Read tetala Etumbelu 22 Bible Online

Etumbelu 22 - tetala bible

Etumbelu 22

¹[78]Naka untu ayuva ngombe kana okoko, ku ndi ambudiaka kana mbusundja, ndi ayufuta ngombe tshanu lʼote a ngombe otoi, la ekoko enei lʼote wʼokoko otoi. Dieli la ndi dia nsombola nyama kako. Naka ndi kema la engo, dieli la ndi dia nsundjama ndame, ne dia uvi andi.

²Naka nyama kuvindi keki la lumu lu anya andi, naka ngombe, punda kana okoko mbeto, dieli la ndi dia nfuta nyama hyendi.

³Naka wambunda uvi tshu kʼamʼavandi, ku wambokomola edja ndu ndi ambuvo, antu haweyi ndjala la unungu wa dikila diandi.

⁴Keli naka wambudiaka la yanyi, wayuyala la unungu lu dikambu diandi.

⁵Lamʼalanyia untu unyandi ekambo ka mbu ya nde kana kʼelua, kuyanga nkimo elungalunga kandi dia to nde diango loko, ndi ayufuta tshe uma lu diango diuleki amena uma lʼekambo kandi ka mbu ya nde kana kʼelua.

⁶Lamʼatshumba untu dja lu adiyu, ku dja yambulalo, yambutshumba mbu ya nde ya kana, yakawane kana yeki lu atshina, utshumbi wa dja ayufuta tshe.

⁷Naka untu ambusha unyandi falanga kana diango dia ndi mbumbela, ku uvi ambutudiva uma lu luudu la umumbi, ku wambutuwunda, ndi kafuti diango pendi pendi lʼote wa engo lʼengo kakandoshi.

⁸Keli naka uvi hatanemi, dieli la kanga luudu dia nsukana le Unyashungu, dia antu mbeya vati: Ndame kombosa diango dia unyandi.

⁹Lu dikambu tshe dia lukesu lʼasa antu ahendi, dia ngombe, punda, okoko, oloto kana engo kekina kushishwi, kayuwuta untu lʼuntu ati: Kami keto, wakumia dikambu la ntundu ka Unyashungu. Ku one layanyema le Unyashungu, ayufuta unyandi diango pendi pendi lu engo lʼengo.

¹⁰Naka untu ambukimiya unyandi punda, ngombe, okoko kana nyama kekina, ku nyama kako kambuvo, kana kambuhumo, kana kambushisho ku untu hakienyi,

¹¹ulami wa engo katshibi lu lukumbu la Latuyalaka ati: Dimi kombosa engo ka unyami. Osoku kanga engo kushishwi ayetawo etshibelu kandi, ku unyandi hayala la unungu wa nfuta engo kakashisho.

¹²Keli naka untu ambuva elungalunga lamʼeto lʼanya wʼulami, dieli la ulami dia nfuta kanga to.

¹³Naka to kambundama le nyama, ulami kakiela uku omenyi, laso ku ndi hahumbi nkifuta.

¹⁴Naka untu ambamba elungalunga ka unyandi ku to kambutuhumo, kana kambutuvo lamʼeli kanga to kema, dieli la one lakakiambi dia nkifuta.

¹⁵Keli naka kanga elungalunga akiko, one lakambi hafuti utundu wa nyama, paka ushinga wa diambu wakawalakana.

¹⁶Naka pami ambulanya usekaseka a umuntu wʼemuma, wahatambamela, ku ambeyana la ndi, dieli la ndi dia mbidja mbu lu dimba diandi, dia ndi mbutshuka.

¹⁷Keli naka shi umuntu hetawo ndi mbutshuka, pami kako ayufuta falanga uku olembe lu dikambu dia esekaseka wʼamantu wa dimuma.[79]

¹⁸Tetawoki dia umuntu kanga doka[80] ntshikala la lumu.

¹⁹Untu tshe layeyana la nyama kemotshi ayudiakema.[81]

²⁰Untu tshe layulambula etemolatemola kekina, aha le Latuyalaka ndame, ayulanyema.[82]

²¹Tutshelaki ongendangenda kolo kuyanga mbusuya, ne dia ndu nyu mbaki angendangenda lu kete ya Edjibitu.

²²Tusuyaki wadi aki udu, kuyanga ona etshiki.[83]

²³Naka we ambasuya, ku vo wambundelela, mete, dimi layuka alelu awo.

²⁴Kele kami kayoheta, dimi layunyudiaka la yombo, ku wadienyu wayuyala wadi waki edu, la anʼanyu wayuyala ditshiki.

²⁵Naka we ambosondja usi wula a lu wudja ami falanga, tuyalaki uku osondjanyi le ndi. Tolombaki nduku waho.[84]

²⁶Naka we ambosa dihondo dia unyaye okole, kukaluyadio la ntundu ka unya atadji,

²⁷ne dia dio tu mbatundolotaka, ndu mbatunduyakumbaka. Kakona kukukindi ndjakumba? Naka ndi ambundelela, dimi layuka, ne dia kanga ketshi kemi.[85]

²⁸Totengaki Unyashungu, kuyanga mbidja umbuledi a wudja aye mananu.[86]

²⁹Tutshimbatshimbaki dia nambula olonga aye wa mbu ya nde, ndu wʼelua wa dinela diaye. Kumbishaki onʼaye a pami lʼenundu.

³⁰Osoku mbayuyutsha ndu la ngombe yaye ndu la ekoko aye. One lʼenundu tshe ayutshikala la nyangu nshi esambeli, ku we mbishamindi lushi lʼenanei.

³¹Nyayuyala ekilami ami wʼapami. Tanyolekaki nyama kambundama lʼusui le nyama.[87] Kanyukishaki fo.