Read tetala Etumbelu 30 Bible Online

Etumbelu 30 - tetala bible

Etumbelu 30

¹Kutshi ediakelu ka ntshumba malashi ladiku diato. Kukitshi etamba wʼulungu.

²Utali ato kawuyali kubita otoi, ndu wekeki ato pupu kubita otoi. Beke diako nei kadiedimi pupu. Wemema ato kawuyali kubita hyendi. Seki yato kayoselami lu etshi otoi kʼutamba, yuhikami loko.

³Kukikumbi la paunyi ketu ladiku, lʼutshimba ato tshe ndu lu seki yato. Kudji ukaba wa paunyi lʼutshimba ato tshe.

⁴Kutshi ashingu wa paunyi lʼesi ukaba ako lu wedi ehendi wʼediakelu. Vo kawukimelaki esimbi wa membaka ediakelu.

⁵Kutshi esimbi wʼabaya wʼulungu, kuwekumbi la paunyi.

⁶Kukitsha ediakelu kako lʼandja a dihondo dieli la ntundu kʼoshete wa sheki wʼomenyi, welanedi lʼufudi weli ladiku dʼomenyi, lene ayumusanganaka la ye.

⁷Arona katshumbaki malashi wʼupumu loko. Ndi katshumbaki pindju tshe lamʼayundolongosolaka ataia.

⁸Arona katshumbaki ndu la dikolo lamʼayundohetshaka atala. Vo kawuyalaki malashi wʼupumu la ntundu ka Latuyalaka lu lolonga la lolonga.

⁹Tanyu-lambulaki wuhu ukina wa malashi loko kuyanga ulambu wa lutshumba kana ulambu wa shima. Tutelaki ulambu wa lutela loko.

¹⁰Arona katungaki ekesanelu ladiku dia seki yato, etena otoi lu eleku lʼeleku. La dikila diʼulambu wa kolo wʼekesanelu, mbayundutungelaka ediakelu ekesanelu etena otoi lu eleku lʼeleku, lu lolonga la lolonga. To kuleki ekila le Latuyalaka.

¹¹Latuyalaka akatela Mose ati:

¹²Lamʼayuyala asi Isariyele dia mbeya efula kawo, untu lʼuntu kafuti ushinga wʼetshungwelu kandi le Latuyalaka, ne dia sui dia wulu diatukuyala le wo lu alelu kako.

¹³Untu tshe layalema, kakimo okone: Etenyi otoi ka hendi ka shekele,[109] lu wuhu watuwutshaka ulimu lu etemwelo (shekele yeli la ngera akumi ahendi), etenyi otoi ka hendi uku ulambu le Latuyalaka.

¹⁴Untu laya la deku akumi ahendi pulu ladiku, kakimo ulambu wa Latuyalaka lamʼayundalema.

¹⁵Kanga ongonyi takimoki ladiku dia etenyi otoi ka hendi ka shekele, ndu usi wula takimoki lʼesi ka etenyi otoi ka hendi ka shekele, lamʼayuwukimo ulambu wa Latuyalaka dia ntunga ekesanelu kanyu.

¹⁶Kulunguli falanga yʼekesanelu uma le asi Isariyele, kuyidji lʼulimu a luudu lʼesanganelu la dipema. Yo yayuyala euhwelu le asi Isariyele la ntundu ka Latuyalaka dia mbatungela ekesanelu vame.

¹⁷Latuyalaka akatela Mose ati:

¹⁸Kutshi donga diʼohotela la ekitshelu kadio kʼohotela diʼeokelo.[110] Kudikitsha lʼasa luudu lʼesanganelu la dipema la ediakelu, kudji ashi loko.

¹⁹Arona la anʼandi kawotshaki anya la ekulu loko.

²⁰Lamʼayuwotoka lu luudu lʼesanganelu la dipema, kana lamʼayuwusukanaka lasuki lʼediakelu dia ntsha ulimu, dia nambulaka elambu wa lu dja le Latuyalaka, kawutotshaki anya lʼekulu lu ashi ako, ne dia watukuvo.

²¹Kawotshaki anya awo la ekulu awo, watukuvo. Oso ayuyala olembe wa pundju le wo, le Arona la anʼandi wʼapami, ndu le tukanula tandi lu lolonga la lolonga.

²²Dikambu dikina, Latuyalaka akatela Mose ati:

²³Kose diango diʼupumu diuleki ololo: shekele kama tshanu ya mura yʼashashi, kama hyendi la akumi atanu ya pusu yʼutamba wa kinamona, kama hyendi la akumi atanu yʼediu wa tumbatumba diufanyi la asopo, weli la upumu wʼololo efula,

²⁴shekele kama tshanu wuhu wa lʼetemwelo, ya pusu yʼutamba wʼosongu, ndu hina otoi ka iso ka mbeli.

²⁵Kutshi la dio iso ne dia ekitelu kʼekila. Esanganyelu ka malashi ako kayali wuhu watutshaka utshi wa malashi. To kayuyala iso ka lukita kʼekila.

²⁶Kukikiti luudu lʼesanganelu la dipema ndu oshete wa sheki yʼekila wʼomenyi,

²⁷mesa la diango diawo diʼulimu, ekitshelu ka tala la diango diato, ediakelu ka malashi,

²⁸ediakelu kʼulambu wa lutshumba la diango diato tshe, ndu donga dia mbotsha anya la ekitshelu kadio.

²⁹Kudikidia, dia dio ndeka ndjala ekila. Ku engo tshe kayusakana la to, kayuyala ekila.

³⁰Kukiti Arona la anʼandi wʼapami iso, kuwakidia, dia vo nkambelami ulimu wʼolombedi.

³¹Kuteli asi Isariyele wati: Iso kene, kayuyala iso kami ka lukita kʼekila lu lolonga la lolonga.

³²Tanyukikitaki antu kʼantu. Tanyutshaki iso kekina kufanyi la to la tediko ta wuhu ako. To keko ekila. Osoku to kayuyala ekila le nyu.

³³Untu tshe layutsha iso kufanyi la to, kana untu tshe lakitela lu dimba dia ongendangenda, ayunyema uma lu wudja awo.

³⁴Latuyalaka akatela Mose ati: Kose diango diʼepumu: kimbi, uhidi, okolongonyo, diango diʼupumu kame la tsho (kose tediko pupu uma lu diango ne diʼupumu),

³⁵kuditshi malashi wa losohanya, uku atutshaka utshi wa malashi, diosohanyemi la leho. Kawuyali pudipudi ndu ekila.

³⁶Koto etenyi kemotshi dia to ndjala efushi. Kukitsha ufushi ako la ntundu kʼomenyi, lu luudu lʼesanganelu la dipema, lene ayumusanganaka la ye. Vo wayuyala engo kuleki ekila le nyu.

³⁷Tanyutshaki wuhu ako wa malashi la tediko ta wuhu ako, dia nyu nyame ndjatshela. Vo wayuyala ekila dikambu dianyu le Latuyalaka.

³⁸Untu tshe layutsha wuhu ako wa malashi, dia mbuka upumu awo, ayunyema uma lu wudja awo.[111]