Read tetala Etumbelu 25 Bible Online

Etumbelu 25 - tetala bible

Etumbelu 25

¹Latuyalaka akatela Mose ati:

²Uteli asi Isariyele dia vo mbelami ulambu. Nyosaki ulambu uma le untu tshe layukimo lʼutema otoi.

³Wuhu one wʼelambu mbayuyulungulaka uma le wo: paunyi, fesa, udjulu,

⁴ahondo wʼedima, wʼengingi, wa tilili, wa linene, wa diosa dia mbudi,

⁵dikuhu dia waumi wʼekoko diakawanya lu dangi dia tilili, ndu dikuhu dia mbudi la utamba wʼulungu,

⁶iso ka tala, diango diʼupumu ne dia iso ka lukita ndu dia malashi wʼupumu,

⁷mboko yʼave wa pesopeso, ndu towoko ta ngaingai ta nenga lʼukutu wa nemo la lʼopema.

⁸Kawumpikeli etemwelo ka dimi mbidjase lʼatei awo.

⁹Kanyutshi etemwelo ka dipema la diango diato tshe uku tediko tayumukenya.

¹⁰Kawutshi oshete wa sheki lʼabaya wʼutamba wʼulungu. Utali awo kawuyali kubita hyendi la etenyi, wekeki awo kubita otoi la etenyi, wemema awo kubita otoi la etenyi.

¹¹Kukumbi paunyi ndu lʼandja ndu lʼetei, kumami ukaba wa paunyi lʼutshimba tshe.

¹²Kutshi ashingu anei wa paunyi, kuwadji lʼekulu awo enei: ashingu ahendi wedi awo omotshi, la ashingu ahendi wedi awo ukina.

¹³Kutshi esimbi wʼutamba wʼulungu, kuwekumbi la paunyi.

¹⁴Kosome esimbi lu ashingu wedi ako ehendi wʼoshete, dia membaka oshete.

¹⁵Esimbi kawutshikalaki lu ashingu wa lʼoshete; tawesomolaki uma loko.

¹⁶Kudji omenyi wayumukusha lʼoshete wa sheki.

¹⁷Kutshi ufudi wʼoshete[103] la paunyi ka lutshula. Utali awo kawuyali kubita hyendi la etenyi, wekeki awo kubita otoi la etenyi.

¹⁸Kutshi akeruba ahendi wa paunyi, kuwatshi la paunyi ka lutshula lu kuma hyendi yʼufudi.

¹⁹Kutshi okeruba omotshi la kuma kemotshi la okeruba ukina la kuma kekina. Kutshi akeruba ahendi wusamanyi kame lʼufudi lu kuma yawo hyendi uma lu etshi otoi.

²⁰Akeruba kawelaneli, ku ahafu awo kawusamani ladiku, dia nkumba ufudi; dundji diawo kadiokolami utsha lʼufudi.

²¹Kudji ufudi ladiku diʼoshete wa sheki. Kudji omenyi wayumukusha lʼatei wʼoshete ako.

²²Laawo kayumuhumana la ye. Uma ladiku dia akeruba ahendi weli ladiku diʼoshete wa sheki wʼomenyi, kayumusawulaka la ye diʼakambu tshe wayumukutelaka lu dikambu diʼasi Isariyele.

²³Kutshi mesa lʼabaya wʼulungu. Utali awo kawuyali kubita hyendi, wekeki awo kubita otoi, la wemema awo kubita otoi la etenyi.

²⁴Kukumbi paunyi, ndu kudji ukaba wa paunyi lʼutshimba tshe.

²⁵Kutadji etshi ka paunyi lʼutshimba a mesa tshe, keli kuyahe ukaba ako ladiku diato.

²⁶Kutshi ashingu anei wa paunyi, kuwadji lu atshuku anei lu ekulu wa mesa.

²⁷Ashingu ako kawuyali lasuki lʼukaba dia nsome esimbi wa memba mesa.

²⁸Kutshi esimbi wʼabaya wʼulungu, kuwekumbi la paunyi, dia membaka mesa.

²⁹Kutshi diango diawo ne la paunyi ketu: alonga wʼekalikali, wʼafuku, ne dia malashi; ndu tolondo la eteka, ne dia elambu wʼashashi.

³⁰Kunkitshiyaki ma dia lenya lu mesa tena tshe.[104]

³¹Kutshi ekitshelu ka tala la paunyi ketu. Kukitshi la paunyi ka lutshula. Etshina kato, usika ato, akoho wa mbidja atala, ehundu ato la alembo ato kawutshami lʼukama otoi wa paunyi.

³²Kutshi tahi shamalu yusamanyi lʼusika: tahi shatu wedi omotshi wʼekitshelu ka tala, la tahi shatu lu wedi ukina wʼekitshelu ka tala.

³³Akoho asatu wufanyi la ehundu la alembo wʼutamba wa amande wayuyala lu lutahi lomotshi; akoho asatu wufanyi lʼehundu la alembo wʼutamba wa amande wayuyala lu lutahi lukina. Wuhu ako mbayuyala lu tahi shamalu yusamanyi lu ekitshelu ka tala.

³⁴Akoho anei wufanyi la ehundu la alembo wʼutamba wa amande wayuyala lu usika wʼekitshelu ka tala.

³⁵Uhundu omotshi ayuyala la tshina dia tahi hyendi yusamanyi la usika wʼekitshelu ka tala, uhundu ukina la tshina dia tahi hyendi kina, la uhundu ukina la tshina dia tahi hyendi kina. Osoku mbayuyala lu tahi shamalu yusamanyi lʼekitshelu ka tala.

³⁶Kutshi ehundu awo la tahi yawo lʼukama otoi wa paunyi ketu ka lutshula.

³⁷Kutshi atala ato esambeli; kuwakitsha lu ahuli awo ladiku dia ekitshelu ka tala, dia vo mpetaka.

³⁸Kutshi tosholo ta nyimaka atala, ndu alonga wʼutuku la paunyi ketu.

³⁹Kutshi ekitshelu ka tala la diango diato tshe uma lʼukama wa paunyi ketu wa talata otoi.

⁴⁰Kendi dia we ditsha tshe uku tediko takamakenya lʼukungu.[105]