Read tetala Etumbelu 28 Bible Online

Etumbelu 28 - tetala bible

Etumbelu 28

¹Ose onanyo Arona la anʼandi wʼapami, Nadaba, Abihu, Eleasara la Itamara uma lʼatei wʼasi Isariyele, uwakitsha lasuki la ye, dia vo nkambelami ulimu wʼolombedi.

²Kotelele onanyo Arona ahondo wʼekila, dia vo ndjala eloto wa lutumbu ndu wa dimena.

³Kusawuli la akanga a lononga tshe wakamaludia too la yimba, dia vo ntelela Arona ahondo, dia ndi nkidiama lʼulimu ami wʼolombedi.

⁴Kawotelele ahondo ane: opema, ukutu wa nemo, ukutu, sumishi kʼasangu, lufule lʼolombedi, la uya. Kawotelele onanyo Arona la anʼandi wʼapami ahondo wʼekila dia vo nkambelakami ulimu wʼolombedi.

⁵Kawose paunyi, ahondo wʼedima, wʼengingi, wa tilili ndu wa linene la dimena.

⁶Kawutshi ukutu wa nemo la eshinga wa paunyi, wʼedima, wʼengingi, wa tilili ndu wa linene wʼololo. Ulimu oso kawuyali ulimu wa lononga.

⁷Kayali betshi pendi dia lʼaheka dia dio mamana lu emamu awo ehendi, dia vo tshe nsamana.

⁸Uya wa ndotaka la ukutu wa nemo kawutshami la eshinga wa paunyi, wʼedima, wʼengingi, wa tilili, la wa linene wʼololo, uku ukutu wa nemo. Kawotelami kame la ukutu ako.

⁹Kose ave ahendi wa pesopeso, kufundi kumbu ya ana wʼapami wa Isariyele la utshimo loko:

¹⁰kumbu shamalu lu dive dimotshi, la kumbu shamlu lu dive dikina, uku wahonyiwo lu eutwelu.

¹¹Kufundi kumbu yʼana apami wa Isariyele lu ave ahendi la utshimo uku atuwutshimaka ave la dimatelu. Kudingi kumbu yako lu ekimedi wa paunyi.

¹²Kumami ave ako ahendi ladiku dia betshi dia lʼaheka wʼukutu wa nemo, dia vo ndjala euhwelu kʼasi Isariyele. Arona kembaki kumbu yawo lu aheka andi ahendi la ntundu ka Latuyalaka, dia ndjala euhwelu.

¹³Kutshi ekimedi ako la paunyi,

¹⁴esambala ehendi la ekodi wa paunyi. Kukeleki esambala ako lu kuma yʼekimedi.

¹⁵Kutshi opema wʼelumbwelu la lononga, uku ayuyutsha ulimu wʼukutu wa nemo. Kutshi la eshinga wa paunyi, wʼedima, wʼengingi, wa tilili, la wa linene wʼololo.

¹⁶Opema ako kawuyali ndjalu hyendi ndu beke nei diedimi, utali awo nana otoi dia pita, ndu wuki awo nana otoi.

¹⁷Kudji enongo enei wʼave wʼushinga a wulu dia mbolenga: lu onongo wa ntundu, dive dia tilili, diʼendondo, ndu diʼeleselese;

¹⁸lu onongo wa hendi, dive diʼeleselese, diʼudima ndu dia pesopeso;

¹⁹lu onongo wa satu, dive diʼetukutuku, dive dia wehu wehu ndu dia engingi;

²⁰lu onongo wa nei, dive diʼekesekese, dia pesopeso ndu dia awadi awadi. Ave aso wʼushinga a wulu wayukimame lu ahuli awo lu ekimedi awo wa paunyi.

²¹Ave dikumi la ahendi kawuyali loko, uku eli kumbu yʼana wʼapami wa Isariyele. Dive la dive kadiutshimami la utshimo uku ematelu, dia nfunda lukumbu lomotshi lʼatei a khumbu dikumi la hyendi ya Isariyele.

²²Kutshi esambala wʼeshinga wa paunyi lʼopema.

²³Kutshi ashingu ahendi wa paunyi, kuwadji lu emamu ehendi wʼopema.

²⁴Kudji esambala ehendi wa paunyi lu ashingu ahendi weli lu emamu ehendi wʼopema.

