Read tetala Etumbelu 18 Bible Online

Etumbelu 18 - tetala bible

Etumbelu 18

¹Jetero, olombedi wa Midiyana, ukilu a Mose, akuki akambu tshe wakatshela Unyashungu Mose la wudja andi Isariyele, uku akatundja Latuyalaka Isariyele uma lʼEdjibitu.

²Jetero, ukilu a Mose, akose Zipora, wadi a Mose, lakandunyia,

³ndi la ana andi ahendi wʼapami,[49] lukumbu la omotshi laki, Ngereshoma (ne dia Mose akati ati: Ongendangenda mbudjashimi lu kete ya kana),[50]

⁴la lukumbu la ukina laki, Eliezere (ne dia Mose akati ati: Unyashungu a papa keli ekimanyelu kami, ndi kakanshimbela uma lu yombo ya Farayo).

⁵Ku Jetero, ukilu wa Mose, akunela la wadi a Mose la anʼandi ahendi wʼapami, ku vo wakakumi le Mose lu dihuli diakandahangi lʼusui wa shenga, lʼukungu wa Unyashungu.

⁶Lamʼakawatutela Mose vati: Ulungi, ukilu aye Jetero eko lu ndjayi le ye, la wadeye la anʼandi ahendi wʼapami,

⁷ku Mose akatshu dia ntuhumana la ukilu andi lu mbuka; ndi akolemia, akawusha moyo. Vo wakambwana dia wulu wʼalimba awo; wakayoto lu luudu la dipema.

⁸Ku Mose akasanyia ukilu andi diʼakambu tshe wakatshela Latuyalaka Farayo la asi Edjibitu dikambu dia Isariyele, diʼasui wakayakaka le wo lu mbuka, ndu dia okone akatshungula Latuyalaka.

⁹Ku Jetero akangenangena dia ololo tshe wakatshela Latuyalaka Isariyele, ndu okone akandatshungula uma lʼanya wʼasi Edjibitu.

¹⁰Ku Jetero akati ati: Latuyalaka, lakanyutshungula uma lʼanya wʼasi Edjibitu ndu wa Farayo, atumbwami! One lakatshungula wudja andi uma lu anya wʼasi Edjibitu, atumbwami!

¹¹Kakiane dimi lambulimbitela nti: Latuyalaka ndeka ditemolatemola tshe wuki, ndu ndeka asi Edjibitu lu akambu wakawayasemaka wulu.

¹²Jetero, ukilu a Mose, akalambula Unyashungu elambu wa lutshumba la elambu ekina. Ku Arona la dihangamendi tshe dia Isariyele wakayi dia ndjole la ukilu wa Mose ma la ntundu ka Unyashungu.

¹³La wedi a pindju, Mose akadjase lu elumbwelu dia mbala akambu wʼantu. Ku antu wakemala la ntundu kandi umaka pindju edja ndu la dikolo.

¹⁴Lamʼakenyi ukilu a Mose akambu tshe wakatshela Mose wudja, ndi akawumbula ati: Katshaye la antu ane? Okoko wana wadjaseye weme, ku antu ane nkemalelaka umaka pindju edja ndu dikolo?

¹⁵Ku Mose akakaluya ukilu andi diui ati: Wudja one ndjakaka le mi, dia ndjumumbula akambu uma le Unyashungu.

¹⁶Lamʼatuwuyalaka la dikambu, vo ndjaka le mi. Ku dimi ndjasambulaka, la mbalimbitshiya adjangu wa Unyashungu, la sangweyu diandi.

¹⁷Ku ukilu a Mose akûkaluya diui ati: Wuhu watshaye one, kema ololo.

¹⁸Nyu nyayokomo alimba, we la wudja one, ne dia dikambu ne diambuleka wulu aye. We hakuki ntsha dikambu ne weme.

¹⁹Umbukeli; nkuteli kanyi motshi, la Unyashungu ayalaki la ye! Uyali oteketshi wʼantu le Unyashungu; kotolaki akambu awo le ndi.

²⁰Kuwaetshaki adjangu la sangweyu, kuwalimbitshiyaki mbuka kahumbawo ndjela, la ulimu wahumbawo ntsha.

²¹Dikambu dikina, osonole apami a wulu uma lʼatei a wudja tshe, wane wuka Unyashungu woma, akanga a mete, wane watuhetshaka ekundjelu kʼuma lu lukesu, akitsha ladiku dia wudja one, dia vo ndjala uku embuledi wʼantu kinunu kinunu, wʼantu lukama lukama, wʼantu akumi atanu atanu, ndu wʼantu dikumi dikumi.

²²Vo wakawusambulaki akambu wʼantu tena tshe. Kawelaki akambu tshe a waki le ye, keli vame kawusambulaki tukambukambu. Osoku mbayuyukitshakitsha wutshu aye, ku vo wayuwemba kame la ye.

²³Naka we ayutsha dikambu ne, ndu naka Unyashungu ambukudjangela dia we ditsha, ku we ayuyalaka la wulu lʼulimu aye, la wudja one tshe wayukuma lu dihuli diawo la ki.

²⁴Ku Mose aketawo diui dia ukilu andi; akatshi uku akandawutela.

²⁵Mose akasonola apami wʼololo wa mete uma lʼatei wa Isariyele tshe, akawaete ete wa wudja: embuledi wʼantu kinunu kinunu, wʼantu lukama lukama, wʼantu akumi atanu atanu, ndu wʼantu dikumi dikumi.

²⁶Ku vo wakasambulaka akambu wʼantu tena tshe. Vo wakayakaka la akambu a wulu le Mose, keli vo wakasambulaka tukambukambu tshe vame.

²⁷Mose akakendja ukilu andi Jetero. Ku ndi akakalula utsha lu kete yawo.