo tshe tombo, wakadiaki, wakashili ushiki; wakatshela waku wakahetshaka uku akawalangi.

⁶Lʼusumba a wuki wa Susa, asi Juda wakadiaki, wakalanya apami kama tshanu.

⁷Vo wakadiaki ndu Parashandata, Dalafona, Aspata,

⁸Porata, Adaliya, Aridata,

⁹Paramashita, Arisai, Aridai la Vayizata,

¹⁰ana wʼapami dikumi wa Hamana, onʼa Hamedatana, utunyi wʼasi Juda. Keli vo kumumba diango diawo dimbu.

¹¹Lushi lako, wakayutela khumʼekanga lukumu lʼefula ka waku wakadiakema lʼusumba a wuki wa Susa.

¹²Khumʼekanga akatela khumʼekanga ka umuntu Esta ati: Asi Juda wambudiaka, wambulanya apami kama tshanu lʼusumba one wa Susa kame la ana aoami dikumi wa Hamana; keti lu beke dikina dia khumʼekanga! Ku kakiane, na elombelo kaye? Wayukushato. Alangaye ntu na? Vo wayukutshela to.

¹³Esta akûkaluya diui ati: Naka we khumʼekanga nangaka, etawo asi Juda wudjashi la Susa ntsha ndu lui uku didjangu diʼelo. Kawuhane ana apami dikumi wa Hamana lʼutamba.

¹⁴Khumʼekanga akadjanga dia vo ntsha osoku. Didjangu diakadiangana lu Susa, ku wakahane ana apami dikumi wa Hamana.

¹⁵Asi Juda waki la Susa wakasangana lushi la dikumi lʼanei la ngondo kako ka Adara, wakadiaki apami kama shatu lu Susa, keli vo kumumba diango diawo dimbu.

¹⁶Asi Juda akina wakadjashi lu beke dia khumʼekanga wakasangana kame, wakayashimbela, wakakundja mumuya. Vo wakayashimbela uma le atunyi awo, wakadiaki apami akumi esambeli la atanu lʼatei a waku wakahetshaka, keli vo kumumba diango dimbu.

¹⁷Akambu aso wakatshama lu lushi la dikumi lʼasatu la ngondo ka Adara. Okone vo wakumuya lushi la dikumi lʼanei, ku vo wakalete lushi la wuki ndu lʼongenongeno.

¹⁸Keli asi Juda wakadjashi la Susa, wakasangana kame lu lushi la dikumi lʼasatu la ngondo kako, ndu lu lushi la dikumi lʼanei. Ku vo wakayumuya lushi la dikumi lʼatanu, wakalete lushi la wuki ndu lʼongenongeno.

¹⁹Diako mbateteka asi Juda wudjashi lu tusamba ndu lu ngelu yaha la kumbu lushi la dikumi lʼanei la ngondo ka Adara lushi lʼongenongeno la wuki, lushi lʼololo ndu lushi la ntumanela diango.

²⁰Morodekai akafundi akambu ane, akatumi mikanda le asi Juda tshe waki lu beke dia lasuki ndu diʼetali dia diulelu dia khumʼekanga Ahasuero.

²¹Ndi akawadjangela dia vo mumuyaka lushi la dikumi lʼanei, la lushi la dikumi lʼatanu lu ngondo ka dikumi lʼatanu lʼeleku lʼeleku,

²²uku nshi yakakundja asi Juda mumuya, yakawayashimbela uma le atunyi awo, la ngondo kakakadimo lunyangu lawo ongenongeno, la delu diawo lushi la mumuya, dia mbete nshi yako nshi yʼongenongeno, yʼantu ntumanelaka diango ndu ya mbishaka asi wula eshasha.

²³Asi Juda wakatshi uku akawatatela ntsha, ndu uku akafundela Morodekai,

²⁴ne dia Hamana, onʼa Hamedatana, usi Anganga, utunyi wʼasi Juda tshe, akasanguya dia mbadiaka tshe. Ndi akuki Puru,[4] kitshimudi ati: Uwali, dia nbadiaka la mbashila ushiki.

²⁵Keli lamʼakakumi dikambu so la ntundu ka khumʼekanga, ndi akafundja mikanda dia esangweyu ka koiu ka Hamana, kakandasanguya dia ndjaka asi Juda, nkalula lʼote andi, dia ndi la anʼandi wʼapami mpanema lu etamba.

²⁶Uma lu dikambu so, antu mbetaka nshi sho vati: Purima, uma lu diui Puru. Uma lu aui tshe wa lu mukandʼone, ndu uma lu akambu wakenyi asi Juda vame lu dikambu ne, ndu uina lu akambi wakayi le wo,

²⁷vo wakatshiki daka la dokoloko diahakadimnki dia vo, tukanula tawo la wane tshe wayumamema nemiaka nshi hyendi nye lʼeleku lʼeleku lu tena diayo uku ufundami;

²⁸la dia antu mpumbaka mbuho nshi nye la ndjilemiaka lu lolonga la lolonga lu khumbu la khumbu, lu leke la leke ndu lʼusumba lʼusumba; diaha nshi nye ya Purima nshisho uma lʼatei wʼasi Juda, kuyanga euhwelu kayo nshila lʼatei a tukanula tawo.

²⁹Ku khumʼekanga ka umuntn Esta, onʼa Abihayili, la Morodekai, usi Juda, wakafundi aui a wulu dia nshikike mukanda one wa hendi wa Purima.

³⁰Ndi akatumi mikanda le asi Juda tshe lʼatei a oeke lukama akumi ahendi la esambeli dia diulelu dia Ahasuero la aui wa ki la kolamelu,

³¹dia nshikike nshi ya Purima nye lu tena diayo, uku akati Morodekai, usi Juda, la khumʼekanga ka umuntu Esta; ndu uku akawayandjangela, vo la tukanula tawo lu dikambu dia ekilelu kawo ka ma la elelu awo.

³²Didjangu dia Esta diakashikike akambu ane wa Purima. Ku dio diakafundama lu buku.