Read tetala Etumbelu 17 Bible Online

Etumbelu 17 - tetala bible

Etumbelu 17

¹Ului tshe wʼasi Isariyele wakunela uma lʼusui wa shenga wa Sine, wakatakendakendaka uku kendo yakawadjangela Latuyalaka, ku wakatuhanga la Refidime. Keli antu kuntana ashi wa no leko.

²Okone antu wakadji la Mose lundju, wakati vati: Utusha ashi wa no. Mose akawambula ati: Ukundi adjanyu la mi lundju? Okoko wana wedikanyu Latuyalaka?

³Antu wakadienyi la pusa kʼashi leko. Ku vo wakangunangunela Mose vati: Okoko wana wakayatutundja uma lʼEdjibitu, dia ndjutudiaka, shu la anʼasu la dungalunga diasu la pusa kʼashi?

⁴Ku Mose akaleli le Latuyalaka ati: Ngandi ayumutsha la wudja one? Vo weko suki la ndjalongosola dia mbukami ave.

⁵Latuyalaka akatela Mose ati: Eti la ntundu ka wudja, we la dihangamendi dia Isariyele. Ukimeli danga diakayakomola lu ndjali ka Nile lu lunya laye, okendekende.

⁶Enda, dimi layutemala la ntundu kaye ladiku dia dive dia wuki, la Horeba. Kokomole dive diako, ku ashi wayutumba uma loko, diʼantu no. Mose akatshi osoku la ntundu ka dihangamendi dia Isariyele.

⁷Ndi akole dihuli diako ati: Masa (kitshimudi ati: Edikelu), la Meriba (kitshimudi ati: Lundju), ne diʼasi Isariyele wakami ndu wakedika Latuyalaka; wambwana vati: Latuyalaka eko lʼatei asu, kana kema?[47]

⁸Ku Amaleka akayi, akayolo la Isariyele ta la Refidime.

⁹Mose akatela Jashua ati: Utosonwele apami; utumbi, utolo la Amaleka ta. Ku lui, dimi layemala lʼote a dikuna la danga dia Unyashungu lu lunya lami.

¹⁰Okone Jashua akatshi uku akawutela Mose, akalo la Amaleka ta. Ku Mose, Arona la Hura wakambela lʼote a dikuna.

¹¹Lamʼakedia Mose lunya landi, Isariyele wakaleki wulu. Keli lamʼakandahuluya lunya landi, Amaleka akaleki wulu.

¹²Keli anya wa Mose wakole. Ku vo wakela dive dimotshi, wakayukitshiyadio, ku ndi akadjase ladiku a dio. Arona la Hura wakakimela anya andi, one wedi one wedi. Okone anya andi wakatshikala wulu, edja ndu lamʼakadji unya.

¹³Ku Jashua akalembia Amaleka la wudja andi la diesa dia yombo.

¹⁴Latuyalaka akatela Mose ati: Ufundi dikambu ne lu buku, dia nama euhwelu. Uteli Jashua wati: Latuyalaka ayushisha euhwelu ka Amaleka pundju lʼesi ulungu.[48]

¹⁵Ku Mose akatshi ediakelu, akakiole ati: Jehowa-Nisi (kitshimudi ati: Latuyalaka keli ekuhu kami ka koi).

¹⁶Ndi akati ati: Lunya lambediama ladiku diʼekuhu ka koi ka Latuyalaka! Latuyalaka ayolokaka la Amaleka ta lu lolonga la lolonga.