Read tetala Etumbelu 24 Bible Online

Etumbelu 24 - tetala bible

Etumbelu 24

¹Unyashungu akatela Mose ati: Umbeli, we la Arona, Nadaba, la Abihu ndu dihangamendi akumi esambeli dia Isariyele; nyotemolaki tshalula.

²Mose ndame kasukani le Latuyalaka, keli akina tawusukanaki; ndu wudja tawumbelaki kame la ndi.

³Mose akayi, akayusanyia antu aui tshe wa Latuyalaka, ndu adjangu andi. Ku antu tshe wakûkaluya diui kame vati: Tayutsha aui tshe wakati Latuyalaka.

⁴Ku Mose akafundi aui wa Latuyalaka tshe. Ndi akunela kʼolomo la pindju, akatshi ediakelu la tshina diʼukungu, ndu dikoho dikumi la pendi, uku wedja dikumi la ehendi wa Isariyele.

⁵Ndi akatumi elongo wʼapami wʼasi Isariyele, dia ntulambula elambu wa lutshumba, la ndjakela Latuyalaka ngombe, elambu wa ki.

⁶Mose akose etenyi ka hendi ka dikila, akangula lu alonga. Ku ndi akamonge etenyi ka hendi ka dikila lʼediakelu.

⁷Ku ndi akose buku dia daka dia Unyashungu, akadialela antu. Ku vo wakati vati: Tayutshaka tshe kakati Latuyalaka, ndu tayukitanyiaka.

⁸Ku Mose akose dikila, akamonge antu, ata ati: Nyendi dikila dia daka,[100] diakalakana Latuyalaka la nyu uku aui aso tshe.[101]

⁹Ku Mose akambela lʼukungu, ndi la Arona, Nadaba, la Abihu, kame la dihangamendi akumi esambeli dia Isariyele.

¹⁰Ku vo wakenyi Unyashungu wa Isariyele. La tshina diʼakaka andi kaki ave wa ngaingai wa lokolonga, wufanyi la ulungu vame lu pudipudi kawo.

¹¹Ndi kunsimbula lunya landi dia ntshela dihangamendi dia Isariyele kolo. Vo wakenyi Unyashungu, keli wakali, wakano.

¹²Latuyalaka akatela Mose ati: Umbeli uya le mi lʼukungu, ukungi laawo. Dimi layukusha pasi diʼave, kame lʼelembe la adjangu, wakamafundi dikambu diawo, dia we nteya mbaetsha.

¹³Osoku Mose akunela, ndi la Jashua lakatukimanyiaka. Ku Mose akambela lʼukungu a Unyashungu.

¹⁴Ku ndi akatela dihangamendi ati: Nyutukungi lane edja ndu lamʼayutukalula le nyu. Nyendi, Arona la Hura wambutshikala la nyu. Naka untu eko la dikambu, ndi kayi le wo.

¹⁵Mose akambela lʼukungu, ku dingi diakakumbi ukungu.

¹⁶Lutumbu la Latuyalaka lakayala ladiku diʼUkungu a Sinai, ku dingi diakukumbi nshi shamalu. Ku lushi lʼesambeli, Latuyalaka aketi Mose uma lʼatei a dingi.

¹⁷Enelo ka lutumbu la Latuyalaka kaki uku dja yaheta lʼote wʼukungu, lu ashu wʼasi Isariyele.

¹⁸Ku Mose akoto lu dingi, akambela lʼukungu. Mose akatshikala lʼukungu tanyi akumi anei la etshu akumi anei.[102]