Read tetala Etumbelu 31 Bible Online

Etumbelu 31 - tetala bible

Etumbelu 31

¹Latuyalaka akatela Mose ati:

²Enda, dimi lambeta Bezalele, onʼa Uri, onʼa Hura, uma lu diuhu dia Juda lukumbu.

³Dimi lambuludia la Nyuma ka Unyashungu, la komba, la yimba, ndu la ewu ka mbeya wehu tshe wʼelimu,

⁴dia ndi ntatela sangweyu diʼelimu wa komba, wa ntsha la paunyi, la fesa, ndu lʼehotela,

⁵ndu dia mpimbula ave wa ntsha dikitshelu, la wa nsela abaya, ne dia ntsha elimu tshe.

⁶Enda, dimi lambosonola ndu Oholiyabe, ona pami a Ahisamaka, uma lu diuhu dia Dane, dia ndi ndjala kame la ndi. Dimi lambusha akanga a tumba komba dia vo ntsha diango tshe diakamakutela:

⁷luudu lʼesanganelu, oshete wa sheki wʼomenyi, ufudi weli ladiku diawo, la diango tshe diʼulimu, dia lu luudu lʼesanganelu la dipema,

⁸mesa la diango diawo, ekitshelu ka tala ka paunyi la diango diato tshe, ediakelu ka malashi,

⁹ediakelu kʼulambu wa lutshumba la diango diato tshe, donga la ekitshelu kadio,

¹⁰eloto wakatelama dimena, eloto wʼekila wʼolombedi Arona, la eloto wa anʼandi, wa nkambaka ulimu awo wʼolombedi,

¹¹iso ka lukita, malashi wʼupumu wʼololo ne dia dihuli diʼekila. Kawutshi tshe uku akamakutela.

¹²Latuyalaka akatela Mose ati:

¹³Kuteli asi Isariyele ntu wati: Kanyulamaki nshi yami ya mumuya, ne dia etshelu kako kayuyala djimbitelu lʼasami la nyu, lu lolonga la lolonga, dia nyu mbeya nyati: Dimi keli Latuyalaka, latunyukidiaka.

¹⁴Kanyulamaki lushi la mumuya, ne dia lo leli ekila le nyu. Untu tshe layululanya, ayudiakema; one tshe layutsha ulimu lushi lako, ayunyema uma lʼatei a wudja awo.

¹⁵Kawutshaki ulimu nshi shamalu, keli lushi lʼesambeli, leli lushi la mumuya, la mumuya ka lukumu, lʼekila le Latuyalaka. Untu tshe layutsha ulimu lushi la mumuya, ayudiakema.[112]

¹⁶Okone asi Isariyele kawulamaki lushi la mumuya, kawulolemiaki lu nonga la nonga, uku daka dia pundju.

¹⁷Lo leli djimbitelu ya pundju lʼasami lʼasi Isariyele, ati: Latuyalaka akatungi ulungu la kete lu nshi shamalu, ku ndi akakimo ulimu andi, akumuya lushi lʼesambeli.[113]

¹⁸Lamʼakashidiya Latuyalaka nsawula la Mose ladiku diʼUkungu a Sinai, ndi akawusha pasi pendi diʼomenyi, pasi diʼave, diakafundama la luhita la Unyashungu.