Read tetala Etumbelu 19 Bible Online

Etumbelu 19 - tetala bible

Etumbelu 19

¹Asi Isariyele wakakumi lu ngondo ka satu, lʼokongo wʼetumbelu kawo uma lʼEdjibitu, lʼusui wa shenga wa Sinai.

²Lamʼakawunela uma la Refidime, vo wakakumi lʼusui wa shenga wa Sinai, ku wakahangi lʼusui ako. Isariyele wakahangi leko, la ntundu kʼUkungu a Sinai.

³Mose akambela utsha le Unyashungu. Ku Latuyalaka akaweti uma ladiku diʼukungu; akawutela ati: Uteli ana wa Isariyele, khumbu ka Jakoba, wati:

⁴Nyu nyakenyi okone akamatshela asi Edjibitu, ndu uku akamanyembe ladiku diʼahafu wa pungu dia nyela uya le mi.

⁵Kakiane, naka nyayulunga diui diami, ndu nyayulama daka diami, nyu nyayuyala wudja ami lʼatei a wedja tshe,[51] ne dia kete tshe yeli yami.

⁶Nyu nyayuyala diulelu diʼelombedi[52] ndu wudja wʼekila le mi.[53] Aui aso mbayuyutela asi Isariyele.

⁷Ku Mose akayi, aketi dihangamendi dia wudja. Ndi akati aui aso tshe la ntundu kawo, uku akawudjangela Latuyalaka.

⁸Wudja tshe wakûkaluya diui vati: Shu tayutsha akambu aso tshe wakati Latuyalaka. Ku Mose akatole aui a wudja le Latuyalaka.

⁹Ku Latuyalaka akatela Mose ati: Ulungi, dimi lu ndjayi le ye lʼatei a dingi dia hito, dia antu mbuka lamʼayumoteketa la ye, dia vo nketawo ndu we pundju. Ku Mose akatela Latuyalaka aui wa wudja.

¹⁰Latuyalaka akatela Mose ati: Utshu le wudja utakidia elo la lui. Kawusuli ahondo awo,

¹¹kawuyalongosole dia lushi la satu; ne dia lushi la satu mbayumuhulo ladiku diʼUkungu a Sinai, lu ashu wʼantu tshe.

¹²Kundjeli wudja ulelu lʼutshimba awo. Kuwateli wati: Nyewo, tanyumbelaki lʼukungu kuyanga mbunanda lʼokenge. Untu tshe layunanda ukungu, ayudiakema.

¹³Antu tawunandaki untu ako, keli wawuki ave kana pitu. Kana untu kuyanga nyama, ndi tatshikalaki la lumu.[54] Lamʼayuda dimama edja, antu tshe kawumbeli lʼukungu.

¹⁴Okone Mose akahulo uma lʼukungu utsha le antu, akatakidia, ku vo wakasuli ahondo awo.

¹⁵Ku ndi akatela antu ati: Nyuyalongosole ne dia lushi la satu, pami tshe teyanaki la umuntu.

¹⁶Okone la pindju ka lushi la satu, dingi dia tshududu diakahema ladiku diʼukungu. Akhungula la angadimu wa ndjadi[55] wakayala, ndu lundju la dimama lakatamanya ndjala wulu. Wudja tshe waki lu pangu, wakandama la woma.

¹⁷Mose akatundja antu uma lu pangu dia ntuhumana la Unyashungu. Ku vo wakatemala la tshina diʼukungu.

¹⁸Ukungu a Sinai tshe wakayala dinga tu, ne dia Latuyalaka akahulo loko lʼatei wa dja.[56] Dinga so diakambela, uku dinga diʼuma lu khuka ka dja. Ku ukungu tshe wakadidima wulu.

¹⁹Lamʼakatatekoyaka lundju la dimama ndjala wulu, Mose akateketaka. Ku Unyashungu akûkaluyaka diui lu dikhungula.

²⁰Latuyalaka akahulo ladiku diʼUkungu a Sinai lʼote wʼukungu. Latuyalaka aketi Mose dia ndi mumbela lʼukungu, ku ndi akambela.

²¹Latuyalaka akatela Mose ati: Uhulo, utewuli antu, tawulekanaki ulelu uya le mi dia nshishima, ne dia ului a wuki lʼatei awo watukuvo.

²²Ndu elombedi watusukanaka le Latuyalaka, kawutayakidisha, ne dia Latuyalaka atukuyakungutwela.

²³Mose akatela Latuyalaka ati: Wudja hawudela lʼUkungu a Sinai; ne dia we akatokokomiya wati: Nyudji ulelu lʼutshimba wʼukungu, nyukidia.

²⁴Latuyalaka akûkaluya diui ati: Uhulo, kumbeli we la Arona. Keli elombedi la utundu a wudja, tawulekanaki ulelu dia mumbela uya le mi, ne dia dimi ntukuyakamwela.

²⁵Ku Mose akahulo utsha le antu, akatuwatela.