²⁵Kumamanya kuma hyendi yʼeshinga la kumu yʼekimedi. Kumamanya esambala ako la betshi dia lʼaheka wʼukutu wa nemo uya la ntundu.

²⁶Kutshi ashingu ahendi wa paunyi. Kuwadji lu kuma hyendi ya lʼesi opema yumamemi lʼukutu.

²⁷Kutshi ashingu ahendi wa paunyi, kuwadji lu betshi dia lʼaheka uya la ntundu, lasuki lʼesamanelu. Kuma ka lʼesi opema kasukani la uya wʼukutu wa nemo wakatshama la lononga.

²⁸Kawumamanya ashingu wʼopema la ashingu wʼukutu wa nemo lʼokodi wʼudima, dia opema ndjala ladiku diʼuya wʼukutu wa nemo, ne dia opema atukukakitwana la ukutu wa nemo.

²⁹Okone lamʼayotoka Arona lu dihuli diʼekila, ndi kembaki kumbu yʼana wa Isariyele lu tulu kandi yufundami lu opema wʼelumbwelu, uku euhwelu ka pundju la ntundu ka Latuyalaka.

³⁰Kudji nyembo yʼaloho “Usasi” la “Uluwanyi”,[107] lu opema wʼelumbwelu. Yo kayuyalaki lu tulu ka Arona lamʼayunduyalaka la ntundu ka Latuyalaka. Arona kembaki elumbwelu kʼasi Isariyele lu tulu kandi tena tshe lamʼayundemalaka la ntundu ka Latuyalaka.

³¹Kutshi ukutu wʼukutu wa nemo tshe la udima utu.

³²Kawati kingu lu dihondo diako kʼatei atei ka mbidjaka ote. Kudji utumbu wufanyi la kingu ka koti dia mbulu la lononga lʼutshimba wa kingu kawo tshe, ne dia vo watukate.

³³Kudji asangu wa dikomi diʼetamba la dangi diʼudima, diʼengingi, ndu dia tilili ladiku diʼutshimba tshe wa kuma kʼukutu. Asangu ako wa dikomi kawusamani la tungunga ta paunyi:

³⁴nyunga ya paunyi la ekomi, nyunga ya paunyi la ekomi ladiku diʼutshimba tshe wa kuma kʼukutu.

³⁵Arona kawolotaki lamʼayundutshaka ulimu, ku lundju la tungunga tawo layukemaka lamʼayundotoka lu dihuli diʼekila la ntundu ka Latuyalaka, ndu lamʼayundutumbaka uma loko, ndi atukuvo.

³⁶Kutshi lukaka la paunyi ketu. Kufundi ladiku dialo la utshimo uku atuwutshimaka ematelu, wati: EKILA LE LATUYALAKA.

³⁷Kukeleki lukaka lako la okodi wʼudima lu lufule lʼolombedi. Lo kaluyali lu lufule lʼolombedi, uya la ntundu.

³⁸Lo kaluyalaki lu fumu ka Arona. Ku Arona ndame ayembaka enungu tshe watukungulaka asi Isariyele lʼulambu wʼekila, watuwukidiaka uku eshasha awo wʼekila. Lo kaluyalaki la fumu kandi, dia vo nungwamaka la ntundu ka Latuyalaka.

³⁹Kutshi sumishi la asangu la linene lʼololo. Kutshi ndu lufule lʼolombedi la linene lʼololo. Kutshi ndu uya la asangu wa lononga.

⁴⁰Kutsheli ana apami wa Arona sumishi, eya, ndu tufulefule. Kutshi eloto ako ne dia lutumbu, la dimena.

⁴¹Kuwelotsha onanyo Arona la anʼandi wʼapami weli la ndi. Kuwakiti iso, kuwasonole, kuwakidia, dia vo nkambelami ulimu wʼolombedi.

⁴²Kuwatsheli ehaku wa linene uma lu lukendi pulu ndu lu pelohelo, dia nkumba utakataka awo.

⁴³Arona la anʼandi kawelotaki lamʼayuwotoka lu luudu lʼesanganelu la dipema, kana lamʼayuwusukanaka lasuki lʼediakelu, dia ntsha ulimu lu dihuli diʼekila, ne dia watukuyaembia unungu vame ndu watukuvo. Dikambu so diayuyala olembe wa pundju le ndi ndu le tukanula tandi.