Read tetala Etumbelu 10 Bible Online

Etumbelu 10 - tetala bible

Etumbelu 10

¹Ku Latuyalaka akatela Mose ati: Utshu le Farayo. Dimi lakakikitsha utema andi la etema wa ekambi andi, dia dimi menya akambu wa mamba lʼatei awo.

²Ku we ayeya nkondwela onʼaye la ukana aye uku akamatshela asi Edjibitu, ndu akambu wa mamba wakamatshi lʼatei awo. Okone nyu nyayeya nyati: Dimi keli Latuyalaka.

³Ku Mose la Arona wakatshu le Farayo; wakatuwuteia vati: Latuyalaka, Unyashungu wʼasi Heberu, kata ati: Edja ndu kaandi ayuyutuna ndjakitshakitsha la ntundu kami? Ukimo wudja ami watshu dia ntontemola.

⁴Enda, naka we ayutuna nkimo wudja ami dia vo ntsho, dimi layutuma endjo lui lu kete kaye.

⁵Vo wayukumba diku dia kete wuhu waheyi untu mena kete. Ku vo wayole diango diakatshikala le nyu uma lu ngimbi ka mboko. Vo wayole etamba anyu tshe watuyalaka lu dikambo.

⁶Vo wayulula lu mvudu yaye, yʼekambi aye, ndu yʼasi Edjibitu tshe. Uma lu nshi ya washenyu kuyanga ya watshenyu, dikambu dia wuhu oso diatenamaka nduku lushi lu kete edja ndu elo. Ku ndi akakadimo, akatumbi uma laka Farayo.

⁷Ekambi wa Farayo wakawumbula vati: Edja ndu kaandi ayuyala pami kene djunga le su? Ukimo antu ane watshu dia ntotemola Latuyalaka, Unyashungu awo. We henyi wati: Kete ya Edjibitu tshe yambulana?

⁸Okone wakayi le Mose la Arona ntu, ku ndi akawatela ati: Nyutshu nyutotemole Latuyalaka, Unyashungu anyu. Keli wana wayutsho?

⁹Mose akakaluya diui ati: Shu tayutsho kame la anʼasu wa tshitshe, ndu la esumbi asu; shu tayutsho kame la anʼasu wʼapami la anʼasu wʼamantu ndu la nyimba yasu yʼekoko ndu ya ngombe, ne dia dieli la su dia ntuyala la lushi la wuki le Latuyalaka.

¹⁰Farayo akawutela ati: Latuyalaka ayali la nyu lamʼayangami nyukimo dia nyu ntsho, nyu la anʼanyu! Nyewo, lukulu lʼengeno leko la ntundu kanyu.

¹¹Kema! nyutshu nyu apami, nyutotemole Latuyalaka, ne dia osoku mbalanganyu. Ku vo wakawatshanya uma la ntundu ka Farayo.

¹²Latuyalaka akatela Mose ati: Usimbuli lunya laye ladiku dia kete ya Edjibitu dikambu dia endjo, dia vo ndjala lu kete ya Edjibitu, ndu dia ndjole tumbatumba tshe dia lu kete, kene tshe kakatshiki ngimbi ka mboko.

¹³Ku Mose akasimbula danga diandi ladiku dia kete ya Edjibitu, ku Latuyalaka akapepia lopepe lʼuma lʼehutwelu ka unya ladiku dia kete yanyi tshe ndu lʼutshu tshe. Lamʼakahuto unya, lopepe lʼuma lʼehutwelu lakela endjo.

¹⁴Endjo wakadiangana lu kete ya Edjibitu, wakakukanela lʼutundu wa kete ya Edjibitu. Vo waki efula wuhu wahatenama, ndu wahenamaki pundju; vo waki sui dia wulu.

¹⁵Vo wakakumbi diku dia kete tshe, ku kete yakayala udjima.[25] Wakali tumbatumba tshe dia la kete ndu elua tshe wa lʼetamba wakatshiki ngimbi ka mboko. Nduku engo kʼeleselese kakatshikala, utamba kana eunune ka lʼekambo, kakiwo konde lu kete ya Edjibitu.

¹⁶Ku Farayo aketi Mose la Arona esadi; akati ati: Dimi lakatshela Latuyalaka, Unyashungu anyu, kolo, lakanyutshela ndu nyu kolo.

¹⁷Okone, lambukosengasenga kakiane nti: Unyimanyia kolo kami etena kene ketu. Nyonombele Latuyalaka, Unyashungu anyu, paka dia ndi minyiyami nyoi kene.

¹⁸Ku Mose akatumbi uma laka Farayo, akatolomba Latuyalaka.

¹⁹Latuyalaka akapepia lopepe la wulu lʼuma lʼedjelu, ku lo lakakaluya endjo, lakatuwedja lʼUduwa a Tilili. Nduku ondjo otoi akatshikala lu kete kʼutundu ka Edjibitu.

²⁰Keli Latuyalaka akakikitsha utema wa Farayo, okone ndi kunkimo asi Isariyele dia vo ntsho.

²¹Ku Latuyalaka akatela Mose ati: Edia lunya laye utsha lʼulungu keli udjima wayali lu kete ya Edjibitu, udjima wukukiwo munanda.

²²Okone Mose akedia lunya landi utsha lʼulungu, ku udjima wa hito[26] wakayala nshi shatu lu kete ya Edjibitu.

²³Lʼatei a nshi shatu sho, nduku untu lakeyi mena unyandi, kana mumo lu dihuli diakindi utsha lu dihuli dikina. Keli usasi wakiko lu ahuli wakadjashi asi Isariyele tshe.

²⁴Farayo aketi Mose, akati ati: Nyutshu, nyutotemole Latuyalaka. Ndu anʼanyu mbeyaka ntsho kame la nyu, tshikima dungalunga dianyu mbayutshikala.

²⁵Keli Mose akati ati: Dieli la ye dia mbetawo shu ntsho la elambu wa lutshumba lu anya asu, dia shu ntulambula Latuyalaka, Unyashungu asu.

²⁶Shu tayutsho ndu la dungalunga diasu tshe. Nduku lusanga otoi layutshikala, ne dia shu tateyi engo kayutuhumba nkimo le Latuyalaka, Unyashungu asu. Tshikima shu tambukuma leko, mbayututeya ulambu wa nambula Latuyalaka.

²⁷Keli Latuyalaka akakikitsha utema wa Farayo; ndi kumbetawo mbakimo.

²⁸Ku Farayo akawutela ati: Umo uma la le mi; uyalami. Tenaki elundji kami ntu pundju, ne dia lushi layuyena elundji kami, we ayuvo.

²⁹Ku Mose akati ati: Kawo kataye! dimi halena elundji kaye ntu.